ರೈಲುಗಳಲ್ಲಿನ ಶೌಚಾಲಯಗಳಲ್ಲಿ ದುರ್ವಾಸನೆ: ಇನ್ಮುಂದೆ ಅಧಿಕಾರಿಗಳಿಂದಲೇ ಪರಿಶೀಲನೆ!

ನವದೆಹಲಿ (ಪಿಟಿಐ): ಶೌಚಾಲಯಗಳಲ್ಲಿ ದುರ್ವಾಸನೆ ಬರುತ್ತಿರುವ ಬಗ್ಗೆ ದೂರುಗಳು ಕೇಳಿ ಬಂದ ಹಿನ್ನೆಲೆಯಲ್ಲಿ ಪರಿಶೀಲನೆ ನಡೆಸಿ, ಕಾರಣ ಪತ್ತೆ ಮಾಡುವಂತೆ ಹಿರಿಯ ಅಧಿಕಾರಿಗಳನ್ನೇ ರೈಲುಗಳಿಗೆ ನಿಯೋಜಿಸಲಾಗಿದೆ ಎಂದು ರೈಲ್ವೆ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

’ಎರಡನೇ ಹಂತದಲ್ಲಿ ಪ್ರಯಾಣಿಕರು ಎದುರಿಸುತ್ತಿರುವ ಸಮಸ್ಯೆಗಳ ಬಗ್ಗೆ ತಿಳಿದುಕೊಳ್ಳುವಂತೆ ರೈಲ್ವೆ ಬೋರ್ಡ್‌ ಮಟ್ಟದ ಅಧಿಕಾರಿಗಳನ್ನೇ 3 ಎಸಿ ಕೋಚ್‌ ರೈಲುಗಳಿಗೆ ನಿಯೋಜಿಸಲಾಗುವುದು. ಕಳೆದ ಮೂರು ದಿನದಲ್ಲಿ ಹಿರಿಯ ಅಧಿಕಾರಿಗಳು 544 ತಪಾಸಣೆ ಪೂರ್ಣಗೊಳಿಸಿದ್ದಾರೆ‘ ಎಂದು ಅವರು ಹೇಳಿದ್ದಾರೆ.

ಶೌಚಾಲಯದಲ್ಲಿ ನೀರಿನ ಕೊರತೆ, ನೀರು ಸೋರಿಕೆ, ಶುಚಿತ್ವ ಬಗ್ಗೆ ರೈಲು ಪ್ರಯಾಣಿಕರಿಂದ ಸಾಮಾಜಿಕ ಜಾಲತಾಣಗಳಲ್ಲಿ ದೂರುಗಳು ಕೇಳಿ ಬಂದಿದ್ದವು.