ರೋಹಿಣಿ ಅವರ ಶರೀರಕ್ಕೆ ಮುಪ್ಪು ಆವರಿಸುತ್ತಿದೆ, ಆದರೆ, ಅವರೊಳಗಿನ ಕಲೆ ಇನ್ನೂ ಯೌವ್ವನೆ. 77ರ ಹರೆಯದ ಅವರು ಈಗಲೂ ನಾಟಕ, ಚಲನಚಿತ್ರಗಳಲ್ಲಿ ಪಾತ್ರ ಮಾಡುತ್ತಾರೆ. ಮಂಗಳೂರು ಸಮೀಪದ ಬಲ್ಲಾಳಬಾಗ್ನ ದಿವಂಗತ ರಘುರಾಂ ಮತ್ತು ಕಮಲಾ ದಂಪತಿ ಪುತ್ರಿ ರೋಹಿಣಿ, ಒಂಬತ್ತನೇ ವಯಸ್ಸಿಗೆ ಗೆಜ್ಜೆ ಕಟ್ಟಿದವರು. ಮಾಸ್ಟರ್ ವಿಠಲ್ ಅವರಲ್ಲಿ ಭರತನಾಟ್ಯ ಕಲಿತು, ರಂಗ ಪ್ರವೇಶಿಸಿದ ಅವರು, ರಾಜ್ಯ, ಹೊರರಾಜ್ಯಗಳಲ್ಲಿ ಕಲಾ ಪ್ರದರ್ಶನ ನೀಡಿದ್ದಾರೆ. ಕಲಿತ ಶಾಸ್ತ್ರೀಯ ನೃತ್ಯ ವಿದ್ಯೆಯನ್ನು ಇತರರಿಗೆ ಕಲಿಸಿ ಮನೆಯನ್ನೇ ಕಲಾಶಾಲೆಯನ್ನಾಗಿಸಿದ್ದು ಅವರ ಕಲಾ ಜೀವನದ ಹೆಮ್ಮೆಯ ಸಂಗತಿ.