ಬೆಂಗಳೂರು: ವಸತಿ ಯೋಜನೆ ಅಥವಾ ಅಪಾರ್ಟ್‌ಮೆಂಟ್ ಸಮುಚ್ಚಯದ ಪ್ರಗತಿಯ ಕುರಿತು ನಿಯಮಿತವಾಗಿ ವರದಿ ನೀಡದ ಬಿಲ್ಡರ್‌ಗಳು ಅಥವಾ ಡೆವಲಪರ್‌ಗಳಿಗೆ ಭಾರಿ ಮೊತ್ತದ ದಂಡ ವಿಧಿಸಲು ರಿಯಲ್‌ ಎಸ್ಟೇಟ್‌ ನಿಯಂತ್ರಣ ಪ್ರಾಧಿಕಾರ (ರೇರಾ) ಮುಂದಾಗಿದೆ.
ರೇರಾ ಅಡಿ ನೋಂದಣಿ ಮಾಡಿಸಿಕೊಂಡ ಬಿಲ್ಡರ್‌ಗಳು ಪ್ರತಿ ತ್ರೈಮಾಸಿಕಕ್ಕೆ ತಮ್ಮ ಯೋಜನೆಗಳ ಪ್ರಗತಿಯ ವಿವರವನ್ನು ವೆಬ್‌ಸೈಟ್‌ನಲ್ಲಿ ದಾಖಲಿಸಬೇಕು. ನಿರ್ದಿಷ್ಟ ಅವಧಿ ಮುಗಿದ 15 ದಿನಗಳ ನಂತರವೂ ವಿವರವನ್ನು ದಾಖಲಿಸದಿದ್ದರೆ ದಂಡ ಪಾವತಿಸಬೇಕಾಗುತ್ತದೆ.
ತ್ರೈಮಾಸಿಕ ಅವಧಿಯ 15 ದಿನಗಳ ನಂತರ, ಮೊದಲ ತಿಂಗಳಿಗೆ ₹10 ಸಾವಿರದವರೆಗೆ ದಂಡವನ್ನು ವಿಧಿಸಲಾಗುತ್ತದೆ. ನಂತರವೂ ವಿವರವನ್ನು ದಾಖಲಿಸದಿದ್ದರೆ ತಿಂಗಳಿಗೆ ₹20,000 ದಂಡವನ್ನು ವಿಧಿಸಲಾಗುತ್ತದೆ ಎಂದು ರೇರಾ ಹೇಳಿದೆ.
ರೇರಾ ಅಡಿ 3,800 ಬಿಲ್ಡರ್‌ಗಳು ನೋಂದಣಿ ಮಾಡಿಸಿಕೊಂಡಿದ್ದಾರೆ. ಆದರೆ, 1,700 ಬಿಲ್ಡರ್‌ಗಳು ತ್ರೈಮಾಸಿಕವಾಗಿ ಯೋಜನೆಯ ಪ್ರಗತಿಯ ವಿವರ ಸಲ್ಲಿಸಿಲ್ಲ ಎಂದು ರೇರಾ ಅಧಿಕಾರಿಗಳು ಹೇಳುತ್ತಾರೆ.
ಹಣ ಪಾವತಿಸಿಕೊಂಡ ಬಿಲ್ಡರ್‌ಗಳು ಅವಧಿ ಮುಗಿದು ವರ್ಷಗಳೇ ಕಳೆದರೂ ಮನೆ ನೀಡದೆ ಸತಾಯಿಸುತ್ತಿರುವ ಕುರಿತು ಖರೀದಿದಾರರು ದೂರು ದಾಖಲಿಸಿದ್ದರು. ಬಹಳಷ್ಟು ಗ್ರಾಹಕರು ಬಿಲ್ಡರ್‌ಗಳ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದರು. ಇದನ್ನು ತಪ್ಪಿಸಲು ಬಿಲ್ಡರ್‌ಗಳ ಮೇಲೆ ದಂಡ ವಿಧಿಸಲು ರೇರಾ ಮುಂದಾಗಿದೆ.
ಈ ಬಗ್ಗೆ ‘ಹಣವೂ ಇಲ್ಲ, ಮನೆಯೂ ಇಲ್ಲ’ ಶೀರ್ಷಿಕೆಯಡಿ ‘ಪ್ರಜಾವಾಣಿ’ಯಲ್ಲಿ ವರದಿ ಪ್ರಕಟವಾಗಿತ್ತು.
