ಸಾಯಿ ಪಲ್ಲವಿ ಹವಾ

ಸಾಯಿ ಪಲ್ಲವಿ ಅವರ ಮೊದಲ ತೆಲುಗು ಚಿತ್ರ ‘ಫಿದಾ’ ಭರ್ಜರಿ ಯಶಸ್ಸು ಕಂಡಿದೆ. ಈ ಜನಪ್ರಿಯತೆಯನ್ನು ಲಾಭವನ್ನಾಗಿ ಪರಿವರ್ತಿಸಿಕೊಳ್ಳಲು ಯೋಜಿಸಿರುವ ಕೆಲವು ನಿರ್ಮಾಪಕರು ಸಾಯಿ ಪಲ್ಲವಿ ನಟಿಸಿದ್ದ ಮಲೆಯಾಳಂ ಸಿನಿಮಾಗಳನ್ನು ಈಗ ತೆಲುಗಿಗೆ ಡಬ್ ಮಾಡಿ ಬಿಡುಗಡೆ ಮಾಡಲು ಸಿದ್ಧತೆ ನಡೆಸುತ್ತಿದ್ದಾರೆ.

ಮಲೆಯಾಳಂನಲ್ಲಿ ಭರ್ಜರಿ ಹಿಟ್ ಆಗಿದ್ದ ದುಲ್ಕರ್ ಸಲ್ಮಾನ್ ಮತ್ತು ಸಾಯಿ ಪಲ್ಲವಿ ನಟನೆಯ ‘ಕಲಿ’ ಸಿನಿಮಾವನ್ನು ತೆಲುಗಿನಲ್ಲಿ ‘ಹೇಯ್ ಪಿಲ್ಲಗಾಡ’ ಹೆಸರಿನಲ್ಲಿ ಬಿಡುಗಡೆ ಮಾಡಲಾಗುತ್ತಿದೆ. ಯುವಕನೊಬ್ಬನ ಕೋಪ ಮತ್ತು ಅದರಿಂದ ಆತ ಎದುರಿಸಬೇಕಾದ ಕಷ್ಟಗಳ ಕತೆ ಈ ಸಿನಿಮಾದಲ್ಲಿದೆ. ಇದು ಮಲೆಯಾಳಂನಲ್ಲಿ ಭರ್ಜರಿ ಹಿಟ್ ಆಗಿತ್ತು, ಅಷ್ಟೇ ಅಲ್ಲ ಹಲವು ಪ್ರಶಸ್ತಿಗಳನ್ನೂ ಬಾಚಿಕೊಂಡಿತ್ತು.

ತೆಲುಗಿನಲ್ಲಿ ಈ ಚಿತ್ರಕ್ಕೆ 'ಹೇಯ್ ಪಿಲ್ಲಗಾಡ' ಎನ್ನುವ ಹೆಸರು ಇಡಲಾಗಿದೆ. ಈ ಚಿತ್ರದ ಕತೆಗೂ- ಈ ಹೆಸರಿಗೂ ಯಾವುದೇ ಸಂಬಂಧ ಇಲ್ಲ. ಆದರೆ, ಇದು ‘ಫಿದಾ’ ಸಿನಿಮಾದ ಜನಪ್ರಿಯ ಸಂಭಾಷಣೆ. ಸಾಯಿ ಪಲ್ಲವಿ ಅಭಿಮಾನಿಗಳನ್ನು ಆಕರ್ಷಿಸಲೆಂದೇ ಈ ಹೆಸರಿಡಲಾಗಿದೆ ಎನ್ನುವುದು ಈಗ ಗುಟ್ಟಾಗಿಲ್ಲ.