‘ಪ್ರಜಾವಾಣಿ’ ಕ್ವಿಜ್‌ ಚಾಂಪಿಯನ್‌ಶಿಪ್‌: ಫೈನಲ್‌ಗೆ ಮಹರ್ಷಿ ಪಬ್ಲಿಕ್‌ ಶಾಲೆ
ಅಕ್ಷರ ಗಾತ್ರ :ಆ |ಆ |ಆ
ಮೈಸೂರು: ಕಿಕ್ಕಿರಿದು ತುಂಬಿದ್ದ ಸಭಾಂಗಣದಲ್ಲಿ ಪ್ರಶ್ನೆಗಳಿಗೆ ಉತ್ತರಿಸಲು ಪೈಪೋಟಿ, ಉತ್ತರ ತಪ್ಪಾದಾಗ ಏನೋ ಚಡಪಡಿಕೆ, ಬೇಸರ. ಗೆದ್ದ ತಂಡಕ್ಕೆ ಮೆಚ್ಚುಗೆಯ ಚಪ್ಪಾಳೆ.
ಚಾತುರ್ಯ ಪ್ರದರ್ಶನ, ಪೈಪೋಟಿ ಹಾಗೂ ಜ್ಞಾನ ಸಂಗಮಕ್ಕೆ ವೇದಿಕೆಯಾಗಿದ್ದು ಸೋಮವಾರ ಇಲ್ಲಿ ಆರಂಭವಾದ ‘ಪ್ರಜಾವಾಣಿ ಕ್ವಿಜ್‌’ ಚಾಂಪಿಯನ್‌ಶಿಪ್‌ನ ನಾಲ್ಕನೇ ಆವೃತ್ತಿ. ಮೈಸೂರು ವಲಯ ಮಟ್ಟದಲ್ಲಿ ಮಹರ್ಷಿ ಪಬ್ಲಿಕ್‌ ಶಾಲೆ ತಂಡ ಮೊದಲ ಸ್ಥಾನ ಪಡೆಯಿತು.
‘ದೀಕ್ಷಾ’ ನೆಟ್‌ವರ್ಕ್‌ ಪ್ರಾಯೋಜಕತ್ವದಲ್ಲಿ ಮೈಸೂರು ವಿಶ್ವವಿದ್ಯಾಲಯದ ಸೆನೆಟ್‌ ಭವನದಲ್ಲಿ ನಡೆದ ಸ್ಪರ್ಧೆಯಲ್ಲಿ ಈ ಶಾಲೆಯ ಎನ್‌.ಅಭಯ್‌ ಹಾಗೂ ವಶಿಷ್ಠ 80 ಅಂಕ ಪಡೆದು ಬೆಂಗಳೂರಿನಲ್ಲಿ ಜ.24ರಂದು ನಡೆಯಲಿರುವ ಫೈನಲ್‌ಗೆ ಆಯ್ಕೆಯಾದರು.
ಎರಡನೆ ಸ್ಥಾನ ವಿದ್ಯಾವರ್ಧಕ ಸಂಘದ ಬಿಎಂಶ್ರೀ ವಿದ್ಯಾಸಂಸ್ಥೆಯ ಎಚ್‌.ಕೆ.ಮೇಘನ್‌ ಮತ್ತು ಎಂ.ಎಸ್‌.ಅರ್ಜುನ್‌ (35 ಅಂಕ) ಪಾಲಾಯಿತು. ಮೈಸೂರು ಲಯನ್ಸ್‌ ವೆಸ್ಟ್‌ ಶಾಲೆಯ ತಾನಿಶ್‌ ಹಾಗೂ ಲವಿನ್‌ (30) ಮೂರನೆ ಸ್ಥಾನ ಪಡೆದರು.
ಪ್ರಾಥಮಿಕ ಸುತ್ತಿನಲ್ಲಿ (ಲಿಖಿತ) ಕೇಳಿದ 20 ಪ್ರಶ್ನೆಗಳಿಗೂ ಉತ್ತರಿಸಿದ ಜೆಎಸ್‌ಎಸ್‌ ಪಬ್ಲಿಕ್‌ ಶಾಲೆ ತಂಡದ ರುದ್ರೇಶ್‌ ಹಾಗೂ ಶಮಂತ್‌ 20 ಅಂಕ ಪಡೆದರು. ಇದುವರೆಗೆ ನಡೆದ ‘ಪ್ರಜಾವಾಣಿ ಕ್ವಿಜ್‌’ ಚಾಂಪಿಯನ್‌ಶಿಪ್‌ಗಳಲ್ಲಿ ಇದು ದಾಖಲೆ ಅಂಕ ಕೂಡ. ಮೈಸೂರು, ಮಂಡ್ಯ, ಚಾಮರಾಜನಗರ ಹಾಗೂ ಕೊಡಗು ಜಿಲ್ಲೆಗಳ ಶಾಲಾ ವಿದ್ಯಾರ್ಥಿಗಳು ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದರು.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
