ಕುಟುಂಬದ 11 ಮಂದಿ ಸಾವು: ಭಗವಂತನ ಪವಾಡಕ್ಕೆ ಕಾದು ಹೆಣವಾದರು?

ಕುಟುಂಬದವರು ವಿಷಯವೊಂದರ ಮೇಲೆ ಗಾಢವಾಗಿ ನಂಬಿಕೆ ಇರಿಸಿಕೊಂಡಿದ್ದರು ಎಂದು ತೋರುತ್ತದೆ. ನೇಣಿಗೆ ಕೊರಳೊಡ್ಡುವ ಕ್ಷಣದಲ್ಲಿ ದೇವರು ಪವಾಡ ಸದೃಶ್ಯ ರೀ‌ತಿಯಲ್ಲಿ ನಮ್ಮನ್ನು ರಕ್ಷಿಸುತ್ತಾನೆ ಎಂದು ಆ ಕುಟುಂಬ ಭಾವಿಸಿದಂತಿದೆ ಎಂದು ಹೇಳಿದ್ದಾರೆ.

ಕೈಬರಹದ ಚೀಟಿಗಳಲ್ಲಿನ ಅಂಶಗಳನ್ನು ಗಮನಿಸಿದಾಗ ‘ಆ ಕುಟುಂಬ ತಮ್ಮ ನಂಬಿಕೆ ಮತ್ತು ಆಚರಣೆಗಳನ್ನು ಪ್ರತಿ ಹೆಜ್ಜೆಯಲ್ಲಿಯೂ ಕಟ್ಟುನಿಟ್ಟಾಗಿ, ಚಾಚೂ ತಪ್ಪದೆ ಪಾಲಿಸುತ್ತಿದ್ದರು’ ಎಂದೆನಿಸುತ್ತದೆ ಎಂದು ಪೊಲೀಸ್‌ ಅಧಿಕಾರಿ ಹೇಳಿದ್ದಾರೆ ಎಂದು ಹಿಂದುಸ್ತಾನ್‌ ಟೈಮ್ಸ್‌ ವರದಿ ಮಾಡಿದೆ.

ಮೃತಪಟ್ಟ 11 ಮಂದಿ ಪೈಕಿ ಇಬ್ಬರು ಮಕ್ಕಳು ಸೇರಿದಂತೆ ಆರು ಜನರ ಶವ ಪರೀಕ್ಷೆ ಮಾಡಲಾಗಿದೆ. ಅವರು ಸಾಯುವ ವೇಳೆ ನರಳಿಲ್ಲ, ಹಿಂಸೆಪಟ್ಟಿಲ್ಲ. ಈ ಸಂಬಂಧ ಅವರ ದೇಹದ ಮೇಲೆ ಯಾವುದೇ ಗುರುತುಗಳಿಲ್ಲ ಎಂದು ವರದಿಯಿಂದ ಗೊತ್ತಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಉತ್ತರ ದೆಹಲಿಯ ಬುರಾರಿ ಪ್ರದೇಶದಲ್ಲಿ ಒಂದೇ ಕುಟುಂಬದ ಏಳು ಮಹಿಳೆಯರು, ನಾಲ್ವರು ಪುರುಷರು ಹಾಗೂ ಮೂವರು ಮಕ್ಕಳು ಮೃತಪಟ್ಟಿದ್ದರು. ಕೆಲವು ದೇಹಗಳು ಮನೆಯ ಚಾವಣಿಗೆ ನೇಣು ಬಿಗಿದ ಸ್ಥಿತಿಯಲ್ಲಿದ್ದವು. ಇನ್ನು ಕೆಲವು ದೇಹಗಳು ಕಣ್ಣು, ಕೈ, ಕಾಲು ಕಟ್ಟಿ ಬಾಯಿ ಮುಚ್ಚಿದ ಸ್ಥಿತಿಯಲ್ಲಿ ನೆಲದ ಮೇಲೆ ಇದ್ದವು ಎಂದು ಪೊಲೀಸರು ಭಾನುವಾರ ತಿಳಿಸಿದ್ದರು.

ಈ ಕುಟುಂಬದವರು ಮೂಲತಃ ರಾಜಸ್ಥಾನದವರಾಗಿದ್ದು, ಆರ್ಥಿಕ ಸಂಕಷ್ಟ ಎದುರಿಸುತ್ತಿದ್ದರು. ಕುಟುಂಬದ ಭೂಪಿಂದರ್ ಹಾಗೂ ಲಲಿತ್ ಸಿಂಗ್ ಮನೆಯಲ್ಲಿಯೇ ದಿನಸಿ ಅಂಗಡಿ ನಡೆಸುತ್ತಿದ್ದರು.

ಮೃತರಲ್ಲಿ ನಾರಾಯಣ ದೇವಿ (75), ಅವರ ಪುತ್ರಿ ಪ್ರತಿಭಾ (57), ‍ಪುತ್ರರಾದ ಭಾವನೇಶ್‌ (50), ಲಲಿತ್‌ ಭಾಟಿಯಾ (45) ಭಾವನೇಶ್‌ ಅವರ ಪತ್ನಿ ಸವಿತಾ (48), ಮಕ್ಕಳಾದ ಮೀನು (23), ನಿಧಿ (25), ಧ್ರುವ್‌ (15), ಲಲಿತ್‌ ಅವರ ಪತ್ನಿ ಟೀನಾ (42), ಮಗ ಶಿವಂ (15), ಕಳೆದ ತಿಂಗಳು ನಿಶ್ಚಿತಾರ್ಥ ಆಗಿದ್ದ ಪ್ರತಿಭಾ ಅವರ ಪುತ್ರಿ ಪ್ರಿಯಾಂಕಾ (33) ಸೇರಿದ್ದಾರೆ. ಪತಿಯನ್ನು ಕಳೆದುಕೊಂಡಿದ್ದ ಪ್ರತಿಭಾ ಮಗಳೊಂದಿಗೆ ಅಣ್ಣಂದಿರ ಮನೆಯಲ್ಲಿ ನೆಲೆಸಿದ್ದರು.