ವಿಲ್ಲುಪುರ (ತಮಿಳುನಾಡು, ಪಿಟಿಐ): ಸಹೋದ್ಯೋಗಿಗೆ ಲೈಂಗಿಕ ಕಿರುಕುಳ ನೀಡಿದ್ದ ಪ್ರಕರಣದಲ್ಲಿ ಅಮಾನತುಗೊಂಡಿದ್ದ ಹಿರಿಯ ಐಪಿಎಸ್‌ ಅಧಿಕಾರಿ ರಾಜೇಶ್‌ ದಾಸ್‌ಗೆ, ಶುಕ್ರವಾರ ಇಲ್ಲಿನ ಪ್ರಧಾನ ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯ ಮೂರು ವರ್ಷ ಜೈಲು ಶಿಕ್ಷೆ ವಿಧಿಸಿ ಆದೇಶ ಹೊರಡಿಸಿದೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜಾಮೀನು ಮಂಜೂರು ಮಾಡಿರುವ ನ್ಯಾಯಾಲಯ, ಮೇಲ್ಮನವಿ ಸಲ್ಲಿಸಲು 30 ದಿನ ಅವಕಾಶ ನೀಡಿದೆ.
ರಾಜೇಶ್‌ ದಾಸ್‌ 2021ರಲ್ಲಿ ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ವಿಶೇಷ ಡಿಜಿಪಿ ಆಗಿದ್ದಾಗ, ಪೊಲೀಸ್ ವರಿಷ್ಠಾಧಿಕಾರಿಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ್ದ ದೂರು ದಾಖಲಾಗಿತ್ತು.
ಆರೋಪ ಕೇಳಿ ಬಂದ ತಕ್ಷಣವೇ ತಮಿಳುನಾಡು ಸರ್ಕಾರ ದಾಸ್‌ಗೆ ಹಿಂಬಡ್ತಿ ನೀಡಿ, ನಂತರ ಅಮಾನತುಗೊಳಿಸಿತ್ತು.
