ಸಿಸೋಡಿಯಾ ಕಸ್ಟಡಿ ಅವಧಿ 2 ದಿನ ವಿಸ್ತರಣೆ

ಸಿಸೋಡಿಯಾ ಅವರನ್ನು ಸೋಮವಾರ ನ್ಯಾಯಾಲಯದ ಎದುರು ಹಾಜರುಪಡಿಸುವಂತೆ ವಿಶೇಷ ನ್ಯಾಯಾಧೀಶ ಎಂ.ಕೆ. ನಾಗ್ಪಾಲ್‌ ಅವರು ಸಿಬಿಐಗೆ ಹೇಳಿದರು.

ನ್ಯಾಯಾಲಯವು ಸಿಸೋಡಿಯಾ ಅವರನ್ನು ಮೊದಲಿಗೆ ಮೂರು ದಿನಗಳ ಕಾಲ ಸಿಬಿಐ ವಶಕ್ಕೆ ನೀಡಿತ್ತು. ಬಂಧನದ ಅವಧಿಯನ್ನು ಮೂರು ದಿನಗಳ ಕಾಲ ಮುಂದೂಡುವಂತೆ ನ್ಯಾಯಾಲಯಕ್ಕೆ ಸಿಬಿಐ ಮನವಿ ಮಾಡಿತ್ತು. ಈ ಮನವಿಯನ್ನು ವಿರೋಧಿಸಿದ್ದ ಸಿಸೋಡಿಯಾ ಪರ ವಕೀಲರು, ‘ನಿಗದಿತ ಅವಧಿಯಲ್ಲಿ ವಿಚಾರಣೆ ನಡೆಸಲು ಸಿಬಿಐ ಅಸಮರ್ಥವಾದರೆ ಅದಕ್ಕಾಗಿ ಬಂಧನದ ಅವಧಿ ವಿಸ್ತರಿಸುವುದು ಅಸಮಂಜಸ’ ಎಂದು ಹೇಳಿದ್ದರು.

ಬಳಿಕ ನ್ಯಾಯಾಲಯವು ಕಸ್ಟಡಿ ಅವಧಿಯನ್ನು ಎರಡು ದಿನಗಳಿಗೆ ವಿಸ್ತರಿಸಿತು.

ಸಿಬಿಐ ತಮ್ಮನ್ನು ಗೌರವಪೂರ್ವಕವಾಗಿಯೇ ನಡೆಸಿಕೊಳ್ಳುತ್ತಿದೆ. ಆದರೆ, ಪುನರಾವರ್ತಿತವಾಗಿ ಕೇಳಲಾಗುತ್ತಿರುವ ಪ್ರಶ್ನೆಗಳಿಂದ ಮಾನಸಿಕ ಹಿಂಸೆ ಉಂಟಾಗುತ್ತಿದೆ ಎಂದು ಸಿಸೋಡಿಯಾ ಅವರು ನ್ಯಾಯಾಲಯಕ್ಕೆ ಹೇಳಿದ್ದರು.

ಈ ಕುರಿತು ಸಿಬಿಐಗೆ ನಿರ್ದೇಶನ ನೀಡಿದ ನ್ಯಾಯಾಲಯ, ಪುನರಾವರ್ತಿತವಾಗಿ ಪ್ರಶ್ನೆಗಳನ್ನು ಕೇಳದಂತೆ ಹೇಳಿತು.