ಬಾಂಬೆ ಐಐಟಿ ವಿದ್ಯಾರ್ಥಿ ಆತ್ಮಹತ್ಯೆ: ಸಮಗ್ರ ತನಿಖೆಗೆ ಅಠವಳೆ ಆಗ್ರಹ

ದರ್ಶನ್‌ ಸೋಲಂಕಿ (18) ಎಂಬುವವರು ಭಾನುವಾರ ಪೂವೈ ಕ್ಯಾಂಪಸ್‌ ಹಾಸ್ಟೆಲ್‌ ಕಟ್ಟಡದ ಏಳನೇ ಮಹಡಿಯಿಂದ ಜಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ.

ಈ ಕುರಿತು ಮಾಧ್ಯಮದವರೊಂದಿಗೆ ಮಾತನಾಡಿದ ಅಠವಳೆ, ‘ದರ್ಶನ್‌ ಅವರು ಜಾತಿ ತಾರತಮ್ಯ ಎದರಿಸುತ್ತಿದ್ದರು ಎಂಬ ಆರೋಪಗಳಿವೆ. ಈ ಆಯಾಮದಲ್ಲೂ ತನಿಖೆ ನಡೆಸುವಂತೆ ಅಧಿಕಾರಿಗಳಿಗೆ ನಾನು ಕೇಳಿಕೊಂಡಿದ್ದೇನೆ’ ಎಂದರು.

ಅಹಮದಾಬಾದ್‌ ನಿವಾಸಿಯಾಗಿದ್ದ ದರ್ಶನ್‌ ಅವರು ಪ್ರಥಮ ವರ್ಷದ ಬಿ.ಟೆಕ್‌ (ಕೆಮಿಕಲ್‌) ವ್ಯಾಸಂಗ ಮಾಡುತ್ತಿದ್ದರು. ಮಂಗಳವಾರದ ಈ ಸಾವಿನ ಕುರಿತು ಪ್ರತಿಕ್ರಿಯೆ ನೀಡಿದ್ದ ಬಾಂಬೆ ಐಐಟಿ, ಜಾತಿ ತಾರತಮ್ಯದ ಆರೋಪವನ್ನು ತಿರಸ್ಕರಿಸಿತ್ತು. ಅಲ್ಲದೇ, ದರ್ಶನ್‌ ಅವರ ಸ್ನೇಹಿತರಿಂದ ಮಾಹಿತಿ ಪಡೆದಿದ್ದು, ಅವರ ಹೇಳಿಕೆಯು ಯಾವುದೇ ತಾರತಮ್ಯವಿಲ್ಲ ಎಂದು ಸೂಚಿಸಿದೆ ಎಂದೂ ಐಐಟಿ ಹೇಳಿತ್ತು. ಆದ್ದರಿಂದ, ಆಂತರಿಕ ಹಾಗೂ ಪೊಲೀಸ್‌ ತನಿಖೆಗೆ ಕಾಯುವಂತೆ ಐಐಟಿ ವಿದ್ಯಾರ್ಥಿಗಳಿಗೆ ತಿಳಿಸಿತ್ತು.