‘ಫೇಸ್‌ಬುಕ್‌’ನಲ್ಲಿ ಬಿಡುಗಡೆಯಾದ ಬೊಳುವಾರರ ‘ಉಮ್ಮಾ’

ಇದು ಬೊಳುವಾರು ಮಹಮದ್‌ ಕುಂಞಿ ಅವರ ‘ಉಮ್ಮಾ’ ಕಾದಂಬರಿ ಸೋಮವಾರ ‘ಫೇಸ್‌ಬುಕ್‌’ನಲ್ಲಿ ಬಿಡುಗಡೆಯಾದ ರೀತಿ. ಅವರ ಹಿಂದಿನ ಕಾದಂಬರಿ ‘ಓದಿರಿ’ ಕೂಡ ಫೇಸ್‌ಬುಕ್‌ನಲ್ಲಿಯೇ ಬಿಡುಗಡೆಯಾಗಿತ್ತು.

‘ಓದಿರಿ’ ಕಾದಂಬರಿಯಲ್ಲಿ ಪ್ರವಾದಿ ಮುಹಮ್ಮದ್‌ರ ಜೀವನವನ್ನು ಕನ್ನಡಕ್ಕೆ ಪರಿಚಯಿಸಿದ್ದ ಬೊಳುವಾರರು ‘ಉಮ್ಮಾ’ದಲ್ಲಿ ಪ್ರವಾದಿಪತ್ನಿ ಆಯಿಷಾ ಅವರ ಬದುಕಿನ ಕಥೆ ಹೇಳಿದ್ದಾರೆ. ‘ಅರೇಬಿಯಾದ ಕೆಲವು ಗೌರವಾನ್ವಿತ ಮಹಿಳೆಯರ ಕಥೆಗಳಿಂದ ಪ್ರೇರಿತವಾದ ಕೃತಿ’ ಎನ್ನುವುದು ಕಾದಂಬರಿಯ ಬಗ್ಗೆ ಅವರ ಅನಿಸಿಕೆ.

ಸಾಂಪ್ರದಾಯಿಕ ಬಿಡುಗಡೆಗೆ ಬದಲಾಗಿ, ಫೇಸ್‌ಬುಕ್‌ನಲ್ಲಿ ಪುಸ್ತಕ ಬಿಡುಗಡೆ ಮಾಡುವುದರಿಂದ ವಿಶ್ವದ ವಿವಿಧ ಭಾಗಗಳಲ್ಲಿನ ಕನ್ನಡಿಗರಿಗೂ ಮಾಹಿತಿ ತಿಳಿಯುತ್ತದೆ ಎನ್ನುವ ಕಾರಣಕ್ಕಾಗಿ ಬೊಳುವಾರರು ತಮ್ಮ ಕೃತಿಗಳ ಅನಾವರಣಕ್ಕೆ ಸಾಮಾಜಿಕ ಜಾಲತಾಣ ಬಳಸಿಕೊಳ್ಳುತ್ತಿದ್ದಾರೆ. ಈಗಾಗಲೇ ಪುಸ್ತಕದ ಕೆಲವು ಭಾಗಗಳನ್ನು ಫೇಸ್‌ಬುಕ್‌ನಲ್ಲಿ ಪ್ರಕಟಿಸುವ ಮೂಲಕ ಓದುಗರ ಗಮನವನ್ನು ಸೆಳೆದಿದ್ದಾರೆ.

ಕಳೆದ ವಾರವೇ ‘ಉಮ್ಮಾ’ ಓದುಗರ ಕೈ ಸೇರಬೇಕಿತ್ತು. ಆದರೆ, ಕೊಡಗಿನಲ್ಲಿ ಉಂಟಾದ ಮಳೆ ಅನಾಹುತದ ಕಾರಣದಿಂದಾಗಿ ಒಂದು ವಾರ ತಡವಾಗಿ ಕಾದಂಬರಿ ಬಿಡುಗಡೆಯಾಗಿದೆ.

‘ಮುತ್ತುಪ್ಪಾಡಿ ಪುಸ್ತಕ’ದ ಮೂಲಕ ಪ್ರಕಟಗೊಳ್ಳುತ್ತಿರುವ ಈ ಕೃತಿ 320 ಪುಟಗಳನ್ನು ಹೊಂದಿದೆ. ಬೆಲೆ: ₹ 280.