ಕಾಲಕ್ಕೆ ತಕ್ಕಂತೆ ಇದೆ ಹೊಸ ವಿನ್ಯಾಸ

‘ಹೊಸ ವಿನ್ಯಾಸ ಓದುಗ ಸ್ನೇಹಿಯಾಗಿದೆ. ನಾನು ಹಿಂದೆಯೂ ಪ್ರಜಾವಾಣಿ ಓದುತ್ತಿದ್ದೆ. ಮುಂದೆಯೂ ಓದುತ್ತೇನೆ’ ಎಂದು ಕುಮಾರ್‌ ಎಂಬುವವರು ಪ್ರತಿಕ್ರಿಯಿಸಿದ್ದಾರೆ.

ಬಾಲ್ಯದಿಂದಲೂ ಪ್ರಜಾವಾಣಿ ಓದುವುದನ್ನು ರೂಢಿಸಿಕೊಂಡಿರುವ ಮೋಹನ್ ಪ್ರಸ್ತುತ ಅಮೆರಿಕದಲ್ಲಿ ನೆಲೆಸಿದ್ದಾರೆ. ‘ವೆಬ್‌ಸೈಟ್‌ನ ವಿನ್ಯಾಸ ಚೆನ್ನಾಗಿದೆ. ಅಂತರ್ಜಾಲದ ಸಾಧ್ಯತೆಗಳನ್ನು ಪೂರ್ಣಪ್ರಮಾಣದಲ್ಲಿ ಬಳಸಿಕೊಂಡು ನಿರ್ಭಿಡೆಯ ಪತ್ರಿಕೋದ್ಯಮವನ್ನು ಪ್ರಜಾವಾಣಿ ಮುಂದುವರಿಸಬೇಕು’ ಎಂದು ಅವರು ಸಲಹೆ ಮಾಡಿದ್ದಾರೆ.

‘ಹೊಸ ವಿನ್ಯಾಸ ಚೆನ್ನಾಗಿದೆ. ಇನ್ನಷ್ಟು ವಿಭಾಗಗಳು ಬೇಕಿತ್ತು’ ಎನ್ನುವುದು ಬೆಂಗಳೂರಿನ ವಕೀಲ ಕೆ.ಬಿ.ಕೆ.ಸ್ವಾಮಿ ಅವರ ಅಭಿಪ್ರಾಯ. ‘ಆರೋಗ್ಯ, ತಂತ್ರಜ್ಞಾನ, ಆಟೋಮೊಬೈಲ್, ಆಹಾರ ಕುರಿತಂತೆ ಪ್ರತ್ಯೇಕ ವಿಭಾಗಗಳನ್ನು ಮಾಡಿರುವುದು ಓದುಗರಿಗೆ ಅನುಕೂಲ ಮಾಡಿಕೊಟ್ಟಿದೆ. ಇದೇ ರೀತಿಕೋರ್ಟ್, ಕಾನೂನು, ಸಂವಿಧಾನಾತ್ಮಕ ವಿಷಯಗಳಿಗಾಗಿ ಪ್ರತ್ಯೇಕ ವಿಭಾಗವನ್ನು ಮಾಡಬೇಕಿತ್ತು’ ಎಂದು ಅವರು ಸಲಹೆ ನೀಡಿದ್ದಾರೆ.