ಕ್ರಾಮರಸ್ಕ್ (ಉಕ್ರೇನ್)/ಬ್ರಸೆಲ್ಸ್/ ಮಾಸ್ಕೊ: ರಷ್ಯಾ ಪಡೆಗಳು ಉಕ್ರೇನ್ ಮೇಲೆ ದಾಳಿ ತೀವ್ರಗೊಳಿಸಿದ್ದು, ಕಳೆದ 24 ತಾಸುಗಳಲ್ಲಿ ನಾಗರಿಕರನ್ನು ಗುರಿಯಾಗಿಸಿ ನಡೆಸಿರುವ ಶೆಲ್ ದಾಳಿಯಲ್ಲಿ 12 ಮಂದಿ ನಾಗರಿಕರು ಮೃತಪಟ್ಟಿದ್ದಾರೆ. ಹಲವಾರು ಮಂದಿ ಗಾಯಗೊಂಡಿದ್ದಾರೆ ಎಂದು ಉಕ್ರೇನ್ ಅಧಿಕಾರಿಗಳು ಬುಧವಾರ ತಿಳಿಸಿದ್ದಾರೆ.
‘ಬುಧವಾರ ಬೆಳಿಗ್ಗೆ ಅವ್ದಿವ್ಕಾ, ಸ್ಲೊವಿಯಾನ್ಸ್ಕ್, ಕ್ರಸ್ನೊರಿವ್ಕಾ ಮತ್ತು ಕುರಖೋವ್ದಲ್ಲಿ ನಡೆದ ದಾಳಿಗಳಲ್ಲಿ ಈ ಸಾವು, ನೋವು ಸಂಭವಿಸಿದೆ. ಪ್ರತಿಅಪರಾಧಕ್ಕೂ ರಷ್ಯಾ ಸೈನಿಕರನ್ನು ಶಿಕ್ಷಿಸುತ್ತೇವೆ’ ಎಂದು ಡೊನೆಟ್ಸ್ಕ್ ಗವರ್ನರ್ ಪಾವ್ಲೊ ಕಿರಿಲೆನ್ಕೊ ತಿಳಿಸಿದ್ದಾರೆ.
ಉಕ್ರೇನ್ನ ಎರಡನೇ ದೊಡ್ಡ ನಗರಹಾರ್ಕಿವ್ ಮೇಲೆ ತಡರಾತ್ರಿ ರಷ್ಯಾ ಪಡೆಗಳು ಕ್ಷಿಪಣಿ ದಾಳಿ ನಡೆಸಿವೆ. ವಿಶ್ವವಿದ್ಯಾಲಯದ ಆಡಳಿತ ಕಟ್ಟಡ ಧ್ವಂಸಗೊಂಡಿದೆ. ಮೂವರು ಗಾಯಗೊಂಡಿದ್ದಾರೆ ಎಂದು ಹಾರ್ಕಿವ್ ಗವರ್ನರ್ ಆಲೆಹ್ ಸಿನಿಹುವಾ ತಿಳಿಸಿದ್ದಾರೆ.