ಯಕ್ಷಗಾನ ಬೊಕ್ಕ ಜನಪದ ಸತ್ತ್ವ

ಯಕ್ಷಲೋಕದ ದೇವರಂಜನೆ ಯಕ್ಷಗಾನ, ಪುರಾಣಲೋಕೊನು ಕಾಲ್ಪನಿಕ ಆಯದೊಟ್ಟುಗು ರಂಗ್ದ ಕಲಕ್ಕ್ ಕನದಿನ ಮಲ್ಲ ಸಾಧನೆ ಯಕ್ಷಗಾನದವು. ಈ ಕಲೆ ದ್ರಾವಿಡ ಮೂಲದ ಪನ್ಪಿನೆಕ್ಕ್ ತುಳುನಾಡ್ದ ದೈವಾರಾಧನೆದ ಪ್ರಭಾವ ಯಕ್ಷಗಾನ ವೇಷೊಲೆಡ್ ಉಪ್ಪುನನೇ ನಂಕ್ ಸಾಕ್ಷಿ. ಮರನಿ ಮೂಡಬಿದ್ರೆಡ್ `ಯಕ್ಷದೇವ ಮಿತ್ರ ಕಲಾ ಮಂಡಳಿ ಬೆಳುವಾಯಿ ಮೊಕುಲು 20 ವರ್ಸದ `ವಿಂಶತಿ’ ಉಚ್ಚಯೊನು ಮಲ್ಪುನ ಪೊರ್ತುಡು ಯಕ್ಷ ಕೂಟೊಲೆಗ್ `ತುಳು ಯಕ್ಷಗಾನ ಪಂತ ಮಲ್ತೆರ್. ಆ ಪೊರ್ತುಡು ಅಯಿತ ಮುಗಿತಲದ ಲೇಸ್ಡ್ ಎಂಕ್ `ಯಕ್ಷಗಾನ ಬೊಕ್ಕ ಜನಪದ ಸತ್ವ ಪನ್ಪಿನ ಇಸಯೊಡು ಪಾತೆರ್ರೆ ಪಂಡೆರ್. ಅಲ್ಪ ಎನ್ನ ಅಭಿಪ್ರಾಯ ಎಂಚ ಬತ್ತ್ಂಡ್ ಪನ್ಪಿನನೇ ಇನಿತ್ತ ಗೇನದ ನಡೆ.

. 'ಮುಲ್ಪದ ತಲ ಬುದ್ಯಂತೆರ್ `ಯಕ್ಷಗಾನ ಕಲೆನ್ ಲೋಕೊಗು ಮೆಂಚಾದಿನ ಪಿಲಿಬಲಿಪನಕುಲು. ಈ ಕೂಡಾಟಿಕೆಡ್ ದಾದ ಪಾತೆರೊಲಿ ಪನ್ನಗ ಎಂಕ್ ನೆಂಪಾಪಿನಿ 50ವರ್ಸದ ಪಿರವು ಅಜ್ಜೆರೆ ಪುಗೆಲ್ಡ್ ಅಜ್ಜಿನ ಮಟ್ಟೆಲ್ಡ್ ಪೋದು ತೂತಿನ ತುಳು ಕನ್ನಡದ ಆಟೊಲು. `ಕೋಟಿಚೆನ್ನಯದ ಬೋಳಾರ ನಾರಾಯಣ ಶೆಟ್ರೆನ ಕೋಟಿ, ದಳವಾಯಿ ದುಗ್ಗಣ್ಣದ `ದುಗ್ಗಣ್ಣೆ’ ಪುರಾಣ ಪ್ರಸಂಗೊಲೆಡ್ ಕುಂಬಳೆ ಸುಂದರ ರಾಯೆರ್ನ ಕರ್ಣೆ, ಶೇಣಿದಾರೆನ ಕೃಷ್ಣೆ, ಬಪ್ಪಬ್ಯಾರಿ, ಕುಟ್ಯಪ್ಪಣ್ಣನ ಮೈಸಾಸುರೆ, ಮೀಜಾರ್ ಅಣ್ಣಪ್ಪೆರ್ನ ಪಯ್ಯ ಬೈದ್ಯೆ ಬಾವುಕೆ ಈ ಯೇಸೊಲು ಅಕುಲು ಇತ್ತ್ಂಡ ಮಾತ್ರ ಆ ಪ್ರಸಂಗೊಲೆನ್ ತೂವರೆ ಜನ ಮೇಲ್ಗ್ ಬೂರೊಂದಿತ್ತೆರ್. ಈ ಪಾತೆರ ಮುಲ್ಪ ದಾಯೆ ಪಂಡೆ ಪಂಡ ಕಲಾವಿದೆ ಬಿರ್ಸೆ ಆಂಡ ಮಾತ್ರ ಒವುವೇ ಒಂಜಿ ಕಲೆಕ್ಕ್ ಬಿಲೆ ಬರ್ಪುಂಡು. ಬೊಟ್ಟುಪದ ನಲಿಕೆದೊಟ್ಟುಗು ಬಾಸೆನ್ ಬಾಮ್ಯೊಂದು ಪೋಪಿನ ಕಲೆ ಯಕ್ಷಗಾನ.

. ಒಂಜಿ ಕಾಲೊಡು ಯಕ್ಷಗಾನ ಪನ್ನಗ ಪುರಾಣ ಕತೆಕ್ಕುಲು ಮಾತ್ರ ಪನ್ಪಿನ ನಮ್ಮ ಮನಸ್ಡಿತ್ತ್ಂಡ್. ಯಕ್ಷೆರ್ ದೇವಲೋಕೊಡು ಮನರಂಜನೆಗಾತ್ರ ಈ ಕತೆಕ್ಕುಲೆನ್ ಗೊಬ್ಬೊಂದಿತ್ತೆರ್. ಆ ಕತೆನ್ ಕುಂಬಳೆದ ಪಾರ್ತಿಸುಬ್ಬನಂಚಿನ ಕಡೀರ ಯಕ್ಷಗಾನ ಕರ್ತುಲು ಸುರು ಮಲ್ತೆರ್. ಕರ್ನಾಟಕೊಡು ಯಕ್ಷಗಾನ ಇತ್ತಿಲೆಕನೇ ತಮಿಳ್ನಾಡ್ಡ್ `ಎಕ್ಕಲಗಾನ’ ಪನ್ಪಿನ ಒಂಜಿ ನೃತ್ಯ ಪ್ರಕಾರ ಉಂಡು. ಪಂಡ ದ್ರಾವಿಡ ಮೂಲದ ಅರೆಧಾರ್ಮಿಕ ಸಾಂಸ್ಕೃತಿಕ ಪ್ರಕಾರ ಯಕ್ಷಗಾನ.

. ಯಕ್ಷಗಾನ ಪನ್ನಗ ಎಂಕ್ ತುಳುವೆರ್ನ `ಎಕ್ಕಮಲೆ’ ದೈ ನೆಂಪಾಪುಂಡು. ಎಕ್ಕಮಲೆ ಒಂಜಿ ಮಾಂತ್ರಿಕ ಶಕ್ತಿ ಇತ್ತಿನ ಗಿಡ. ಎಲ್ಯ ತೊಟ್ಟಿಲ ಬಾಲೆಲೆಗ್ ಎಕ್ಕಮಲೆತ್ತ ನಾರ್ ದೆತ್ತ್ದ್ ನೂಲು ಮಲ್ತ್ದ್ ಕೆಕ್ಕಿಲ್ಗ್ , ಸೊಂಟೊಗು ದುಂಬು ಪಾಡೊಂದಿತ್ತೆರ್. ಮಾಟ, ಮಂತ್ರ, ದೃಷ್ಟಿ, ಮುರಿಯ ದೋಷೊಲೆನ್ ದೂರ ಮಲ್ಪುನ ಮಾಂತ್ರಿಕ ಶಕ್ತಿ ಅಯಿಟ್ಟ್ ಉಂಡು. ನವರಸ ದಿಂಜಿದಿತ್ತಿನ ಈ ಕಲೆ ನರಮಾನ್ಯ ಮನಸ್ನ್ ಉಡಲ್ನ್ ಸುದ್ಧ ಮಲ್ಪರೆ ಆಯಗ್ ಬೌದ್ಧಿಕವಾಯಿನ ಮಾನಸಿಕವಾಯಿನ ಆರೋಗ್ಯೊನು ಕೊರ್ರೆ ಸಾಮರ್ಥ್ಯ ಇತ್ತಿನವು. ಅಂಚಾದೇ ಆನಿಡ್ದ್ ಇನಿಮುಟ್ಟಲಾ ಯೇತೋ ಸಾಂಸ್ಕೃತಿಕ ಸಂಕ್ರಾಂತಿ ಆಂಡಲಾ ಯಕ್ಷಗಾನದ ಜನಪ್ರಿಯತೆ ಕಡಮೆ ಆತ್ಜಿ.

. ಶ್ರೀಲಂಕೊಡು ಯಕ್ಷಪೂಜೆ ಪನ್ಪಿನ ಒಂಜಿ ಧಾರ್ಮಿಕ ವಿಧಿ ಉಂಡುಗೆ. ಆ ಪೂಜೆ ಮಲ್ತ್ಂಡ ದುಷ್ಟ ಶಕ್ತಿಲು ಕೈತಲ್ ಬರ್ಪುಜ ಆರೋಗ್ಯ ಭಾಗ್ಯ ತಿಕ್ಕುಂಡು ಪನ್ಪಿ ನಂಬೊಲಿಗೆಲು ಯಕ್ಷಗಾನದ ಸತ್ವ ಸತ್ಯೊಗು ಸಾಕ್ಷಿ ಆಪುಂಡು.

. ಇನಿ ನಮ್ಮ ದುಂಬು ಉಪ್ಪುನ ಪ್ರಶ್ನೆ ಕನ್ನಡ ಬಾಸೆಗೇ ಪತ್ದ್ ಪೋತಿನ ಯಕ್ಷಗಾನೊನು ತುಳುಟ್ಟು ಮನ ಮುಟ್ಟುಲೆಕ ಎಂಚ ಕನವೊಲಿ? ಈ ಪೊರ್ತುಡು ಎನ್ನ ದುಂಬು ಬರ್ಪಿನವು ಬಾಸೆದ ಶ್ರೀಮಂತಿಕೆ. ಕನ್ನಡದ ಯಕ್ಷಗಾನ ಕಲಾವಿದೆರ್ ಆನಿ ಎಚ್ಚ ವಿದ್ಯೆ ಕಲ್ದ್ಜೆರ್ಡಲಾ ಅಕುಲು ಪುರಾಣ ಲೋಕದ ಭಾಗವತ ಕತೆಕ್ಲೆನ್ ಅಭ್ಯಾಸ ಮಲ್ತ್ದ್ ಸಂಗೀತನೃತ್ಯ, ಭಾವ, ಬಾಸೆದ ಬಿರ್ಸೆರಾದ್ ಮೆಂಚಿಯೆರ್. ಅಂಚಾದ್ ಇನಿಕ್ಲಾ ನಮ್ಮ ತರೆಟ್ಟ್ ಉಪ್ಪುನ ದೇವೆರ್ನಕುಲು, ದೇವೆರ್ಕುಲು, ರಕ್ಕಸೆರ್ ಅವು ಬೇತೆ ಒಲ್ತಲಾ ಅತ್ತ್. ಅವು ಯಕ್ಷಗಾನ ಬಯಲಾಟದವು ಪನ್ಪಿನ ಲೋಕ ಸತ್ಯ.

. ಯಕ್ಷಗಾನ ಪನ್ಪಿನ ಬಜೀ ಮನರಂಜನಾ ಮಾಧ್ಯಮ ಅತ್ತ್. ಅವು ಮನೋ ಚಿಕಿತ್ಸೆದ ಸಾಧನ. ಮುಲ್ಪದ ಹಾಸ್ಯ ತೆಲಿಪಾವರೆಗಾದ್ ಮಾತ್ರ ಅತ್ತ್ ಅವು ಸಮಾಜ ಪರಿವರ್ತನೆದ ಪುರ್ಪ ಪಗರಿ ಪನ್ಪಿನ ಕಲಾವಿದನ ಮನಸ್ಡುಪ್ಪೊಡು. ಇನಿತ್ತ ತುಳು ಪ್ರಸಂಗೊಲು, ತುಳು ನಾಟಕೊಲು, ತುಳು ಸಿನೆಮೊಲು ತುಳು ಬಾಸೆನ್ ಬಜೀ ಸಸಾರ ಆದ್ ತೆಲಿಪೆರೆಗಾದೇ ಉಪ್ಪುನವು ಪನ್ಪಿಲೆಕ ತೋಜೋದುಂಡು. ತುಳು ಯಕ್ಷಗಾನ ಪ್ರಸಂಗೊಲು ಪಂಡ ಅವು ಜಾನಪದ ಸಂಸ್ಕೃತಿದ ಆಯ. ತುಳು ಜಾನಪದ ಸಂಸ್ಕೃತಿ ಪನ್ನಗ ನಮ್ಮ ದುಂಬು ಉಪ್ಪುನ ಆಚರಣಾ ಸಂಪ್ರದಾಯ ಬೊಕ್ಕ ಆರಾಧನಾ ಸಂಪ್ರದಾಯ. ಕನ್ನಡದ ಪುರಾಣ ಪ್ರಸಂಗೊಲೆನ ಒಟ್ಟುಗು ಗಟ್ಟಿಡ್ ಉಂತೊಡಾಂಡ ತುಳು ಪ್ರಸಂಗೊಲೆಗ್ ತುಳು ಬದ್ಕ್, ಸಂಸ್ಕೃತಿದ ಪಂಚಾಂಗ ಬೋಡು . ಕಲಾವಿದೆರೆಗ್ ಭಾಷೆದ ಅಧ್ಯಯನ ಬೋಡು. ತುಳುತ್ತ ಬಾಸೆದ ಶಕ್ತಿ ಓಲುಂಡು ಪನ್ಪಿನ ತೆರಿಯೊನೊಡು.

. ತುಳು ಸಂಸ್ಕೃತಿದ , ತುಳು ಬದ್ಕ್ದ ಮಲ್ಲ ಶಕ್ತಿ ಪಂಡ ಅವು ದೈವಾರಧನೆ . ಅಲ್ಪ ಭಾಸೆದ ಶಕ್ತಿ ಉಂಡು ಸಂಸ್ಕೃತಿದ ಸತ್ವ ಉಂಡು. ತುಳು ಬಂಧುತ್ವದ ಇತಿಹಾಸ ಉಂಡು ಉಂದೆನ್ ಯಕ್ಷಗಾನೊಗು ಕನಪಿನ ಎಡ್ಡೆ ಪ್ರಯತ್ನ ಆವೊಡಾತ್ಂಡ್. ಯಕ್ಷಗಾನೊಗು ದೈವೊಲೆನ್ ಕನವೊಲ್ಯ? ಪನ್ಪಿ ಪ್ರಶ್ನೆಲು, ವಿರೋಧೊಲು ನಮ್ಮ ನಡುಟ್ಟು ಬರೊಂದುಂಡು. ದೈವ ನಂಬಿಕೆ ಪನ್ಪಿನವು ನಮ್ಮ ತುಳುವೆರ್ನ ಹಕ್ಕ್. ಅವು ನಮ್ಮ ತಮೆರಿ. ಅವೆನ್ ಎಡ್ಡೆ ರೀತಿಡ್ ಅಳಿಯಂದಿಲೆಕ ನಮ್ಮ ದುಂಬುದ ತರೆಕ್ಕ್ ಕಡಪಾವೊಂದು ಪೋಪಿನ ನಮ್ಮ ಜಬದಾರಿ. ಉಂದು ಅಪಚಾರ ಆಪುಜಿ. ದೈವೊಲೆನ್ ಮನ ಮಾದಕ ಲೋಕದ (ಮಾರಿಬಲೆತ್ತ) ಸಾಮಾಜಿಕ ಜಾಲತಾಣದ ಉಲಯಿ ನಲಿಪಾವುನ ಬುಡ್ದು ಯಕ್ಷಗಾನೊಡು ತೋಜಾಂಡ ತಪ್ಪು ದಾದ? ದೈವೊಲೆನ್ ಬೀದಿಡ್ ನಲಿಪಾದ್ ಕಾಸ್ ಮಲ್ಪರೆ ಬಲ್ಲಿ . ಅವು ಅಪಚಾರ, ನಂಬಿಕೆಗ್ ದ್ರೋಹ. ಅಯಿತ್ತ ಬದ್ಲ್ಗ್ ನಮ್ಮ ತುಳುನಾಡ್ದ ಚರಿತ್ರೆನ್ ಲೋಕೊಗು ತೋಜಾವರೆ ಬೋಡಾದ್ ಯಕ್ಷಗಾನದಂಚಿನ ಬಲವಾಯಿನ ಮಾಧ್ಯಮೊಡು ದೈವೊಲು ಬರೊಡು. ದೇವೆರ್ನಕುಲು ಯಕ್ಷಗಾನ ರಂಗೊಡು ಬತ್ತ್ಂಡ ತಪ್ಪತ್ತ್ ದೈವೊಲು ಬತ್ತ್ಂಡ ಎಂಚ ತಪ್ಪು? ಎಂಚ ಅಪಚಾರ? ದೈವ ಸಂಸ್ಕೃತಿ ತುಳುವೆರ್ನ ಆಸ್ತಿ. ಅವೆನ್ ರಕ್ಷಣೆ ಮಲ್ಪುನಲಾ ನಮ್ಮನೇ ಬೇಲೆ. ದೇವಪೂಂಜೆ, ಕೋಟಿಚೆನ್ನಯೆ, ತುಳುನಾಡ ಸಿರಿ, ಕೋಡ್ದಬ್ಬು ಬಾರಗ ಕತೆಕ್ಲೆನ್ ಯಕ್ಷಗಾನ ರಂಗೊಗು ಕನನಗ ದೈವ ಬರಂದೆ ಆಪುಂಡಾ?

. ಇನಿತ್ತ ಅಮಸರದ ಲೋಕೊಡು ಕಲೆತ್ತ ದುನ್ನ ಕಮ್ಮಿ ಆವೊಂದುಂಡು. ಕಲಾವಿದಗ್ ಆಯೆ ಮಲ್ಪುನ ಯೇಸೊಡು ಭಕ್ತಿ ಬೋಡು. ದುಂಬುದ ಕಲಾವಿದೆರ್ ಚೌಕಿಡ್ ಯೇಸ ಪಾಡೊಂದು ಪುರಾಣ, ಭಾಗವತ ಓದೊಂದಿತ್ತೆರ್. ಚರ್ಚೆ ಮಲ್ತೊಂದಿತ್ತೆರ್. ಇನಿತ್ತಕುಲು ರಾಜಕೀಯ ಪಾತೆರುವೆರ್. ಕುಟ್ಯಪ್ಪುನಂಚಿನ ಬಣ್ಣದ ಯೇಸದಕುಲು ರಾತ್ರೆ 9 ಗಂಟೆಗ್ ಅರಿತ್ತ ಬಂದೊಡು ಚುಕ್ಕೆ ದೀವರೆ ಪತಿಯೆರ್ಡ ಯೆಸ ಮುಗೀದ್ ರಂಗಸ್ಥಳೊಕ್ಕು ಪೋನಗ ಒಂಜರೆ ಗಂಟೆ ರಾತ್ರೆ ಆವೊಂದಿತ್ತ್ಂಡ್. ಆಂಡ ಇನಿತ್ತಕುಲು 11 ಗಂಟೆ ಮುಟ್ಟ ಒಂಜಿ ಮೇಳೊಡು ಯೇಸ ಮಲ್ತ್ದ್ 12 ಗಂಟೆಗ್ ಕಾರ್ಡ್ ಬತ್ದ್ ಥರ್ಮಕೋಲ್ದ ಗಡ್ಡ ಪತ್ತಾದ್ ಒಂಜಿ ಗಂಟೆಗ್ ಮೈಸಾಸುರೆ ಆಪೆರ್. ಅಂಚಾದ್ ಪಾತ್ರದ ಪರಕಾಯ ಪ್ರವೇಶ ಆವಂದೆ ಯೇಸ ಸೋಪುಂಡು. ಉಂದೆನ್ ಮಾತ ಮನಸ್ಡ್ ದೀವೊಂದು ಇನಿ ತುಳುತ್ತ ಕಲಾವಿದೆರ್, ಪ್ರಸಂಗ ಕರ್ತುಲು ತುಳು ಯಕ್ಷಗಾನೊನು ಗೆಂದಾವರೆ ತೂವೊಡು. ಜಾನಪದ ಲೋಕದ ಉಲಯಿ ಪೊಗ್ಗೊಡು. ಯಕ್ಷಗಾನದ ಸತ್ವೊನು, ಸತ್ಯೊನು ಮೈ ದಿಂಜಾವೊಂದು ಯಕ್ಷಗಾನದ ಉಲಯಿ ಬಾಸೆದ ಒರುಟ್ಟು ಕನವರೆ ಪ್ರಯತ್ನ ಮಲ್ಪೊಡು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಯಕ್ಷಗಾನ ಬೊಕ್ಕ ಜನಪದ ಸತ್ತ್ವ

ಚಿನಕುರುಳಿ: 02 ಜುಲೈ 2025, ಬುಧವಾರ

ಮಂಡ್ಯ: ಡೆತ್‌ನೋಟ್‌ ಬರೆದಿಟ್ಟು ತಾಯಿ-ಮಗಳು ನೇಣಿಗೆ ಶರಣು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಚುರುಮುರಿ | ಗ್ರಾಮಾಭಿವೃದ್ಧಿ...

ವಿಂಡೀಸ್ ಕ್ರಿಕೆಟಿಗನ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ: ಕೋಚ್ ಸಾಮಿ ಹೇಳಿದ್ದೇನು?

ಎಫ್‌ಸಿ ಬೆಂಗಳೂರು ಯುನೈಟೆಡ್‌ ತಂಡದ ಮುಖ್ಯ ಕೋಚ್ ಆಗಿ ಮೋಹನ್‌ರಾಜ್ ಮರುನೇಮಕ

ಕೆನಡಾ ಓಪನ್‌: ಎರಡನೇ ಸುತ್ತಿಗೆ ಶ್ರೀಕಾಂತ್‌

ದೂರವಾದ ಪತ್ನಿ, ಮಗಳಿಗೆ ₹4 ಲಕ್ಷ ಪರಿಹಾರ ನೀಡಲು ಶಮಿಗೆ ಕೋಲ್ಕತ್ತ ಹೈಕೋರ್ಟ್ ಆದೇಶ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ: 02 ಜುಲೈ 2025, ಬುಧವಾರ

ಮಂಡ್ಯ: ಡೆತ್‌ನೋಟ್‌ ಬರೆದಿಟ್ಟು ತಾಯಿ-ಮಗಳು ನೇಣಿಗೆ ಶರಣು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಚುರುಮುರಿ | ಗ್ರಾಮಾಭಿವೃದ್ಧಿ...