T20 World Cup: ವೆಸ್ಟ್ ಇಂಡೀಸ್ ಮಣಿಸಿ ಸೆಮಿಫೈನಲ್‌ಗೆ ಲಗ್ಗೆ ಇಟ್ಟ ಭಾರತ

ಕೋಲ್ಕತ್ತ: ಅತ್ಯಗತ್ಯ ಸಂದರ್ಭದಲ್ಲಿ ಮರಳಿ ಅರಳಿದ ಸಂಜು ಸ್ಯಾಮ್ಸನ್ ಭರ್ಜರಿ ಬ್ಯಾಟಿಂಗ್ನಿಂದಾಗಿ ‘ಹಾಲಿ ಚಾಂಪಿಯನ್’ ಭಾರತ ತಂಡವು ಟಿ20 ವಿಶ್ವಕಪ್ ಟೂರ್ನಿಯ ಸೆಮಿಫೈನಲ್ಗೆ ಲಗ್ಗೆ ಇಟ್ಟಿತು.

ಈಡನ್ ಗಾರ್ಡನ್ನಲ್ಲಿ ತಮ್ಮ ವೃತ್ತಿಜೀವನದ ಅವಿಸ್ಮರಣೀಯ ಇನಿಂಗ್ಸ್ ಆಡಿದ ಕೇರಳದ ಸಂಜು (ಅಜೇಯ 97, 50ಎ, 4X12, 6X4) ನೆರವಿನಿಂದ 5 ವಿಕೆಟ್ಗಳಿಂದ ವೆಸ್ಟ್ ಇಂಡೀಸ್ ಎದುರು ಜಯಿಸಿತು.

196 ರನ್ಗಳ ಗೆಲುವಿನ ಗುರಿ ಬೆನ್ನಟ್ಟಿದ್ದ ಭಾರತ ತಂಡವನ್ನು ಆರಂಭಿಕ ಬ್ಯಾಟರ್ ಸಂಜು ಅವರು ಗೆಲುವಿನತ್ತ ಮುನ್ನಡೆಸಿದರು. ಅವರಿಗೆ ತಿಲಕ್ ವರ್ಮಾ (27 ರನ್) ಮತ್ತು ಹಾರ್ದಿಕ್ ಪಾಂಡ್ಯ (17 ರನ್) ಬೆಂಬಲ ನೀಡಿದರು. ಆತಿಥೇಯ ತಂಡವು 19.2 ಓವರ್ಗಳಲ್ಲಿ 5 ವಿಕೆಟ್ಗಳಿಗೆ 199 ರನ್ ಗಳಿಸಿತು.

ಇದೇ 5ರಂದು ಮುಂಬೈನಲ್ಲಿ ನಡೆಯಲಿರುವ ನಾಲ್ಕರ ಘಟ್ಟದ ಪಂದ್ಯದಲ್ಲಿ ಭಾರತವು ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ.

ಸೂಪರ್ 8ರ ಒಂದನೇ ಗುಂಪಿನಲ್ಲಿ ವೆಸ್ಟ್ ಇಂಡೀಸ್ ಮತ್ತು ಭಾರತ ತಂಡಗಳು ಈ ಪಂದ್ಯಕ್ಕೂ ಮುನ್ನ ತಲಾ 2 ಅಂಕ ಗಳಿಸಿದ್ದವು. ಸೆಮಿಫೈನಲ್ ಅವಕಾಶಕ್ಕಾಗಿ ಈ ಪಂದ್ಯದಲ್ಲಿ ಜಯಿಸುವುದು ಉಭಯ ತಂಡಗಳಿಗೆ ಮುಖ್ಯವಾಗಿತ್ತು. ಆದ್ದರಿಂದ ಎರಡೂ ತಂಡಗಳು ತೀವ್ರ ಹೋರಾಟ ನಡೆಸಿದವು.

. ವಿಂಡೀಸ್ ತಂಡದ ಬೌಲರ್ಗಳು ಅಭಿಷೇಕ್ ಶರ್ಮಾ, ಇಶಾನ್ ಕಿಶನ್ ಹಾಗೂ ಸೂರ್ಯಕುಮಾರ್ ಯಾದವ್ ಅವರನ್ನು ಬೇಗನೇ ಔಟ್ ಮಾಡಿದರು. ಆದರೆ ಸಂಜು ಮಾತ್ರ ದಿಟ್ಟವಾಗಿ ಬೌಲರ್ಗಳನ್ನು ಎದುರಿಸಿದರು. ಸತತ ವೈಫಲ್ಯದಿಂದ ಹೊರಬಂದರು. ತಂಡದ ಮ್ಯಾನೇಜ್ಮೆಂಟ್ ತಮ್ಮ ಮೇಲಿಟ್ಟ ವಿಶ್ವಾಸವನ್ನು ಉಳಿಸಿಕೊಂಡರು.

ಹೋಪ್–ಚೇಸ್ ಜೊತೆಯಾಟ: ಟಾಸ್ ಗೆದ್ದ ಭಾರತ ತಂಡವು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ನಾಯಕ ಶಾಯ್ ಹೋಪ್ ಮತ್ತು ರಾಸ್ಟನ್ ಚೇಸ್ ಅವರು ನೀಡಿದ ಉತ್ತಮ ಆರಂಭದ ಬಲದಿಂದ ವೆಸ್ಟ್ ಇಂಡೀಸ್ ತಂಡವು ಭಾರತಕ್ಕೆ ಕಠಿಣ ಗುರಿಯೊಡ್ಡಿತು.

ಚೇಸ್ (40 ರನ್) ಮತ್ತು ಹೋಪ್ (32 ರನ್) ಅವರು ಮೊದಲ ವಿಕೆಟ್ ಜೊತೆಯಾಟದಲ್ಲಿ 68 ರನ್ ಗಳಿಸಿದರು. ಈ ಅಡಿಪಾಯದ ಮೇಲೆ ಉಳಿದ ಬ್ಯಾಟರ್ಗಳು ಪುಟ್ಟ ಪುಟ್ಟ ಮೊತ್ತಗಳ ಕಾಣಿಕೆ ನೀಡಿದರು. ಅದರಿಂದಾಗಿ ವಿಂಡೀಸ್ ತಂಡವು 20 ಓವರ್ಗಳಲ್ಲಿ 4 ವಿಕೆಟ್ಗಳಿಗೆ 195 ರನ್ ಗಳಿಸಿತು.

ಸ್ಪಿನ್ನರ್ ವರುಣ್ ಚಕ್ರವರ್ತಿ ಹಾಕಿದ ಎಸೆತವನ್ನು ಅಂದಾಜಿಸುವಲ್ಲಿ ಎಡವಿದ ಹೋಪ್ ಕ್ಲೀನ್ಬೌಲ್ಡ್ ಆದರು. ಬೂಮ್ರಾ ಹಾಕಿದ್ದ ಐದನೇ ಓವರ್ನಲ್ಲಿ ಚೇಸ್ ನೀಡಿದ ಸುಲಭ ಕ್ಯಾಚನ್ನು ಫೀಲ್ಡರ್ ಅಭಿಷೇಕ್ ಶರ್ಮಾ ಕೈಚೆಲ್ಲಿದರು.

12ನೇ ಓವರ್ನಲ್ಲಿ ಜಸ್ಪ್ರೀತ್ ಬೂಮ್ರಾ (36ಕ್ಕೆ2) ಚೇಸ್ ಮತ್ತು ಶಿಮ್ರಾನ್ ಹೆಟ್ಮೆಯರ್ (27; 12ಎ, 4x1, 6x2) ಅವರಿಬ್ಬರಿಗೂ ಪೆವಿಲಿಯನ್ ದಾರಿ ತೋರಿಸಿದರು. ಹೆಟ್ಮೆಯರ್ ಅವರು ವಿಕೆಟ್ಕೀಪರ್ ಸಂಜುಗೆ ಕ್ಯಾಚ್ ಕೊಟ್ಟರು. ಚೇಸ್ ಅವರ ಕ್ಯಾಚ್ ಸೂರ್ಯ ಪಡೆದರು. ಈ ಹಂತದಲ್ಲಿ ತಂಡವು 3 ವಿಕೆಟ್ಗಳಿಗೆ 102 ರನ್ ಗಳಿಸಿತ್ತು.

ಶರ್ಫೇನ್ ರುದರ್ಫೋರ್ಡ್ (14; 9ಎ, 6X1) ಅವರು ಆಟಕ್ಕೆ ಕುದುರಿ ಕೊಳ್ಳುತ್ತಿರುವಾಗಲೇ ಹಾರ್ದಿಕ್ ಪಾಂಡ್ಯ ಬೌಲಿಂಗ್ನಲ್ಲಿ ಸಂಜುಗೆ ಕ್ಯಾಚಿತ್ತರು. 13ನೇ ಓವರ್ನಲ್ಲಿ ಅಕ್ಷರ್ ಪಟೇಲ್ ಎಸೆತವನ್ನು ಮೇಲಕ್ಕೆತ್ತಿದ ರುದರ್ಫೋರ್ಡ್ ಅವರ ಕ್ಯಾಚ್ ಪಡೆಯುವಲ್ಲಿ ತಿಲಕ್ ವರ್ಮಾ ಮಾಡಿದ ಪ್ರಯತ್ನಕ್ಕೆ ಫಲ ಸಿಗಲಿಲ್ಲ. ಆದರೆ 19ನೇ ಓವರ್ ಹಾಕಿದ ಅರ್ಷದೀಪ್ ಬೌಲಿಂಗ್ ನಲ್ಲಿ ಅಭಿಷೇಕ್ ಅವರು ಪೊವೆಲ್ ಕ್ಯಾಚ್ ಬಿಟ್ಟರು. ಇದರಿಂದಾಗಿ ಪೊವೆಲ್ ಅಂತಿಮ ಹಂತದಲ್ಲಿ ಬೀಸಾಟವಾಡಿದರು.

ಆಲ್ರೌಂಡರ್ ಜೋಡಿ ರೋವ್ಮನ್ ಪೊವೆಲ್ (ಔಟಾಗದೇ 34; 19ಎ, 4x3, 6x2) ಮತ್ತು ಜೇಸನ್ ಹೋಲ್ಡರ್ (ಔಟಾಗದೇ 37; 22ಎ, 4x2, 6x3) ಮುರಿಯದ ಐದನೇ ವಿಕೆಟ್ ಜೊತೆಯಾಟದಲ್ಲಿ 35 ಎಸೆತಗಳಲ್ಲಿ 76 ರನ್ ಸೇರಿಸಿದರು.

.Australia vs India: ಭರ್ಜರಿ ಶತಕ, ಗೆಲುವಿನೊಡನೆ ಹೀಲಿ ವಿದಾಯ.T20 WC | ಲಂಕಾ ವಿರುದ್ಧ ಗೆದ್ದರೂ ನಾಕೌಟ್ಗೇರದ ಪಾಕ್: ನ್ಯೂಜಿಲೆಂಡ್ ಸೆಮಿಗೆ. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.