25 ವರ್ಷಗಳ ಹಿಂದೆ | ಬುಧವಾರ 29/3/1995

ಇಂದು ಎರಡು ಬಾರಿ ಸೇರಿದ ಕೇಂದ್ರ ಸಚಿವ ಸಂಪುಟ ಶಿಫಾರಸಿನ ಮೇರೆಗೆ ರಾಷ್ಟ್ರಪತಿ ಡಾ. ಶಂಕರ ದಯಾಳ್‌ ಶರ್ಮಾ ಅವರು ಬಿಹಾರವನ್ನು ಕೇಂದ್ರದ ಆಡಳಿತಕ್ಕೆ ಒಳಪಡಿಸುವ ಆಜ್ಞೆಯನ್ನು ಜಾರಿ ಮಾಡಿದರು. ಮಾರ್ಚಿ 31ರೊಳಗೆ ರಾಜ್ಯದ ಆರ್ಥಿಕ ಹೊಣೆಗಾರಿಕೆಗಳನ್ನು ನಿರ್ವಹಿಸಲು ಲೇಖಾನುದಾನ ಪಡೆಯಲು ಸಂಸತ್ತಿಗೆ ಅನುವಾಗುವಂತೆ ಮಾಡಲು ರಾಷ್ಟ್ರಪತಿ ಆಡಳಿತ ಜಾರಿ ಅನಿವಾರ್ಯವಾಗಿತ್ತು. ಬಿಹಾರದಲ್ಲಿ ರಾಷ್ಟ್ರಪತಿ ಆಡಳಿತ ಜಾರಿಯಾಗುತ್ತಿರುವುದು ಇದು ಆರನೇ ಬಾರಿ.

ಖಾಸಗಿ ಬಸ್‌ ಮುಷ್ಕರ: ಪ್ರಯಾಣಿಕರಿಗೆ ತೊಂದರೆ
ಬೆಂಗಳೂರು, ಮಾರ್ಚಿ 28– ಪ್ರಸಕ್ತ ಬಜೆಟ್‌ನಲ್ಲಿ ತ್ರೈಮಾಸಿಕ ತೆರಿಗೆ ಹಾಗೂ ಬಿಡಿ ಭಾಗಗಳ ತೆರಿಗೆ ಹೆಚ್ಚಿಸಿರುವ ರಾಜ್ಯ ಸರ್ಕಾರದ ಕ್ರಮ ಪ್ರತಿಭಟಿಸಿ ಖಾಸಗಿ ಬಸ್‌ ಮಾಲೀಕರು ಇಂದಿನಿಂದ ಬಸ್‌ ಸಂಚಾರ ಸ್ಥಗಿತಗೊಳಿಸಿದ್ದರಿಂದ ಹಲವಾರು ಜಿಲ್ಲೆಗಳಲ್ಲಿ ಪ್ರಯಾಣಿಕರಿಗೆ ತೊಂದರೆಯಾಯಿತು.