ಚುರುಮುರಿ: ಶಾಂತಿ ಮತ್ತು ಸುಖ!

‘ಲೇ ತೆಪರ, ವಿಧಾನಸೌಧದ ಮೇಲೆ, ಸರ್ಕಾರದ ಕೆಲಸ ದೇವರ ಕೆಲಸ ಅಂತ ಬರೆಸಿದಾರಲ್ಲ, ಯಾಕಿರಬೋದು?’ ಹರಟೆಕಟ್ಟೆಯಲ್ಲಿ ಗುಡ್ಡೆ ಕೇಳಿದ.

. ‘ದೇವರ ಕೆಲ್ಸ ಅಲ್ವಾ? ತಟ್ಟೆಗೆ ಕಾಸು ಬೀಳದೆ ನಿಮ್ ಕೆಲ್ಸ ಆಗಲ್ಲ ಅಂತ ಹೇಳೋಕಿರಬೋದು...’ ತೆಪರೇಸಿ ನಕ್ಕ.

. ‘ಅದೇ ತರ ವಿಧಾನಸೌಧದ ಮೂರನೇ ಮಹಡಿಗೆ ಈಗ ಏನಂತ ಬರೆಸಬೋದು?’

. ‘ಸಿ.ಎಂ ಕುರ್ಚಿ ಖಾಲಿ ಇಲ್ಲ!’

. ‘ನಮ್ ಬಂಡೆ ಸಾಹೇಬ್ರ ಆಫೀಸಿಗೆ?’

. ‘ಇಲ್ಲಿ ನಟ್ಟು ಬೋಲ್ಟು ಟೈಟ್ ಮಾಡಲಾಗುವುದು!’

. ‘ಕರೆಕ್ಟ್, ನಮ್ ಸಿದ್ರಾಮಣ್ಣ ಸಾಹೇಬ್ರ ಆಫೀಸ್ ಮೇಲೆ ಏನಂತ ಬರೆಸಬೋದು?’ ಕೊಟ್ರೇಶಿ ಕೊಕ್ಕೆ.

. ‘ಹೊಡೀರಿ ಕಪಾಳಕ್ಕೆ...’

. ‘ಯಾರಿಗೆ, ನಂಗಾ?’

. ‘ಥೋ... ನಿಂಗಲ್ಲಲೆ, ಸಿದ್ರಾಮಣ್ಣ ಯಾವಾಗ್ಲು ಹಂಗೆ ಅಂತಿರ್ತಾರಲ್ಲ, ಅದ್ಕೆ ಹಂಗಂದೆ...’

. ‘ಲೇ ಗುಡ್ಡೆ, ನೀನೇಳಲೆ, ಹೋಂ ಮಿನಿಸ್ಟ್ರು ಆಫೀಸ್ ಮೇಲೆ ಏನ್ ಬರೆಸಬೋದು?’ ಮಂಜಮ್ಮ ಕೇಳಿದಳು.

. ‘ಗೊತ್ತಿಲ್ಲ...’

. ‘ಏನು? ಗೊತ್ತಿಲ್ವಾ?’

. ‘ಥೋ, ಹಂಗಲ್ಲ... ನಮ್ ಹೋಂ ಸಾಹೇಬ್ರು ಏನ್ ಕೇಳಿದ್ರೂ ಗೊತ್ತಿಲ್ಲ ಅಂತಿರ್ತಾರಲ್ಲ, ಅದ್ನೇ ಹೇಳಿದೆ ಮಂಜಮ್ಮ...’ ಗುಡ್ಡೆ ನಕ್ಕ.

. ‘ಸರಿ, ನಮ್ ಜಮೀರಣ್ಣನ ಆಫೀಸ್ ಮೇಲೆ?’

. ‘ಥು, ನಿನ್ ಜನ್ಮಕ್ಕೆ, ಹೋಗು...’

. ‘ಏಯ್, ಯಾಕೋ?’ ಮಂಜಮ್ಮಗೆ ಸಿಟ್ಟು ಬಂತು.

. ‘ಥೋತ್ತೇರಿ, ಅದು ಜಮೀರಣ್ಣಂಗೆ ಸಿಟ್ಟು ಬಂದಾಗ ಹಂಗೆ ಅಂತಿರ್ತಾರೆ ಮಂಜಮ್ಮ...’

. ‘ಆತು ಬಿಡ್ರಪ್ಪ, ನಮ್ ಬ್ರದರ್ ಕುಮಾರಣ್ಣನ ಆಫೀಸ್ ಮೇಲೆ ಏನ್ ಬರೆಸಬೋದು?’ ದುಬ್ಬೀರ ಕೇಳಿದ.

. ‘ಸೂಕ್ತ ಸಮಯ ಬಂದಾಗ ಎಲ್ಲ ಬಿಚ್ಚಿಡಲಾಗುವುದು...’

. ‘ಓಕೆ, ನಮ್ ರಾಗಾ ಆಫೀಸ್ ಮೇಲೆ?’

. ‘ಬಾಂಬುಗಳಿವೆ ಎಚ್ಚರಿಕೆ!’

. ‘ಟ್ರಂಪಣ್ಣನ ವೈಟ್ ಹೌಸ್ ಮೇಲೆ?’

. ‘ಶಾಂತಿ’ ಇಲ್ಲದೆ ಸುಖವಿಲ್ಲ...!’

. ‘ಶಾಂತಿನಾ? ಯಾರದು?’

. ‘ಅವಳಾ, ನಮ್ ತೆಪರೇಸಿ ಅಕ್ಕನ ಮಗಳು...!’ ಗುಡ್ಡೆ ಕೀಟಲೆಗೆ ಎಲ್ಲರೂ ಗೊಳ್ಳಂತ ನಕ್ಕರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.