‘ನೋಡ್ರಲೆ, ನಾನು ಹರ್ಬಲ್ ಹಾಲು ವ್ಯಾಪಾರ ಶುರು ಹಚ್ಕಳಣ ಅಂತಿದೀನಿ, ಹೆಂಗೆ?’ ಹರಟೆ ಕಟ್ಟೆಯಲ್ಲಿ ತೆಪರೇಸಿ ಎಲ್ಲರ ಸಲಹೆ ಕೇಳಿದ.
‘ಹರ್ಬಲ್ ಹಾಲಾ? ನಿಮ್ಮ ಟೂತ್ಪೇಸ್ಟಿನಲ್ಲಿ ಲವಂಗ ಇದೆಯೇ ಅನ್ನೋ ಥರ ನಿನ್ನ ಹರ್ಬಲ್ ಹಾಲಿನಲ್ಲಿ ತುಳಸಿ ಇರುತ್ತದೆಯೇ?’ ಗುಡ್ಡೆ ನಾಟಕೀಯವಾಗಿ ಕೇಳಿದ.
‘ನನ್ನ ಹಾಲಿನಲ್ಲಿ ತುಳಸಿ, ಪುದೀನಾ ಎಲ್ಲಾ ಇರುತ್ತೆ ಕಣ್ರಲೆ, ಕುಡಿದ್ರೆ ರೋಗನಿರೋಧಕ ಶಕ್ತಿ ಜಾಸ್ತಿ ಆಗುತ್ತೆ...’
‘ಹೌದಾ? ಆದ್ರೆ ಹಾಲಿಗೆ ತುಳಸಿ, ಪುದೀನಾ ಹಾಕಿದ್ರೆ ಹಾಲು ಕೆಡೋಲ್ವ?’ ದುಬ್ಬೀರನಿಗೆ ಗೊಂದಲ.
‘ನಿನ್ತೆಲಿ, ಅದನ್ನೆಲ್ಲ ಯಾರಾದ್ರು ಹಾಲಿಗೆ ಹಾಕ್ತಾರೇನಲೆ, ನಾನು ಹಸು ಸಾಕ್ತೀನಿ, ಅದಕ್ಕೆ ದಿನಾ ತುಳಸಿ, ಪುದೀನಾ, ಕೊತ್ತಂಬರಿ ತಿನ್ನಿಸ್ತೀನಿ, ಆ ಸೊಪ್ಪಿನ ಔಷಧದ ಅಂಶವೆಲ್ಲ ಹಾಲಿಗೆ ಸೇರಲ್ವ?’ ತೆಪರೇಸಿ ಬಿಡಿಸಿ ಹೇಳಿದ.
‘ಏನು? ಹಸು ಸಾಕ್ತೀಯ? ವೆರಿಗುಡ್... ತುಳಸಿ, ಪುದೀನಾ ಜತಿಗೆ ಹಂಗೇ ಅದಕ್ಕೆ ಶುಂಠಿ, ಲವಂಗ, ಮೆಣಸು ಎಲ್ಲ ತಿನ್ನಿಸಿಬಿಡು, ಹಾಲಿನ ಬದಲು ಡೈರೆಕ್ಟ್ ಕಷಾಯನೇ ಕರ್ಕಾಬಹುದು..’ ಗುಡ್ಡೆ ನಕ್ಕ.