ಯುಜಿಸಿ ರದ್ದು: ಉನ್ನತ ಶಿಕ್ಷಣ ಸ್ವಾಯತ್ತೆಗೆ ಧಕ್ಕೆಯಾಗದಿರಲಿ

7

ಯುಜಿಸಿ ರದ್ದು: ಉನ್ನತ ಶಿಕ್ಷಣ ಸ್ವಾಯತ್ತೆಗೆ ಧಕ್ಕೆಯಾಗದಿರಲಿ

Published:
Updated:

ವಿಶ್ವವಿದ್ಯಾಲಯ ಅನುದಾನ ಆಯೋಗ (ಯುಜಿಸಿ) ರದ್ದು ಮಾಡಿ ಹೊಸ ನಿಯಂತ್ರಕ ವ್ಯವಸ್ಥೆ ಜಾರಿಗೆ ತರುವ ಸಂಬಂಧದಲ್ಲಿ ನಿಯಮಾವಳಿಗಳಿರುವ ಹೊಸ ಮಸೂದೆಯ ಕರಡನ್ನು ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಬಿಡುಗಡೆ ಮಾಡಿದೆ. ಈ ಕುರಿತಾದ ಸಲಹೆಗಳನ್ನು ಜುಲೈ 7ರವರೆಗೆ ಆನ್‌ಲೈನ್‌ನಲ್ಲಿ ನೀಡಲು ಸಾರ್ವಜನಿಕರಿಗೆ ಕೋರಲಾಗಿದೆ. ಕರಡಿನಲ್ಲಿ ಪ್ರಸ್ತಾಪವಾಗಿರುವ ಅಂಶಗಳ ಪ್ರಕಾರ, ಯುಜಿಸಿ ಬದಲಿಗೆ ಭಾರತ ಉನ್ನತ ಶಿಕ್ಷಣ ಆಯೋಗ (ಎಚ್‍ಇಸಿಐ) ಅಸ್ತಿತ್ವಕ್ಕೆ ಬರಲಿದೆ. ಇದು ಶಿಕ್ಷಣ ಸಂಸ್ಥೆಗಳ ಗುಣಮಟ್ಟ ನಿಯಂತ್ರಣಕ್ಕೆ ಗಮನ ನೀಡಲಿದೆ. ನಿಯಮಗಳನ್ನು ಅನುಸರಿಸುವಂತೆ ಆದೇಶಿಸುವ ಮತ್ತು ಕಳಪೆ ಗುಣಮಟ್ಟದ ಹಾಗೂ ನಕಲಿ ಸಂಸ್ಥೆಗಳನ್ನು ಮುಚ್ಚಿಸುವ ಅಧಿಕಾರವನ್ನು ಎಚ್‍ಇಸಿಐಗೆ ನೀಡಲು ಉದ್ದೇಶಿಸಲಾಗಿದೆ. ವಿಶ್ವವಿದ್ಯಾಲಯಗಳು ಮತ್ತು ಕಾಲೇಜುಗಳು ನಿಯಮ ಮತ್ತು ನಿರ್ದೇಶನಗಳನ್ನು ಅನುಸರಿಸದೆ ಇದ್ದರೆ ದಂಡ ವಿಧಿಸುವ ಅಧಿಕಾರವೂ ಈ ಎಚ್‍ಇಸಿಐಗೆ ಇರಲಿದೆ. ದಂಡ ಕಟ್ಟದೇ ಇದ್ದರೆ ಅಂತಹ ಸಂಸ್ಥೆಗಳ ಮುಖ್ಯಸ್ಥರು ಮತ್ತು ಆಡಳಿತ ಮಂಡಳಿ ಸದಸ್ಯರ ವಿರುದ್ಧ ಅಪರಾಧ ಪ್ರಕ್ರಿಯಾ ಸಂಹಿತೆ (ಸಿಆರ್‌ಪಿಸಿ) ಅಡಿಯಲ್ಲಿ ಪ್ರಕರಣ ದಾಖಲಿಸುವ ಅವಕಾಶವನ್ನೂ ನೀಡಲಾಗಿದೆ. ರಾಜ್ಯ ಮತ್ತು ಕೇಂದ್ರದ ಶಾಸನಗಳ ಮೂಲಕ ಸ್ಥಾಪನೆಯಾದ ಎಲ್ಲಾ ವಿಶ್ವವಿದ್ಯಾಲಯಗಳು, ಡೀಮ್ಡ್‌ ವಿಶ್ವವಿದ್ಯಾಲಯದ ಸ್ಥಾನ ಹೊಂದಿರುವ ಸಂಸ್ಥೆಗಳಿಗೆ ಎಚ್‌ಇಸಿಐ ಅನ್ವಯ ಆಗಲಿದೆ. ಆದರೆ ಎಚ್‌ಇಸಿಐಗೆ ಅನುದಾನ ಹಂಚಿಕೆಯ ಅಧಿಕಾರ ಇರುವುದಿಲ್ಲ. ಹೊಸ ನಿಯಮಾವಳಿಗಳ ಪ್ರಕಾರ, ಅನುದಾನ ಹಂಚಿಕೆಯು ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯದ ವ್ಯಾಪ್ತಿಗೆ ಬರಲಿದೆ. ಈವರೆಗೂ ಅನುದಾನ ಅಥವಾ ಧನಸಹಾಯ ಹಂಚಿಕೆ ಅಧಿಕಾರ ಯುಜಿಸಿ ಬಳಿಯೇ ಇತ್ತು. ಆದರೆ ಈಗ, ಹಣಕಾಸು ವಿತರಣೆ ಅಧಿಕಾರವನ್ನು ಸಚಿವಾಲಯಕ್ಕೆ ನೀಡುವಂತಹ ಪ್ರಸ್ತಾವಕ್ಕೆ ಶೈಕ್ಷಣಿಕ ವಲಯದಲ್ಲಿ ಅಸಮಾಧಾನ ವ್ಯಕ್ತವಾಗಿದೆ. ಸರ್ಕಾರದ ನೇರ ಹಸ್ತಕ್ಷೇಪಕ್ಕೆ ಇದು ಅನುವು ಮಾಡಿಕೊಡಲಿದೆ ಎಂಬುದು ಶೈಕ್ಷಣಿಕ ವಲಯದ ತಜ್ಞರ ಅತಂಕ. ಈ ಆತಂಕವನ್ನು ಅಲ್ಲಗಳೆಯಲು ಸಾಧ್ಯವಿಲ್ಲ. ಹೀಗಾಗಿ ಈ ಕುರಿತಾದ ಸಂಶಯಗಳನ್ನು ಪರಿಹರಿಸಬೇಕಾದುದು ಅವಶ್ಯ.

ಉನ್ನತ ಶಿಕ್ಷಣದ ಗುಣಮಟ್ಟ ಹೆಚ್ಚಿಸುವುದು ಯುಜಿಸಿಯನ್ನು ರದ್ದುಪಡಿಸುವುದರ ಹಿಂದಿನ ಉದ್ದೇಶ ಎಂದು ಸರ್ಕಾರ ಹೇಳಿದೆ. ಯುಜಿಸಿಯನ್ನು ರದ್ದು ಪಡಿಸುವ ವಿಚಾರ ಅನೇಕ ವರ್ಷಗಳಿಂದ ಚರ್ಚೆಯಲ್ಲಿತ್ತು. ಏಕೆಂದರೆ, ಯುಜಿಸಿ ಅಸ್ತಿತ್ವಕ್ಕೆ ಬಂದದ್ದು 1956ರಲ್ಲಿ. ಆಗ ರಾಷ್ಟ್ರದಲ್ಲಿ ಇದ್ದದ್ದು ಕೇವಲ 20 ವಿಶ್ವವಿದ್ಯಾಲಯಗಳು ಹಾಗೂ 500 ಕಾಲೇಜುಗಳು. ಈಗ 864 ವಿಶ್ವವಿದ್ಯಾಲಯಗಳು ಹಾಗೂ 40,026 ಕಾಲೇಜುಗಳಿವೆ. ಇಂತಹ ಸಂದರ್ಭದಲ್ಲಿ ಹೊಸ ವಾಸ್ತವಗಳಿಗೆ ಸ್ಪಂದಿಸುವಂತಹ ವ್ಯವಸ್ಥೆ ಅಗತ್ಯ ಎಂಬುದರಲ್ಲಿ ಎರಡು ಮಾತಿಲ್ಲ. ಹಲವು ರಾಜ್ಯಗಳು ಖಾಸಗಿ ವಿಶ್ವವಿದ್ಯಾಲಯಗಳನ್ನೂ ಆರಂಭಿಸಿವೆ. ಆದರೆ ಉನ್ನತ ಶಿಕ್ಷಣಕ್ಕೆ ಅಗತ್ಯವಾದ ಮಾನದಂಡಗಳು ಇಲ್ಲಿ ಅನ್ವಯವಾಗುತ್ತಿಲ್ಲ ಎಂಬಂಥ ದೂರುಗಳೂ ಇವೆ. ‘ಇಂತಹ ವಿಚಾರಗಳನ್ನು ಯುಜಿಸಿ ಸಮರ್ಪಕವಾಗಿ ನಿರ್ವಹಿಸಿಲ್ಲ. ನಿಯಂತ್ರಣಕ್ಕಿಂತ ಅನುದಾನ ಹಂಚಿಕೆಯೇ ಯುಜಿಸಿಯ ಪ್ರಧಾನ ಕೆಲಸವಾಗಿಬಿಟ್ಟಿದೆ’ ಎಂಬುದು ಸರ್ಕಾರದ ತರ್ಕ. ಹೀಗಾಗಿ, ‘ಕನಿಷ್ಠ ಸರ್ಕಾರ ಹಾಗೂ ಗರಿಷ್ಠ ಆಡಳಿತ’ ಎಂಬ ತತ್ವದ ಮೇಲೆ ಈಗ ಈ ಪರಿವರ್ತನೆ ತರಲಾಗುತ್ತಿದೆ ಎಂಬುದು ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯದ ಪ್ರತಿಪಾದನೆ. ಅನುದಾನ ಹಂಚಿಕೆಯನ್ನು ಬೇರ್ಪಡಿಸುವುದರಿಂದ ಶೈಕ್ಷಣಿಕ ಗುಣಮಟ್ಟಕ್ಕೆ ಗಮನ ಕೇಂದ್ರೀಕರಿಸುವುದು ಎಚ್‍ಇಸಿಐಗೆ ಸಾಧ್ಯವಾಗಲಿದೆ ಎಂಬುದು ಸರ್ಕಾರದ ವಾದ. ಆದರೆ ಅನುದಾನ ಹಂಚಿಕೆಯ ವ್ಯವಸ್ಥೆ ಎಷ್ಟೇ ದೋಷಪೂರಿತ ಆಗಿದ್ದರೂ ರಾಜಕೀಯ ಪರಿಗಣನೆಗಳಿಂದ ಮುಕ್ತವಾಗಿತ್ತು ಎಂಬುದನ್ನು ಮರೆಯುವಂತಿಲ್ಲ. ಮಾನವ ಸಂಪನ್ಮೂಲ ಅಭಿವೃದ್ಧಿ ನಿರ್ಮಾಣಕ್ಕೆ ಗುಣಮಟ್ಟದ ಉನ್ನತ ಶಿಕ್ಷಣ ಅಗತ್ಯ. ಎಲ್ಲರನ್ನೂ ಒಳಗೊಳ್ಳುವ ಎಲ್ಲರಿಗೂ ಅವಕಾಶಗಳನ್ನು ಒದಗಿಸುವಂತಹ ಸ್ವಾಯತ್ತ ವ್ಯವಸ್ಥೆ ನಿರ್ಮಾಣವಾಗಬೇಕಾದುದು ಇಂದಿನ ಅಗತ್ಯ. ಹೀಗಾಗಿ ಉನ್ನತ ಶಿಕ್ಷಣದ ಸದ್ಯದ ಎಲ್ಲಾ ಸವಾಲುಗಳಿಗೂ ಸ್ಪಂದಿಸುವಂತಹ ವ್ಯವಸ್ಥೆ ನಿರ್ಮಾಣಕ್ಕೆ ಸರ್ಕಾರ ಈಗ ಪ್ರಕಟಿಸಿರುವ ಕರಡು ನಿಯಮಾವಳಿಗಳಿರುವ ಮಸೂದೆ ಬಗ್ಗೆ ವಿಸ್ತೃತ ಚರ್ಚೆ ನಡೆಯಬೇಕು.

ಬರಹ ಇಷ್ಟವಾಯಿತೆ?

  • 6

    Happy
  • 2

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !