ಸಂಪಾದಕೀಯ | ದಿಗ್ಬಂಧನ ವಿಸ್ತರಣೆ ಅವಧಿಯಲ್ಲಿ ಜೀವ, ಜೀವನದ ರಕ್ಷಣೆ ಆದ್ಯತೆಯಾಗಲಿ

ಅಗೋಚರ ಶತ್ರುವಿನ ವಿರುದ್ಧದ ಹೋರಾಟದಲ್ಲಿ ಅತಿ ಹೆಚ್ಚು ಮುನ್ನೆಚ್ಚರಿಕೆ ಅಗತ್ಯ. ಹಾಗಾಗಿ, ಲಾಕ್‌ಡೌನ್‌ ವಿಸ್ತರಣೆ ಮಾಡುವುದು ಸ್ವಾಗತಾರ್ಹ. ಮುಖ್ಯಮಂತ್ರಿಗಳ ಜತೆ ನಡೆಸಿದ ಸಂವಾದದಲ್ಲಿ ಪ್ರಧಾನಿ ಹೇಳಿದ ಮಾತಿನ ಆಂತರ್ಯವನ್ನು ತಳಮಟ್ಟದವರೆಗಿನ ಅಧಿಕಾರ ಸ್ಥಾನದಲ್ಲಿ ಇರುವವರು ಅರ್ಥ ಮಾಡಿಕೊಳ್ಳಬೇಕು. ಜನರ ಜೀವ ಮಾತ್ರವಲ್ಲ, ಅವರ ಜೀವನದ ಬಗ್ಗೆಯೂ ಗಮನ ಕೇಂದ್ರೀಕರಿಸಬೇಕಾಗಿದೆ ಎಂದು ಮೋದಿ ಹೇಳಿದ್ದಾರೆ. 130 ಕೋಟಿಗೂ ಹೆಚ್ಚು ಜನ ಇರುವ ದೇಶ ನಮ್ಮದು. ಇವರಲ್ಲಿ ಬಹುಪಾಲು ಮಂದಿ ದುಡಿಯುವವರು. ಆದರೆ, ವೈರಾಣುವೊಂದು ಬಂದು ದುಡಿಯುವ ಕೈಗಳನ್ನು ಕಟ್ಟಿಹಾಕಿದೆ. ಸಂಘಟಿತ ಮತ್ತು ಅಸಂಘಟಿತ ವಲಯದ ನೌಕರರು, ಅಂದಂದಿನ ಅನ್ನವನ್ನು ಅಂದೇ ಗಳಿಸುವವರು, ವ್ಯಾಪಾರಸ್ಥರು ಎಲ್ಲರೂ ಹೈರಾಣಾಗಿದ್ದಾರೆ. ಮೂರು ವಾರ ಎಲ್ಲವನ್ನೂ ಸ್ಥಗಿತಗೊಳಿಸಿ ಮನೆಯಲ್ಲಿ ಇರುವುದು ಇವರ್‍ಯಾರಿಗೂ ಸುಲಭವೇನಲ್ಲ. ಈಗ ನಮ್ಮಲ್ಲಿ ಕೊಯ್ಲಿನ ದಿನಗಳು. ಬೆಳೆದ ಬೆಳೆ ಹೊಲದಲ್ಲಿ ನಾಶವಾಗಿ ಹೋದರೆ ಅದನ್ನು ಭರಿಸುವ ಶಕ್ತಿ ರೈತನಿಗೆ ಖಂಡಿತ ಇಲ್ಲ. ದಿಗ್ಬಂಧನವನ್ನು ಇನ್ನೆರಡು ವಾರ ಮುಂದುವರಿಸಿದರೆ ಕೃಷಿ ಮತ್ತಿತರ ಚಟುವಟಿಕೆಗಳಿಗೆ ಹೊಡೆತ ಬೀಳದು ಎಂದು ಸರ್ಕಾರ ಹೇಳಿದೆ. ಆದರೆ, ತರಕಾರಿ ಬೆಳೆಯುವ ರೈತರಿಗೆ ಲಾಕ್‌ಡೌನ್‌ ಈಗಾಗಲೇ ದೊಡ್ಡ ಪೆಟ್ಟು ಕೊಟ್ಟಿದೆ. ಹಣ್ಣು, ತರಕಾರಿಗಳನ್ನು ಅವರು ಚರಂಡಿಗೆ ಸುರಿಯುವ ಸುದ್ದಿ, ಚಿತ್ರಗಳು ಪ್ರಕಟವಾಗಿವೆ. ಕೃಷಿ ಉತ್ಪನ್ನಗಳ ಸಾಗಾಟಕ್ಕೆ ‘ಹಸಿರು ಪಾಸ್‌’ ನೀಡುವುದಾಗಿ ಕರ್ನಾಟಕ ಸರ್ಕಾರ ಪ್ರಕಟಿಸಿತ್ತು. ಆದರೆ, ಅಂತಹ ಪಾಸ್‌ ಹೆಚ್ಚಿನವರಿಗೆ ಸಿಕ್ಕಿಲ್ಲ. ಹಾಗಾಗಿ, ಜನರ ಜೀವದ ಜತೆಗೆ ಜೀವನೋಪಾಯವನ್ನೂ ಉಳಿಸುವ ದಿಸೆಯಲ್ಲಿ ಅಧಿಕಾರ ಸ್ಥಾನದಲ್ಲಿ ಇರುವವರು ಯೋಚಿಸಬೇಕು. ಜನಪರ ಎಂದು ತೋರುವ ನಿರ್ಧಾರಗಳಷ್ಟೇ ಸಾಲದು, ಅದೇ ಕಾಳಜಿಯಲ್ಲಿ ಅವುಗಳ ಅನುಷ್ಠಾನವೂ ಆಗುವಂತೆ ನೋಡಿಕೊಳ್ಳಬೇಕು. ಜೀವಿಸುವುದಕ್ಕೆ ದಾರಿ ಇಲ್ಲದೆ ಬರೀ ಜೀವವಷ್ಟೇ ಉಳಿದರೆ ಅದು ಇನ್ನೊಂದು ದುರಂತಕ್ಕೆ ಕಾರಣವಾದೀತು. ಲಾಕ್‌ಡೌನ್‌ ಎಂಬುದು ಶಾಶ್ವತವಾದ ಪರಿಹಾರ ಅಲ್ಲ. ರೋಗವು ವಿಕೋಪಕ್ಕೆ ಹೋದರೆ, ಅದನ್ನು ನಿಭಾಯಿಸಲು ಬೇಕಾದ ಮೂಲಸೌಕರ್ಯ, ಔಷಧ, ಸಲಕರಣೆಗಳು ಮತ್ತು ಅರಿವನ್ನು ಹೊಂದಿಸಿಕೊಳ್ಳಲು ದೊರೆಯುವ ಸಮಯ. 586 ಆಸ್ಪತ್ರೆಗಳು, ಒಂದು ಲಕ್ಷಕ್ಕೂ ಹೆಚ್ಚು ಪ್ರತ್ಯೇಕಿಸಲಾದ ಹಾಸಿಗೆಗಳು, 11 ಸಾವಿರಕ್ಕೂ ಹೆಚ್ಚು ಐಸಿಯುಗಳನ್ನು ಸಜ್ಜುಗೊಳಿಸಲಾಗಿದೆ ಎಂದು ಕೇಂದ್ರ ಹೇಳಿದೆ. ರೋಗ ವಿಪರೀತಕ್ಕೆ ಹೋದರೆ ಇವು ಸಾಲವು ಎಂಬುದು ಬೇರೆ ದೇಶಗಳು ನಮಗೆ ಕಲಿಸಿರುವ ಪಾಠ. ವೈದ್ಯಕೀಯ ಸಿಬ್ಬಂದಿಗೆ ಸೋಂಕು ತಗಲಿದ ಹಲವು ವರದಿಗಳು ಬಂದಿವೆ. ವೈದ್ಯರು, ನರ್ಸ್‌ಗಳನ್ನು ರಕ್ಷಿಸಿಕೊಳ್ಳಲು ಬೇಕಾದ ಸುರಕ್ಷಾ ಸಾಧನಗಳ ಕೊರತೆ ಇದೆ ಎಂದು ಹೇಳಲಾಗುತ್ತಿದೆ. ಈ ದಿಸೆಯಲ್ಲಿ ಗಮನ ಹರಿಸಬೇಕಾಗಿರುವುದು ತಮ್ಮ ಹೊಣೆ ಎಂಬುದನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಮರೆಯಬಾರದು.