ಸಂಪಾದಕೀಯ| ಸಲಿಂಗ ವಿವಾಹ: ವಿಚಾರಣೆಗೆ ಕೈಗೆತ್ತಿಕೊಂಡ ನಡೆ ಸ್ವಾಗತಾರ್ಹ

ಕೇಂದ್ರ ಸರ್ಕಾರವು ಸಲಿಂಗ ವಿವಾಹವನ್ನು ಈ ಹಿಂದೆ ವಿರೋಧಿಸಿದೆ. ‘ಭಾರತದಲ್ಲಿ ವಿವಾಹವು ಹಿಂದಿನಿಂದಲೂ ಬಂದಿರುವ ಸಂಪ್ರದಾಯಗಳು, ಆಚರಣೆಗಳು, ವಿಧಿಗಳು, ಸಾಂಸ್ಕೃತಿಕ ಮೌಲ್ಯಗಳು ಮತ್ತು ಸಾಮಾಜಿಕ ಮೌಲ್ಯಗಳ ಮೇಲೆ ನಿಂತಿರುತ್ತದೆ’ ಎಂದು ಸರ್ಕಾರ ಹೇಳಿತ್ತು. ಸಲಿಂಗ ವಿವಾಹವನ್ನು ಕಾನೂನಿನ ಅಡಿಯಲ್ಲಿ ಮಾನ್ಯ ಮಾಡುವ ರೀತಿಯಲ್ಲಿ ಯಾವ ಮೂಲಭೂತ ಹಕ್ಕಿನ ವ್ಯಾಪ್ತಿಯನ್ನೂ ವಿಸ್ತರಿ ಸಲು ಆಗದು ಎಂದು ಅದು ಹೇಳಿತ್ತು. ಆದರೆ, ಸಮಾಜದ ವರ್ತನೆಗಳು ಹಾಗೂ ಸಮಾಜದ ಬಯಕೆಗಳನ್ನು ಮುಂದಿಟ್ಟುಕೊಂಡು, ದೇಶದ ಇತರ ಯಾವುದೇ ಪ್ರಜೆಗೆ ಸಮನಾಗಿರುವ ಒಂದು ನಿರ್ದಿಷ್ಟ ವರ್ಗದವರ ವಿರುದ್ಧದ ತಾರತಮ್ಯವನ್ನು ಸಮರ್ಥಿಸಿಕೊಳ್ಳಲು ಆಗದು. ಅರ್ಜಿದಾರರ ಪರವಾಗಿ ಕೆಲವು ಮಹತ್ವದ ಅಂಶಗಳನ್ನು ನ್ಯಾಯಾಲಯದ ಮುಂದೆ ಇರಿಸಲಾಗಿದೆ. ಅಂತರ್ಜಾತಿ ಹಾಗೂ ಅಂತರ್‌ಧರ್ಮ ವಿವಾಹಿತರು ಸಮಾಜದಲ್ಲಿ ಹಲವು ಸಂದರ್ಭಗಳಲ್ಲಿ ಈಗಲೂ ವಿರೋಧ ಎದುರಿಸುತ್ತಾರೆ. ಅವರಿಗೆ ಕಾನೂನಿನ ಅಡಿಯಲ್ಲಿ ಇರುವಂತಹ ರಕ್ಷಣೆಯನ್ನೇ ತಮಗೂ ನೀಡಬೇಕು ಎಂದು ಸಲಿಂಗ ವಿವಾಹಕ್ಕೆ ಮಾನ್ಯತೆ ಕೋರಿ ಅರ್ಜಿ ಸಲ್ಲಿಸಿರುವವರು ಕೋರ್ಟ್‌ ಮುಂದೆ ಮನವಿ ಮಾಡಿದ್ದಾರೆ. ತಮ್ಮ ಬೇಡಿಕೆ ಇರುವುದು 1954ರ ಕಾಯ್ದೆಯನ್ನು ಲಿಂಗ ನಿರಪೇಕ್ಷ ಆಗಿಸಬೇಕು ಎಂಬುದಷ್ಟೇ ಎಂದು ಅವರು ಕೋರ್ಟ್‌ ಮುಂದೆ ವಿವರಣೆ ನೀಡಿದ್ದಾರೆ.

2018ರಲ್ಲಿ ಸುಪ್ರೀಂ ಕೋರ್ಟ್‌ ಸಲಿಂಗಕಾಮದ ವಿಚಾರವಾಗಿ ನೀಡಿದ ತೀರ್ಪು, ಸಮಾಜದ ಧೋರಣೆಯನ್ನು ಬದಲಾಯಿಸುವಲ್ಲಿ ಹಾಗೂ ಸಮಾನತೆಯ ಸಂದೇಶವನ್ನು ಹರಡುವಲ್ಲಿ ನೆರವಾಗಿದೆ. ಲೈಂಗಿಕ ಅಲ್ಪಸಂಖ್ಯಾತ ಸಮುದಾಯಕ್ಕೆ ಸೇರಿದವರು, ಘನತೆಯಿಂದ ಬದುಕುವ ಹಕ್ಕು ತಮಗೂ ಇದೆ ಎಂಬುದನ್ನು ಸ್ಪಷ್ಟವಾಗಿ ಹೇಳಲು ಇದು ನೆರವಾಗಿದೆ. ಲೈಂಗಿಕ ಅಲ್ಪಸಂಖ್ಯಾತರ ವಿವಾಹದ ಹಕ್ಕು ಗಳನ್ನು ನ್ಯಾಯಾಲಯಗಳು ಗುರುತಿಸಿವೆ. ಅವರ ಹಕ್ಕುಗಳನ್ನು ರಕ್ಷಿಸುವಂತೆ ಪಾಲಕರಿಗೆ, ನಾಗರಿಕ ಸಮುದಾಯದ ಸಂಸ್ಥೆಗಳಿಗೆ, ಪೊಲೀಸರಿಗೆ ಸೂಚನೆ ನೀಡಿವೆ. ಸಾಮಾಜಿಕ ಬದಲಾವಣೆಗಳು ಆಗುವು ದಕ್ಕೆ ಸಮಯ ಬೇಕು. ಆದರೆ, ಸುಪ್ರೀಂ ಕೋರ್ಟ್‌ ತನ್ನ ಪ್ರಗತಿಪರ ತೀರ್ಪುಗಳ ಮೂಲಕ ಅಂತಹ ಬದಲಾವಣೆಗಳಿಗೆ ವೇಗ ನೀಡಿದೆ. ಮಕ್ಕಳನ್ನು ದತ್ತು ತೆಗೆದುಕೊಳ್ಳುವ ಹಕ್ಕು ಸೇರಿದಂತೆ ಹಲವು ಹಕ್ಕುಗಳು ಮತ್ತು ಸೌಲಭ್ಯಗಳಿಗೂ ಮದುವೆಯ ವಿಚಾರವಾಗಿ ಕಾನೂನಿನ ಮೂಲಕ ಸಿಗುವ ಹಕ್ಕಿಗೂ ಸಂಬಂಧ ಇದೆ. 2018ರಲ್ಲಿ, ಸಲಿಂಗಕಾಮವನ್ನು ಅಪರಾಧವಲ್ಲ ಎಂದು ಸಾರಿದ ನ್ಯಾಯಪೀಠದಲ್ಲಿ ಈಗ ಸಿಜೆಐ ಆಗಿರುವ ಚಂದ್ರಚೂಡ್ ಅವರೂ ಇದ್ದರು. ಸಲಿಂಗಕಾಮವು ಅಪರಾಧ ಅಲ್ಲ ಎಂದಷ್ಟೇ ಹೇಳಿ ಸಮಾನತೆ ಸಾಧಿಸಲು ಆಗದು, ಸಮಾನತೆಯು ಮನೆ, ಕೆಲಸದ ಸ್ಥಳ ಸೇರಿದಂತೆ ಬದುಕಿನ ಎಲ್ಲ ವಲಯಗಳಿಗೂ ವಿಸ್ತರಿಸಬೇಕು ಎಂದು ಅವರು ಹೇಳಿದ್ದರು. ಅವರ ಮಾತುಗಳ ಹಿಂದಿನ ಚಿಂತನೆ ಬಹಳ ಸ್ಪಷ್ಟವಾದ ಸಂದೇಶವನ್ನು ನೀಡುತ್ತದೆ.