ಚಿತ್ರಮಂದಿರದಲ್ಲಿ ಮಾರ್ಗಸೂಚಿ ಪಾಲನೆ ಉದ್ಯಮದ ಹೊಣೆಗಾರಿಕೆ ಹೆಚ್ಚು

ಚಿತ್ರಮಂದಿರಗಳಲ್ಲಿ ಶೇ 100ರಷ್ಟು ಆಸನ ಭರ್ತಿಗೆ ಅವಕಾಶ ದೊರೆತಿರುವುದನ್ನು ಸ್ವಾಗತಿಸಿರುವ ಚಿತ್ರರಂಗವು ತನ್ನ ಬೇಡಿಕೆ ಈಡೇರಿರುವುದನ್ನು ಸಂಭ್ರಮವೆಂದು ತಿಳಿಯದೆ ಜವಾಬ್ದಾರಿಯೆಂದು ಭಾವಿಸಬೇಕಾಗಿದೆ. ಆಸನ ಭರ್ತಿಗೆ ಸಂಬಂಧಿಸಿದಂತೆ ಸರ್ಕಾರದ ನಿರ್ಬಂಧ ತೆರವುಗೊಳ್ಳುವ ಮೂಲಕ ಚಿತ್ರೋದ್ಯಮದ ಮೇಲಿನ ಹೊಣೆಗಾರಿಕೆ ಹೆಚ್ಚಾಗಿದೆ. ತಾರಾ ವರ್ಚಸ್ಸಿನ ಜನಪ್ರಿಯ ನಟರ ಸಿನಿಮಾಗಳು ಮಾರ್ಚ್‌ ತಿಂಗಳಲ್ಲಿ ತೆರೆಕಾಣಲು ಸಿದ್ಧತೆ ನಡೆಸಿದ್ದು, ಆ ಚಿತ್ರಗಳು ಪ್ರೇಕ್ಷಕರನ್ನು ದೊಡ್ಡ ಸಂಖ್ಯೆಯಲ್ಲಿ ಆಕರ್ಷಿಸುವ ನಿರೀಕ್ಷೆಯಿದೆ. ಕೊರೊನಾ ಸೋಂಕು ಇನ್ನೂ ಸಕ್ರಿಯವಾಗಿರುವ ಸಂದರ್ಭದಲ್ಲಿ, ಜನಸಮೂಹವನ್ನು ಸಮರ್ಪಕವಾಗಿ ನಿಯಂತ್ರಿಸುವ ಸವಾಲನ್ನು ಚಿತ್ರಮಂದಿರಗಳು ಹಾಗೂ ಚಿತ್ರೋದ್ಯಮ ಸಮರ್ಥವಾಗಿ ನಿಭಾಯಿಸಬೇಕಾಗಿದೆ. ಸಾರ್ವಜನಿಕ ಸಾರಿಗೆ, ಪ್ರವಾಸಿ ಸ್ಥಳ, ಮಾರುಕಟ್ಟೆಗಳಲ್ಲಿ ಜನಜಂಗುಳಿ ತುಂಬಿರುವಾಗ ಚಿತ್ರಮಂದಿರಗಳಿಗೆ ಮಾತ್ರ ನಿರ್ಬಂಧವೇಕೆ ಎಂದು ಸರ್ಕಾರವನ್ನು ಪ್ರಶ್ನಿಸಿದ್ದ ಸಿನಿಮಾ ನಟರು, ಈಗ ತಮ್ಮ ಸಿನಿಮಾಗಳಿಗೆ ಮುಗಿಬೀಳಬಹುದಾದ ಅಭಿಮಾನಿಗಳನ್ನು ನಿಯಂತ್ರಿಸಬೇಕಾದ ನೈತಿಕ ಜವಾಬ್ದಾರಿಯನ್ನು
ಪ್ರದರ್ಶಿಸಬೇಕಾಗಿದೆ. ಚಿತ್ರಮಂದಿರಗಳಲ್ಲಿ ಶೇ 50ರಷ್ಟು ಪ್ರೇಕ್ಷಕರಿಗೆ ಮಾತ್ರ ಅವಕಾಶ ಕಲ್ಪಿಸಿದ್ದ ಕ್ರಮದಿಂದ ಕೆಲವು ಸಿನಿಮಾಗಳಿಗೆ ತೊಂದರೆಯೇನೂ ಆಗಿರಲಿಲ್ಲ. ಏಕೆಂದರೆ, ತಾರಾ ವರ್ಚಸ್ಸಿನ ನಟರ ಸಿನಿಮಾಗಳ ಹೊರತು ಉಳಿದ ಸಂದರ್ಭಗಳಲ್ಲಿ ಚಿತ್ರಮಂದಿರಗಳು ತುಂಬುವುದು ವಿರಳ. ‘ಹೌಸ್‌ಫುಲ್‌ ಪ್ರದರ್ಶನ’ಗಳ ಹೆಚ್ಚಿನ ಅಗತ್ಯವಿರುವುದು ದೊಡ್ಡ ಬಜೆಟ್‌ನ ಸಿನಿಮಾಗಳ ನಿರ್ಮಾಪಕರು ಮತ್ತು ಕಲಾವಿದರಿಗೆ. ಹಾಗಾಗಿ ಸಿನಿಮಾ ಪ್ರದರ್ಶನ ಸಂದರ್ಭದಲ್ಲಿ ಕೋವಿಡ್‌ ಮಾರ್ಗಸೂಚಿ ಚಾಚೂ ತಪ್ಪದಂತೆ ನೋಡಿಕೊಳ್ಳುವಲ್ಲಿ ಅವರ ಜವಾಬ್ದಾರಿ ಹೆಚ್ಚು. ಗಾಳಿಬೆಳಕಿಗೆ ತೆರೆದುಕೊಂಡಿರುವ ಇತರೆ ಸಾರ್ವಜನಿಕ ಸ್ಥಳಗಳಿಗಿಂತಲೂ ಸುಮಾರು ಮೂರು ತಾಸುಗಳ ಕಾಲ ಹವಾನಿಯಂತ್ರಿತ ವಾತಾವರಣದಲ್ಲಿ ಸಿನಿಮಾ ಪ್ರದರ್ಶಿಸುವ ಚಿತ್ರಮಂದಿರಗಳು ಭಿನ್ನವಾಗಿ ನಿಲ್ಲುತ್ತವೆ.ಕೋವಿಡ್‌ಗೆ ಸಂಬಂಧಿಸಿದಂತೆ ಸರ್ಕಾರದ ಮಾರ್ಗಸೂಚಿಯನ್ನು ಯಾವುದೇ ಲೋಪಕ್ಕೆ ಅವಕಾಶವಿಲ್ಲದೆಚಿತ್ರಮಂದಿರಗಳಲ್ಲಿ ಜಾರಿಗೆ ತರಬೇಕಾಗಿದೆ. ಕೊರೊನಾಗೆ ಮುನ್ನ ಕೂಡ ಚಿತ್ರಮಂದಿರಗಳಲ್ಲಿನ ಸ್ವಚ್ಛತೆ–ಅವ್ಯವಸ್ಥೆಯ ಬಗ್ಗೆ ದೂರುಗಳಿದ್ದವು. ಅಂಥ ನಿರ್ಲಕ್ಷ್ಯಕ್ಕೆ ಈಗ ಅವಕಾಶವಿಲ್ಲ. ಶೇ 100ರಷ್ಟು ಆಸನಗಳ ಭರ್ತಿಗೆ ನೀಡಿರುವ ಅನುಮತಿ ಸದ್ಯಕ್ಕೆ ನಾಲ್ಕು ವಾರಗಳವರೆಗೆ ಮಾತ್ರ ಜಾರಿಯಲ್ಲಿರಲಿದೆ. ಆ ಅವಕಾಶ ಮುಂದುವರಿಯುವಂತೆ ನೋಡಿಕೊಳ್ಳುವುದು ಚಿತ್ರೋದ್ಯಮದ ಕೈಯಲ್ಲೇ ಇದೆ.