ಆಹಾರಧಾನ್ಯಗಳ ಕೊಳೆಯುವಿಕೆ ವ್ಯವಸ್ಥೆಯ ವೈಫಲ್ಯದ ದ್ಯೋತಕ

ಆಹಾರಧಾನ್ಯಗಳು ಮಣ್ಣುಪಾಲಾಗುವುದನ್ನು ನೋಡಿದರೆ, ಗೋದಾಮುಗಳಲ್ಲಿನ ಧಾನ್ಯಗಳನ್ನು ಇಲಿ–ಹೆಗ್ಗಣಗಳು ತಿನ್ನಲಾದರೂ ಬಿಟ್ಟೇವು, ಜನರಿಗೆ ವಿತರಿಸುವುದಿಲ್ಲ ಎನ್ನುವ ಮನೋಭಾವವನ್ನು ಅಧಿಕಾರಿವರ್ಗ ರೂಢಿಸಿಕೊಂಡಂತಿದೆ. ಕೊರೊನಾ ನಿಯಂತ್ರಣಕ್ಕಾಗಿ ದೇಶದಲ್ಲಿ ಲಾಕ್‌ಡೌನ್‌ ಜಾರಿಗೊಳಿಸಿದಾಗ, ಲಕ್ಷಾಂತರ ವಲಸೆ ಕಾರ್ಮಿಕರು ಹಸಿವಿನಿಂದ ಒದ್ದಾಡುತ್ತಿದ್ದ ವರದಿಗಳು ಮಾಧ್ಯಮ
ಗಳಲ್ಲಿ ಪ್ರಕಟವಾಗಿದ್ದವು. ಅದೇ ಸಮಯದಲ್ಲಿ, ಸುಮಾರು 8 ಕೋಟಿ ಟನ್‌ ಆಹಾರಧಾನ್ಯಗಳು ಗೋದಾಮುಗಳಲ್ಲಿ ಕೊಳೆಯುವ ಸ್ಥಿತಿಯಲ್ಲಿದ್ದವು ಹಾಗೂ ಕೊಳೆಯುತ್ತಿದ್ದ ಅಕ್ಕಿಯಿಂದ ಸ್ಯಾನಿಟೈಸರ್‌ ತಯಾರಿಸಬೇಕೆನ್ನುವ ಚಿಂತನೆ ವ್ಯಕ್ತವಾಗಿತ್ತು. ಭಾರತೀಯ ಆಹಾರ ನಿಗಮದ ಗೋದಾಮುಗಳಲ್ಲಿ ಪ್ರತಿವರ್ಷ ಸುಮಾರು ಮೂರು ಸಾವಿರ ಟನ್‌ಗೂ ಹೆಚ್ಚಿನ ಆಹಾರಧಾನ್ಯಗಳು ಹಾಳಾಗುತ್ತಿರುವುದನ್ನು
ಕೇಂದ್ರ ಗ್ರಾಹಕರ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣೆ ಸಚಿವಾಲಯ ಕಳೆದ ಮಾರ್ಚ್‌ನಲ್ಲಿ ಲೋಕಸಭೆಯ ಗಮನಕ್ಕೆ ತಂದಿತ್ತು. ಗೋದಾಮುಗಳು ವೈಜ್ಞಾನಿಕವಾಗಿ ಸಜ್ಜು ಗೊಂಡಿಲ್ಲದಿರುವುದೇ ಆಹಾರಧಾನ್ಯಗಳು ಹಾಳಾಗಲು ಪ್ರಮುಖ ಕಾರಣ. ಕೀಟಗಳ ಬಾಧೆಯ ಜೊತೆಗೆ ಮಳೆ ಹಾಗೂ ತೇವಾಂಶದ ವಾತಾವರಣ ಕೂಡ ಆಹಾರಧಾನ್ಯಗಳ ಮೇಲೆ ಪರಿಣಾಮ ಬೀರುತ್ತಿವೆ. ಕೆಲವು ಗೋದಾಮುಗಳು ಮಳೆ ಬಂದಾಗ ಸೋರುತ್ತವೆ. ಆಹಾರಧಾನ್ಯಗಳ ಅಸಮರ್ಪಕ ಸಂಗ್ರಹದ ಜೊತೆಗೆ ವಿತರಣಾ ವ್ಯವಸ್ಥೆಯಲ್ಲಿನ ದೋಷಗಳೂ ಸೇರಿಕೊಂಡು, ಸಾರ್ವಜನಿಕ ಪಡಿತರ ವ್ಯವಸ್ಥೆಯ ಯೋಜನೆಗಳು ಅರ್ಹರನ್ನು ತಲುಪುವಲ್ಲಿ ವಿಫಲವಾಗಿವೆ. ಶ್ರೀಮಂತವರ್ಗ ಸೇವಿಸುವ ಆಹಾರದಲ್ಲಿ ಐದನೇ ಒಂದು ಪಾಲು ಪೋಲಾಗುತ್ತಿರುವುದು ಕೂಡ ಆಹಾರದ ಬಿಕ್ಕಟ್ಟಿಗೆ ಕಾರಣವಾಗಿದೆ. ಎಲ್ಲರಿಗೂ ಆಹಾರ ಮತ್ತು ಆರೋಗ್ಯ ಖಾತರಿಪಡಿಸುವುದು ಸರ್ಕಾರಗಳ ಆದ್ಯತೆಯಾಗಬೇಕು. ಹಸಿವುಮುಕ್ತ ಭಾರತದ ಘೋಷಣೆ ಮಾತಿನ ರೂಪದಿಂದ ಕಾರ್ಯರೂಪಕ್ಕೆ ಬರಬೇಕು. ಆಹಾರಧಾನ್ಯಗಳ ಸಂಗ್ರಹ ಸಮೃದ್ಧವಾಗಿರುವ ಸಂದರ್ಭದಲ್ಲಿ ಹಸಿವು ಮತ್ತು ಅಪೌಷ್ಟಿಕತೆಯ ಪ್ರಕರಣಗಳು ವರದಿಯಾಗುವುದು ನಾಚಿಕೆಗೇಡು. ಆಹಾರಧಾನ್ಯಗಳ ಸಮರ್ಪಕ ಸಂಗ್ರಹ ಮತ್ತು ವಿತರಣೆಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಇನ್ನು ಮುಂದಾದರೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು. ಗೋದಾಮುಗಳನ್ನು ಬಲಪಡಿಸುವುದು ಹಾಗೂ ಅವುಗಳನ್ನು ಇಲಿ– ಹೆಗ್ಗಣಗಳಿಂದ ಮುಕ್ತವಾಗಿಡುವುದರ ಜೊತೆಗೆ, ಆಹಾರಧಾನ್ಯಗಳನ್ನು ಕೊಳೆಯಲು ಬಿಡುವ ಅಧಿಕಾರಿಗಳ ಮೇಲೆ ಕ್ರಮ ಕೈಗೊಳ್ಳಬೇಕು.