ಒಳನೋಟ | ‘ಎ’ ಗ್ರೇಡ್ ಮನ್ನಣೆ; ಅನುದಾನಕ್ಕೆ ಕಡೆಗಣನೆ

ಸರ್ಕಾರದ ವಾರ್ಷಿಕ ನೆರವಿನ ಜೊತೆಗೆ ಪ್ರವೇಶ ಶುಲ್ಕ (ತಲಾ ₹ 10), ಕುವೆಂಪು ಪುಸ್ತಕಗಳ ಮಾರಾಟ, ದಾನಿಗಳ ನೆರವು ಪಡೆದು ದೈನಂದಿನ ಕಾರ್ಯಚಟುವಟಿಕೆ ನಿಭಾಯಿಸುತ್ತಿದೆ.

‘ಸರ್ಕಾರದ ಅನುದಾನದಲ್ಲಿ ಟ್ರಸ್ಟ್ ನಡೆಸಲು ಆಗದು. ಕಳೆದ ವರ್ಷ ನಮಗೆ ‘ಎ’ ಗ್ರೇಡ್ ನೀಡಿ ವಾರ್ಷಿಕ ₹ 15 ಲಕ್ಷ ಅನುದಾನ ಘೋಷಿಸಿದ್ದರು. ಮೊದಲ ಕಂತು ₹ 7.5 ಲಕ್ಷ ನೀಡಿದರು. ಎರಡನೇ ಕಂತನ್ನು ಕೊಡಲೇ ಇಲ್ಲ‘ ಎಂದು ಪ್ರತಿಷ್ಠಾನದ ಅಧ್ಯಕ್ಷ ಕಡಿದಾಳ್ ಪ್ರಕಾಶ್ ಹೇಳುತ್ತಾರೆ.

‘ಇಲ್ಲಿರುವ 12 ಜನ ಸಿಬ್ಬಂದಿಯ ವೇತನಕ್ಕೆ ವಾರ್ಷಿಕ ₹ 16 ಲಕ್ಷ ಬೇಕಿದೆ. ಮೊದಲು ಮಾಡಿಕೊಂಡಿದ್ದ ಉಳಿತಾಯ ಈಗ ಖಾಲಿಯಾಗುತ್ತಾ ಬರುತ್ತಿದೆ. ಸರ್ಕಾರ ಕೊಡುವ ಹಣದಲ್ಲಿ ಮೂರು ತಿಂಗಳ ಅವಧಿಯ ನಿರ್ವಹಣೆಯೂ ಅಸಾಧ್ಯ. ಈ ವರ್ಷ (2022–23) ಏನೂ ಕೊಟ್ಟಿಲ್ಲ. ಎಷ್ಟು ದಿನ ಆಗುತ್ತದೋ ಅಷ್ಟು ದಿನ ನಡೆಸಿ ನಿಲ್ಲಿಸಬೇಕಾಗುತ್ತದೆ‘ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ.

ಎಸ್.ನಿಜಲಿಂಗಪ್ಪ ಟ್ರಸ್ಟ್, ಚಿತ್ರದುರ್ಗ: ‘ಮೊದಲು ₹ 15 ಲಕ್ಷ, ನಂತರ ₹ 12 ಲಕ್ಷ, ಬಳಿಕ ₹ 10 ಲಕ್ಷ... ಹೀಗೆ ಒಂದೊಂದು ಪಕ್ಷದ ನೇತೃತ್ವದ ಸರ್ಕಾರ ಒಂದೊಂದು ರೀತಿ ಅನುದಾನ ಬಿಡುಗಡೆ ಮಾಡುತ್ತಿದೆ. ಈ ವರ್ಷ ಅದೂ ಇಲ್ಲ‘ ಎಂದು ಚಿತ್ರದುರ್ಗದ ಎಸ್‌.ನಿಜಲಿಂಗಪ್ಪ ಟ್ರಸ್ಟ್‌ನ ಕಾರ್ಯದರ್ಶಿ ಷಣ್ಮುಖಪ್ಪ ಹೇಳುತ್ತಾರೆ.

‘ಈಗ ಟ್ರಸ್ಟ್‌ನ ನಿರ್ವಹಣೆ ಬಹಳ ಕಷ್ಟಕರವಾಗಿದೆ. ಐದು ಜನ ಸಿಬ್ಬಂದಿಗೆ ವೇತನ, ವಿದ್ಯುತ್ ಬಿಲ್ ಸೇರಿ ತಿಂಗಳಿಗೆ ಕನಿಷ್ಠ ₹ 50,000 ಬೇಕು. ರಾಜ್ಯದಲ್ಲಿ ಅತ್ಯಂತ ಚೆನ್ನಾಗಿ ನಡೆಯುತ್ತಿರುವ ಟ್ರಸ್ಟ್ ಎಂದು ಸರ್ಕಾರ ನಮಗೆ ಶಹಬ್ಬಾಸ್‌ಗಿರಿ ನೀಡಿದೆ. ಆದರೆ ನಾವು ಕೈಯಿಂದ ಖರ್ಚು ಮಾಡುತ್ತಿದ್ದೇವೆ’ ಎಂದು ಅವರು ತಿಳಿಸುತ್ತಾರೆ.

ಡಿವಿಜಿ ಪ್ರತಿಷ್ಠಾನ: ಕೋಲಾರದಲ್ಲಿರುವ ಡಿವಿಜಿ ಪ್ರತಿಷ್ಠಾನಕ್ಕೆ 2017–18ನೇ ಸಾಲಿನಲ್ಲಿ ಅನುದಾನ ಬಿಡುಗಡೆಯಾಗಿದ್ದೇ ಕೊನೆ. ಬಳಿಕ ಅನುದಾನ ಸಿಕ್ಕಿಲ್ಲ. ಪ್ರಸಕ್ತ ಸಾಲಿನಲ್ಲಿ ₹ 3 ಲಕ್ಷ ಬಿಡುಗಡೆ ಮಾಡುವುದಾಗಿ ಘೋಷಿಸಿದ್ದರೂ ಇದುವರೆಗೆ ಕೈಸೇರಿಲ್ಲ. 2013ರಲ್ಲಿ ಈ ಪ್ರತಿಷ್ಠಾನ ಆರಂಭಿಸಲಾಗಿದ್ದು, ಡಿ.ವಿ.ಗುಂಡಪ್ಪ ಅವರ ಸಾಹಿತ್ಯ ಪ್ರಚಾರ ಪಡಿಸುವುದು ಇದರ ಉದ್ದೇಶ.

ಡಾ.ಮಾಸ್ತಿ ವೆಂಕಟೇಶ್‌ ಅಯ್ಯಂಗಾರ್‌ ಟ್ರಸ್ಟ್‌: ಕೋಲಾರದಲ್ಲಿ ಡಾ.ಮಾಸ್ತಿ ವೆಂಕಟೇಶ್‌ ಅಯ್ಯಂಗಾರ್‌ ಟ್ರಸ್ಟ್‌ ಸಕ್ರಿಯವಾಗಿದೆ. ಜೂನ್‌ 6ರಂದು ಜಿಲ್ಲೆಯ ಮಾಲೂರು ತಾಲ್ಲೂಕಿನ ಮಾಸ್ತಿಯಲ್ಲಿ ಜಿಲ್ಲಾಡಳಿತದಿಂದ ಅದ್ದೂರಿಯಾಗಿ ಮಾಸ್ತಿ ಅವರ ಜನ್ಮದಿನ ಆಚರಿಸಲಾಯಿತು. 1997ರಲ್ಲಿ ಆರಂಭವಾದ ಟ್ರಸ್ಟ್‌ಗೆ ಈ ಬಾರಿ ₹ 4 ಲಕ್ಷ ಅನುದಾನ ಬಿಡುಗಡೆಯಾಗಿದೆ. ಯುವ ಕವಿ, ಮುದ್ರಕರು, ಪ್ರಕಾಶಕರನ್ನು ಪ್ರೋತ್ಸಾಹಿಸಲು ಪ್ರತಿ ವರ್ಷ ‘ಮಾಸ್ತಿ ಪ್ರಶಸ್ತಿ’ ಕೊಡಮಾಡಲಾಗುತ್ತಿದೆ.

(ಪೂರಕ ಮಾಹಿತಿ: ಜಿ.ಬಿ.ನಾಗರಾಜ್, ಓಂಕಾರಮೂರ್ತಿ)

ಒಳನೋಟ | ಕಳಾಹೀನ ಟ್ರಸ್ಟ್‌ಗಳು - ನಾಮಬಲವೇ ಆಸ್ತಿ: ಕಾಯಕ ನಾಸ್ತಿ