25 ವರ್ಷಗಳ ಹಿಂದೆ: ಬುಧವಾರ 13–12–1995

ಬೆಂಗಳೂರು, ಡಿ.12– ‘ರಾಜ್ಯದಲ್ಲಿ 41,850 ಎಕರೆ ಅರಣ್ಯ ಭೂಮಿಯಲ್ಲಿ ಅಕ್ರಮ ಸಾಗುವಳಿ ಆಗುತ್ತಿದ್ದು ಅದನ್ನು ಸಕ್ರಮಗೊಳಿಸಲು ಕೇಂದ್ರ ಸರ್ಕಾರ ಪರವಾನಗಿ ನೀಡಿದೆ’ ಎಂದು ಮುಖ್ಯಮಂತ್ರಿ ಎಚ್‌.ಡಿ.ದೇವೇಗೌಡ ಅವರು ಇಂದು ಇಲ್ಲಿ ತಿಳಿಸಿದರು.

‘ರಾಜ್ಯದ ಬಹುತೇಕ ಎಲ್ಲ ಜಿಲ್ಲೆಗಳ ವ್ಯಾಪ್ತಿಯಲ್ಲಿನ ಅರಣ್ಯ ಭೂಮಿಯಲ್ಲಿ 1978ರ ಏಪ್ರಿಲ್‌ 27ರವರೆಗೆ ಅಕ್ರಮ ಸಾಗುವಳಿ ನಡೆಸಿರುವ ಕಡುಬಡತನದ ಬುಡಕಟ್ಟು ಜನಾಂಗಕ್ಕೆ ಸೇರಿದ ಸುಮಾರು 21,000 ಕುಟುಂಬಗಳು ಮೂರು ಎಕರೆ ಮಿತಿಯೊಳಗೆ ಇದರ ಪ್ರಯೋಜನ ಪಡೆಯಲಿವೆ’ ಎಂದು ಅವರು ಹೇಳಿದರು.

‘ಇದು ಕರ್ನಾಟಕ ಅರಣ್ಯ ಕಾಯ್ದೆ ಜಾರಿಗೆ ಮುನ್ನ ಆಗಿದ್ದ ಅಕ್ರಮ ಸಾಗುವಳಿ ಇದರ ವ್ಯಾಪ್ತಿಗೆ ಬರುತ್ತದೆ. ಆದರೆ, ಕಾಯ್ದೆ ಜಾರಿ ನಂತರ(1978ರ ನಂತರ) ಸುಮಾರು 10,000 ಎಕರೆ ಪ್ರದೇಶವನ್ನು 1991ರವರೆಗೆ ಅಕ್ರಮವಾಗಿ ಸಾಗುವಳಿ ಮಾಡಿಕೊಂಡು ಬಂದಿರುವ ಭೂಮಿಯನ್ನೂ ಸಕ್ರಮಗೊಳಿಸಲು ಅನುಮತಿ ನೀಡಲು ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿಕೊಳ್ಳಲಾಗಿದೆ’ ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.