ಶನಿವಾರ, ಮಾರ್ಚ್ 6, 2021
31 °C

ವಾಚಕರ ವಾಣಿ: ಪ್ರಕೃತಿಯ ವಿದ್ಯಮಾನಕ್ಕೆ ಸಲ್ಲದ ಅರ್ಥ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಈ ಬಾರಿಯ ಸಂಕ್ರಾಂತಿಯಂದು ಬೆಂಗಳೂರಿನ ಗವಿಪುರದ ಗವಿಗಂಗಾಧರೇಶ್ವರ ಸ್ವಾಮಿ ದೇವಸ್ಥಾನದಲ್ಲಿನ ಶಿವಲಿಂಗದ ಮೇಲೆ ಸೂರ್ಯರಶ್ಮಿ ಬೀಳದೇ ಇದ್ದದ್ದಕ್ಕೆ ಮೋಡಗಳು ಅಡ್ಡ ಬಂದದ್ದೇ ಕಾರಣ ಎಂಬ ಸುದ್ದಿ(ಪ್ರ.ವಾ., ಜ. 15) ಸತ್ಯ ಮತ್ತು ವೈಜ್ಞಾನಿಕವಾದದ್ದು. ವಿಪರ್ಯಾಸವೆಂದರೆ, ವಿಜ್ಞಾನ ಎಷ್ಟೇ ಬೆಳೆದರೂ ಪ್ರಕೃತಿಯಲ್ಲಿನ ಸಾಮಾನ್ಯ ಘಟನೆಗಳಿಗೆ ಸಲ್ಲದ ಅರ್ಥ ಕಲ್ಪಿಸುವ ವಾತಾವರಣಕ್ಕೆ ಕೆಲವು ಮಾಧ್ಯಮಗಳು ಕಾರಣವಾಗುತ್ತಿವೆ.

ಸೂರ್ಯನ ಕಿರಣಗಳು ಶಿವಲಿಂಗದ ಮೇಲೆ ಬೀಳದೇ ಇದ್ದದ್ದು ಅಪಾಯದ ಸಂದೇಶ, ಅಷ್ಟೇ ಅಲ್ಲ ಇದರಿಂದ ಯುದ್ಧ ನಡೆಯುವ ಮುನ್ಸೂಚನೆ ಇದೆ ಎಂಬಂಥ ಅಭಿಪ್ರಾಯ ಇದ್ದ ಕಾರ್ಯಕ್ರಮವನ್ನು ಪ್ರಸಾರ ಮಾಡಲಾಯಿತು. ಅಲ್ಲದೆ ಇಡೀ ದಿನ ಕಾರ್ಯಕ್ರಮವನ್ನು ಪದೇ ಪದೇ ಪುನರಾವರ್ತಿಸಲಾಯಿತು. ಸೂರ್ಯ ಕಿರಣಗಳ ಪ್ರಸರಣವಾಗುವುದು ಪ್ರಕೃತಿ ನಿಯಮ. ಹಾಗೆಯೇ ಮೋಡ ಅಡ್ಡ ಬಂದಾಗ ಕಿರಣಗಳು ಮರೆಯಾಗುವುದು ಸಹಜ. ಹೀಗೆ ಸಂಭವಿಸುವ ಪ್ರಕೃತಿಯ ವಿದ್ಯಮಾನವನ್ನು ನೋಡುವುದೇ ವಿಸ್ಮಯ. ಈ ವರ್ಷ ಸೂರ್ಯರಶ್ಮಿ ಕಾಣದೇ ಇದ್ದದ್ದರಿಂದ ಪ್ರಕೃತಿಪ್ರಿಯರಿಗೆ ಹಾಗೂ ದೇವರಲ್ಲಿ ನಂಬಿಕೆ ಇರುವ ಭಕ್ತರಿಗೆ ನಿರಾಸೆಯಾದದ್ದು ನಿಜ. ಇದು ನಂಬಿಕೆ. ಹಾಗಾಗಿ ಪ್ರಶ್ನೆಗೆ ನಿಲುಕುವಂತಹದ್ದಲ್ಲ. ಆದರೆ ಜನರ ಇಂತಹ ನಂಬಿಕೆಯನ್ನೇ ಬಂಡವಾಳ ಮಾಡಿಕೊಂಡು,
ಈ ವಿದ್ಯಮಾನವು ಅಪಾಯದ ಮುನ್ಸೂಚನೆ ಎಂದು ಜನಸಾಮಾನ್ಯರನ್ನು ಹೆದರಿಸಿ ನಿದ್ದೆಗೆಡಿಸುವುದು
ಒಪ್ಪುವಂಥದ್ದಲ್ಲ.

ಡಾ. ಜಿ.ಬೈರೇಗೌಡ, ಬೆಂಗಳೂರು

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.