‘ಸಿನಿಮಾ: ಜೀವಂತಿಕೆಯ ಕೊಂಡಿ ಕಳಚಿದ್ದೆಲ್ಲಿ?’ ಎಂಬ ಲೇಖನದಲ್ಲಿ ಹೇಳಿರುವಂತೆ (ಸಂಗತ, ಜುಲೈ 29), ಗುಣಮಟ್ಟದ ಸಿನಿಮಾಕ್ಕಾಗಿ ಈಗಿನ ನಿರ್ದೇಶಕರು ಹಾಗೂ ನಿರ್ಮಾಪಕರು ಯುಕ್ತ ‘ಹೋಂ ವರ್ಕ್’ ಮಾಡುವುದು ಅಗತ್ಯ. ಇದರ ಜೊತೆಗೆ ಕನ್ನಡ ಭಾಷಾ ಬಳಕೆ ಹಾಗೂ ಪ್ರಾದೇಶಿಕ ಅಸಮಾನತೆಯ ಕಡೆಗೂ ಕನ್ನಡ ಚಿತ್ರರಂಗ ಗಮನ ಹರಿಸಬೇಕಿದೆ. ಪ್ರಸ್ತುತ ಕನ್ನಡ ಚಿತ್ರರಂಗದ ಪ್ರಭಾವಿ ನಟ, ನಟಿಯರ ಮೂಲ ಹಾಗೂ ಅವರು ಸಿನಿಮಾದಲ್ಲಿ ಬಳಸುವ ಭಾಷಾ ಸೊಗಡು ಹೆಚ್ಚಾಗಿ ದಕ್ಷಿಣ ಕರ್ನಾಟಕ ಭಾಗದ್ದಾಗಿದೆ. ಉತ್ತರ ಕರ್ನಾಟಕದ ಭಾಷಾ ಸೊಗಡನ್ನು ಕಾಣುವುದು ತೀರಾ ಕಡಿಮೆ. ಇದರೊಂದಿಗೆ ಚಿತ್ರೀಕರಣ ಕೂಡ ಬೆಂಗಳೂರು ಸುತ್ತಮುತ್ತಲೇ ಹೆಚ್ಚಾಗಿ ನಡೆಯುತ್ತಿದೆ.