ದೆಹಲಿ ಸರ್ಕಾರ ತನ್ನ 150 ಸರ್ಕಾರಿ ಶಾಲಾ ಕಟ್ಟಡಗಳ ಮೇಲ್ಚಾವಣಿಗಳಲ್ಲಿ ಸೌರ ವಿದ್ಯುತ್ ವ್ಯವಸ್ಥೆ ಅಳವಡಿಸಿಕೊಂಡಿದೆ. ಈ ಕಾರ್ಯಕ್ಕೆ ಬೇಕಾಗುವ ಹಣವನ್ನು ಕೇಂದ್ರ ಸರ್ಕಾರದ ಯೋಜನೆಯಡಿಯಿಂದ ಪಡೆಯಲಾಗಿದೆ. ಇದರಿಂದ ಸುಮಾರು 21 ಮೆಗಾವಾಟ್ ಸೌರವಿದ್ಯುತ್ ಅನ್ನು ಉತ್ಪಾದನೆ ಮಾಡಲಾಗಿದೆ. ಇದರ ಪರಿಣಾಮವಾಗಿ, ವಾರ್ಷಿಕವಾಗಿ ಕೋಟ್ಯಂತರ ರೂಪಾಯಿ ಉಳಿತಾಯವಾದುದಷ್ಟೇ ಅಲ್ಲ ಕೋಟ್ಯಂತರ ರೂಪಾಯಿ ಮೌಲ್ಯದ ಸೌರವಿದ್ಯುತ್ ಅನ್ನು ಮಾರಾಟ ಸಹ ಮಾಡಲಾಗಿದೆ. ಈ ಎಲ್ಲಾ ಶಾಲೆಗಳಲ್ಲಿ ರಿನಿವಲ್ ಎನರ್ಜಿ ಸರ್ವಿಸ್ ಕಂಪನಿಯ (ರೆಸ್ಕೊ) ಮಾದರಿಯಲ್ಲಿ ಶಾಲೆಗಳ ಮೇಲ್ಚಾವಣಿಯಲ್ಲಿ ಸೌರವಿದ್ಯುತ್ ವ್ಯವಸ್ಥೆ ಅಳವಡಿಸಲಾಗಿದೆ. ಸೌರವಿದ್ಯುತ್ ಬಳಕೆಯಿಂದ ಸಾಮಾನ್ಯ ವಿದ್ಯುತ್ ದರಕ್ಕಿಂತ ಶೇ 65ರಷ್ಟು ಕಡಿಮೆ ಪ್ರಮಾಣದ ಮಾಸಿಕ ವಿದ್ಯುತ್ ಶುಲ್ಕ ಬರುತ್ತದೆ.
