ಸೌರ ಗೃಹ ಯೋಜನೆಯಡಿ ಗ್ರಾಹಕರು ಸೌರ ವಿದ್ಯುತ್ ಚಾವಣಿ ಅಳವಡಿಸಿಕೊಳ್ಳಲು ಉತ್ಸಾಹ ತೋರುತ್ತಿದ್ದಾರೆ ಎಂದು ವರದಿಯಾಗಿದೆ (ಪ್ರ.ವಾ., ಆ. 9.) ಸೌರ ಗೃಹ ಯೋಜನೆಯು 2020ರ ಮಾರ್ಚ್ನಲ್ಲೇ ಆರಂಭವಾಗಿತ್ತು. ಸುಮಾರು 1,200 ಗ್ರಾಹಕರು ಆಗಲೇ ನೋಂದಾಯಿಸಿದ್ದರೂ ಇದುವರೆಗೂ ಗ್ರಾಹಕರಿಗೆ ಇದರ ಪ್ರಯೋಜನ ದಕ್ಕಿಲ್ಲ. ಏಕೆಂದರೆ, ಬೆಸ್ಕಾಂ ‘ಅಡುಗೆಯಿಲ್ಲದೆ ಊಟಕ್ಕೆ ಇಟ್ಟಂತೆ’ ತಯಾರಿಯೇ ಇಲ್ಲದೆ ಗ್ರಾಹಕರನ್ನು ಆಹ್ವಾನಿಸಿ ಒಂದೂವರೆ ವರ್ಷದಿಂದ ಗ್ರಾಹಕರ ಅಪಹಾಸ್ಯಕ್ಕೀಡಾಗಿದೆ. ಸುಮಾರು 250 ಗ್ರಾಹಕರು ಈಗಾಗಲೇ ತಮ್ಮ ಅರ್ಜಿಗಳನ್ನು ವಾಪಸ್ ಪಡೆದಿದ್ದಾರೆ. ಇದಕ್ಕೆ ಕಾರಣ, ಸ್ಥಾಪನಾ ಸಂಸ್ಥೆಗಳ ಆಯ್ಕೆಯ ವಿಚಾರದಲ್ಲಿ ಬೆಸ್ಕಾಂ ಮಾಡಿದ ಎಡವಟ್ಟು.