ನಮ್ಮ ಯುವ ಸಮುದಾಯ ಇತ್ತೀಚೆಗೆ ಫೇಸ್‌ಬುಕ್, ಟ್ವಿಟರ್‌ನಂತಹ ಸಾಮಾಜಿಕ ಜಾಲತಾಣಗಳಲ್ಲಿ ಲೈಕ್, ಕಮೆಂಟ್ ಹಾಕುತ್ತಾ ವಿಡಿಯೊ ಮಾಡಿ ಹರಿಬಿಡುತ್ತಾ ತಮ್ಮ ಅಮೂಲ್ಯ ಸಮಯವನ್ನು ಹರಣ ಮಾಡುತ್ತಿದೆ. ಹಾಕಿರುವ ಪೋಸ್ಟ್‌ಗಳಿಗೆ ಕಡಿಮೆ ಲೈಕ್ಸ್, ಕಮೆಂಟ್‌ಗಳು ಬಂದರೆ ಅವರು ಮಾನಸಿಕ ಹಿಂಸೆ ಅನುಭವಿಸುತ್ತಿರುತ್ತಾರೆ. ಈ ವಿಚಾರದಲ್ಲಿ ಕೆಲವು ಸಾವು ನೋವುಗಳು ಕೂಡ ಸಂಭವಿಸಿರುವ ನಿದರ್ಶನಗಳಿವೆ. ಆದರೂ ಇದಕ್ಕೆ ಯಾವುದೇ ಕಡಿವಾಣ ಇಲ್ಲದಂತಾಗಿದೆ. ಸಾಮಾಜಿಕ ಜಾಲತಾಣಗಳ ಮಹತ್ವ ಅರಿಯದ ಯುವ ಸಮುದಾಯವು ಕೇವಲ ಲೈಕ್, ಕಮೆಂಟ್‌ಗಳಲ್ಲಿ ದಿನವೂ ಗಂಟಾನುಗಟ್ಟಲೆ ಕಾಲ ಕಳೆಯುತ್ತಿರುವುದು, ಪುಸ್ತಕ, ಪತ್ರಿಕೆಗಳ ಓದಿನಿಂದ ದೂರ ಉಳಿಯುತ್ತಿರುವುದು ಆತಂಕಕಾರಿ ವಿಷಯ.
