ಐಹೊಳೆಯಲ್ಲಿನ ಹಲವು ಐತಿಹಾಸಿಕ ಸ್ಮಾರಕಗಳು ಸ್ಥಳೀಯರ ಬಯಲು ಶೌಚಕ್ಕೆ, ಸಾಕುಪ್ರಾಣಿಗಳನ್ನು ಕಟ್ಟಲು ಹಾಗೂ ಇತರ ಸ್ವಂತ ಕೆಲಸಗಳಿಗೆ ಬಳಕೆಯಾಗುತ್ತಿರುವುದನ್ನು ಓದಿ (ಪ್ರ.ವಾ., ಏ. 15) ಮನಸ್ಸಿಗೆ ನೋವಾಯಿತು. ಐತಿಹಾಸಿಕ ಸ್ಮಾರಕಗಳ ಬಗ್ಗೆ ಯಾವುದೇ ಕಾಳಜಿ ಇಲ್ಲದಿರುವ ಸ್ಥಳೀಯರು ಒಂದೆಡೆಯಾದರೆ, ಸಂಬಂಧಪಟ್ಟ ಇಲಾಖಾ ಸಿಬ್ಬಂದಿಯ ಬೇಜವಾಬ್ದಾರಿತನ ಮತ್ತೊಂದೆಡೆ ಎದ್ದು ಕಾಣುತ್ತದೆ. ಸ್ಮಾರಕಗಳ ದುರುಪಯೋಗ, ಅತಿಕ್ರಮಣ, ಹಾನಿ, ವಿಗ್ರಹಗಳ ಕಳ್ಳತನದಂತಹ ಸಂದರ್ಭಗಳಲ್ಲಿ ಇಲಾಖೆಯವರು ಸಿಬ್ಬಂದಿ ಕೊರತೆಯ ನೆಪ ಹೇಳಿ ಕೈತೊಳೆದುಕೊಂಡು ಬಿಡುತ್ತಾರೆ. ಸ್ಮಾರಕಗಳನ್ನು ಕಾಪಾಡಿಕೊಳ್ಳುವುದರಲ್ಲಿ ಇಲಾಖೆಯ ಜವಾಬ್ದಾರಿ ಎಷ್ಟಿರುತ್ತದೋ ಅದಕ್ಕಿಂತ ಹೆಚ್ಚಿನ ಹೊಣೆಯನ್ನು ಸ್ಥಳೀಯರು ಹೊರಬೇಕಾಗುತ್ತದೆ.