ಮಂಗಳವಾರ, ಮೇ 26, 2020
27 °C

ಯೂರೋಪ್‌ನ ಮಿನಿ ನಯಾಗರ; ರೈನ್ ಫಾಲ್ಸ್

ಗೊರೂರು ಸಂಪತ್ ಶ್ರೀನಿವಾಸನ್ Updated:

ಅಕ್ಷರ ಗಾತ್ರ : | |

ಬ್ಯಾಂಕ್ ನೌಕರಿಯ ನಿವೃತ್ತಿಯ ನಂತರ ಕಳೆದ ವರ್ಷದ ಏಪ್ರಿಲ್ ಕೊನೆಯ ವಾರದಲ್ಲಿ ನಾನು ಮತ್ತು ನನ್ನ ಪತ್ನಿ ಎತಿಹಾದ್ ವಿಮಾನ ಹತ್ತಿ ಜರ್ಮನಿಯ ಮ್ಯೂನಿಕ್‌ಗೆ ಹೊರಟೆವು. ಯೂರೋಪ್‌ನಲ್ಲಿ ಬೇಸಿಗೆಯಾದ್ದರಿಂದ ಹವಾಮಾನ ಹಿತಕರವಾಗಿತ್ತು. ಮೂರು ತಿಂಗಳು ಜರ್ಮನಿ, ಇಟಲಿ, ಫ್ರಾನ್ಸ್, ಸ್ವಿಡ್ಜರ್ಲೆಂಡ್‌, ಆಸ್ಟ್ರಿಯ ಹಾಗೂ ಜೆಕ್ ರಿಪಬ್ಲಿಕ್ ಸುತ್ತಾಡಿದೆವು.

ನಾನು ನೋಡಿದ ಹಲವಾರು ಜಾಗಗಳಲ್ಲಿ ನೆನಪಿನಲ್ಲಿ ಅಚ್ಚಳಿಯದಂತೆ ಉಳಿದಿರುವ ಸ್ಥಳಗಳ ಪೈಕಿ ರೈನ್ ಫಾಲ್ಸ್ ಪ್ರಮುಖವಾದುದು. ಇದು ಸ್ವಿಡ್ಜರ್ಲೆಂಡ್‌ನಲ್ಲಿದ್ದು, ಜರ್ಮನಿಯ ಗಡಿಗೆ ಹೊಂದಿಕೊಂಡಂತಿದೆ. ಯೂರೋಪಿನ ಅತ್ಯಂತ ದೊಡ್ಡ ಜಲಪಾತವೆಂಬುದು ಇದರ ಹೆಗ್ಗಳಿಕೆ. ಇದನ್ನು ಯೂರೋಪಿನ ‘ನಯಾಗರ’ ಜಲಪಾತವೆಂದೂ ಕರೆಯುತ್ತಾರೆ. ಇದರ ಅಗಲ 150 ಮೀಟರ್ ಇದ್ದು, 23 ಮೀಟರ್ ಎತ್ತರದಿಂದ ನೀರು ಧುಮುಕುತ್ತದೆ. ನಮ್ಮ ಜೋಗ್ ಜಲಪಾತದಷ್ಟು ಅದ್ಭುತ ಎನಿಸದಿದ್ದರೂ, ಇದರ ಪರಿಸರವನ್ನು ಜನಾಕರ್ಷಕವಾಗಿರಿಸಿರುವ ಪರಿ ಅನನ್ಯ ಮತ್ತು ಅನುಕರಣೀಯ.

ನೀಲಿವರ್ಣದಲ್ಲಿ ಕಂಗೊಳಿಸುವ ನೀರು ನೋಡುಗರನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ. ನೀರು ಆಳವಿಲ್ಲದಿದ್ದರೂ, ಅತ್ಯಂತ ವೇಗವಾಗಿ ಹರಿಯುತ್ತದೆ. ಜರ್ಮನಿ ಮತ್ತು ಸ್ವಿಡ್ಜರ್ಲೆಂಡ್‌ ಗಡಿಯಲ್ಲಿ ಹರಿಯುವ ರೈನ್ ನದಿಯು ನ್ಯೂಹಾವ್ ಸೆನ್ ಎಂಬಲ್ಲಿ ಜಲಪಾತವಾಗಿ ಧುಮ್ಮಿಕ್ಕುತ್ತದೆ. ಮೂವತ್ತು ನಿಮಿಷಗಳ ಬೋಟ್ ರೈಡಿನಲ್ಲಿ ನೇರವಾಗಿ ಜಲಪಾತದ ಅಡಿಗೆ ಹೋಗುವ ಯಾನ ರೋಮಾಂಚಕವಾದುದು.

ಹೋಗುವ ಹಾದಿ
ಬೆಂಗಳೂರಿನಿಂದ ಸ್ವಿಡ್ಜರ್ಲೆಂಡ್‌ಗೆ ನೇರ ವಿಮಾನ ಸೌಲಭ್ಯವಿದೆ. ಸ್ವಿಡ್ಜರ್ಲೆಂಡ್‌ನ ಜೂರಿಕ್ ನಗರದಿಂದ ರೈನ್‌ಫಾಲ್ಸ್‌ಗೆ ಹೋಗಲು 45 ನಿಮಿಷಗಳು ಬೇಕು. ರೈಲಿನಲ್ಲಿ ಹೋಗಬಹುದು. ಈ ನಗರದಿಂದ ಜಲಪಾತದವರೆಗೂ ಹೋಗಬಹುದು. ಜಲಪಾತದ ಎರಡೂ ಬದಿಗಳಲ್ಲಿ ರೈಲ್ವೆ ನಿಲ್ದಾಣವಿದೆ. ಜರ್ಮನಿಯ ಗಡಿಭಾಗ ಅಥವಾ ಜೂರಿಕ್‌ನಿಂದ ಈ ನಿಲ್ದಾಣಗಳನ್ನು ತಲುಪಬಹುದು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.