ಅಬುಧಾಬಿ (ಪಿಟಿಐ): ಅಬುಧಾಬಿ ಕ್ರಿಕೆಟ್ ಕ್ರೀಡಾಂಗಣದ ಮುಖ್ಯ ಕ್ಯೂರೇಟರ್ ಆಗಿದ್ದ ಭಾರತ ಮೂಲದ ಮೋಹನ್ ಸಿಂಗ್ ಅವರು ಭಾನುವಾರ ಅಫ್ಗಾನಿಸ್ತಾನ ಮತ್ತು ನ್ಯೂಜಿಲೆಂಡ್ ನಡುವಣ ವಿಶ್ವಕಪ್ ಪಂದ್ಯಕ್ಕೆ ಮೊದಲು ನಿಧನರಾದರು.
ಯುನೈಟೆಡ್‌ ಅರಬ್ ಎಮಿರೇಟ್ಸ್‌ (ಯುಎಇ) ಕ್ರಿಕೆಟ್ ಮಂಡಳಿಯ ಮೂಲಗಳು ವಿಷಯ ಖಚಿತಪಡಿಸಿವೆ. ಸಾವಿನ ಕಾರಣ ಇನ್ನೂ ತಿಳಿದುಬಂದಿಲ್ಲ.
‘ಮೋಹನ್ ಸಿಂಗ್ ಅವರು ಇಂದು ನಿಧನರಾದರು. ಈ ಕುರಿತು ಸಂಪೂರ್ಣ ವಿವರಗಳು ಇನ್ನಷ್ಟೇ ಬಹಿರಂಗವಾಗಬೇಕಿದೆ. ಇದು ದುರದೃಷ್ಟಕರ‘ ಎಂದು ಮೂಲಗಳು ಹೇಳಿವೆ.
ಮೋಹನ್ ಅವರು 2000ರ ದಶಕದ ಆರಂಭದಲ್ಲಿ ಯುಎಇಗೆ ತೆರಳುವ ಮೊದಲು ಮೊಹಾಲಿಯಲ್ಲಿ ಬಿಸಿಸಿಐನ ಮಾಜಿ ಮುಖ್ಯ ಕ್ಯೂರೇಟರ್ ದಲ್ಜಿತ್ ಸಿಂಗ್ ಅವರೊಂದಿಗೆ ಕೆಲಸ ಮಾಡಿದ್ದರು.
