ಟೆಸ್ಟ್ ಮಾದರಿಗೂ ಪ್ರಾಮಖ್ಯತೆ ಇರಲಿ: ಆ್ಯಂಡಿ ಫ್ಲವರ್‌
ಅಕ್ಷರ ಗಾತ್ರ :ಆ |ಆ |ಆ
ನವದೆಹಲಿ: ದಿನದಿಂದ ದಿನಕ್ಕೆ ಜನಪ್ರಿಯತೆ ಹೆಚ್ಚಿಸಿಕೊಳ್ಳುತ್ತಿರುವ ಟಿ–20 ಲೀಗ್‌ಗಳು ಹಾಗೂ ಅಂತರರಾಷ್ಟ್ರೀಯ ಕ್ರಿಕೆಟ್ ನಡುವೆ ಆರ್ಥಿಕ ಸಮತೋಲನ ಸಾಧಿಸುವುದು ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್‌ಗೆ (ಐಸಿಸಿ) ಮುಂದಿನ ದಶಕದಲ್ಲಿ ಸವಾಲಾಗಿ ಪರಿಣಮಿಸಲಿದೆ ಎಂದು ಖ್ಯಾತ ಕೋಚ್‌ ಆ್ಯಂಡಿ ಫ್ಲವರ್‌ ಅಭಿಪ್ರಾಯಪಟ್ಟಿದ್ದಾರೆ.
ಟೆಸ್ಟ್ ಮಾದರಿಯ ಪರವಾಗಿ ವಿರಾಟ್‌ ಕೊಹ್ಲಿಯಂತಹ ತಾರಾ ಆಟಗಾರರು ಧ್ವನಿಯೆತ್ತುವುದನ್ನು ಮುಂದುವರಿಸಬೇಕು ಎಂದೂ ಫ್ಲವರ್‌ ಹೇಳಿದ್ದಾರೆ.
ಬಿಸಿಸಿಐ ಬೆಂಬಲಿತ ಐಪಿಎಲ್ ಸೇರಿದಂತೆ, ಐಸಿಸಿಯ ಪೂರ್ಣ ಸದಸ್ಯತ್ವ ಹೊಂದಿರುವ ದೇಶಗಳು ತಮ್ಮದೇ ಆದ ಟಿ20 ಲೀಗ್‌ಗಳನ್ನು ಹೊಂದಿವೆ. ಅಲ್ಲದೆ ಫ್ರ್ಯಾಂಚೈಸ್ ಆಧಾರಿತ ಕ್ರಿಕೆಟ್‌ನ ತ್ವರಿತ ಬೆಳವಣಿಗೆಯು, ಭಾರತ, ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್‌ (ಬಿಗ್‌ ತ್ರಿ) ದೇಶಗಳನ್ನು ಹೊರತುಪಡಿಸಿ ಅಂತರರಾಷ್ಟ್ರೀಯ ಕ್ರಿಕೆಟ್‌ನ ವೇಳಾಪಟ್ಟಿ ಮತ್ತು ಅದರ ಕಾರ್ಯಸಾಧ್ಯತೆ ಮೇಲೆ ಹೆಚ್ಚಿನ ಒತ್ತಡವನ್ನುಂಟು ಮಾಡಿದೆ.
ಕಿಂಗ್ಸ್ ಇಲೆವನ್‌ ಪಂಜಾಬ್‌ ತಂಡದ ಸಹಾಯಕ ಕೋಚ್‌ ಹುದ್ದೆಯ ಮೂಲಕ ಫ್ಲವರ್‌ ಅವರು ಐಪಿಎಲ್‌ನಲ್ಲಿ ಮೊದಲ ಬಾರಿ ಕಾಣಿಸಿಕೊಳ್ಳುತ್ತಿದ್ದಾರೆ.
ದುಬೈನಲ್ಲಿ ಮಾತನಾಡಿದ ಅವರು ‘ಇಂಗ್ಲೆಂಡ್‌ನಲ್ಲಿ ಇತ್ತೀಚೆಗೆ ನಡೆದ ಸರಣಿಯಲ್ಲಿ ಟೆಸ್ಟ್ ಮಾದರಿಗೆ ಇರುವ ಆಸಕ್ತಿ ಕಾಣಿಸಿದೆ. ಆದರೂ ಟಿ20 ವೈಭವದ ಜೊತೆಗೇ ಟೆಸ್ಟ್ ಮಾದರಿಯನ್ನು ಜಾಣ್ಮೆಯಿಂದ ಮುಂದುವರಿಸಿಕೊಂಡು ಹೋಗುವ ಅಗತ್ಯವಿದೆ‘ ಎಂದು ಹೇಳಿದ್ದಾರೆ.
‘ನನ್ನ ಪ್ರಕಾರ ಭಾರತ, ಇಂಗ್ಲೆಂಡ್‌ ಹಾಗೂ ಆಸ್ಟ್ರೇಲಿಯಾಗಳಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಉತ್ತಮ ಸ್ಪಂದನೆ ಇದೆ. ಆಟಗಾರರಲ್ಲೂ ಈ ಮಾದರಿಯಲ್ಲಿ ಆಡುವ ಆಸಕ್ತಿ ಇದೆ‘ ಎಂದು ಜಿಂಬಾಬ್ವೆ ತಂಡದ ಮಾಜಿ ನಾಯಕರೂ ಆಗಿರುವ ಫ್ಲವರ್‌ ಹೇಳಿದರು.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
