IPL-2020 | ಕೆಕೆಆರ್ ವಿರುದ್ಧ ಜಯ; ಮತ್ತೆ ಅಗ್ರಸ್ಥಾನಕ್ಕೇರಿದ ಡೆಲ್ಲಿ
ಶಾರ್ಜಾ:ಡೆಲ್ಲಿ ಕ್ಯಾಪಿಟಲ್ಸ್‌ ನೀಡಿದ್ದ 229 ರನ್‌ಗಳ ಬೃಹತ್‌ ಗುರಿ ಎದುರು ಕೊನೆಯವರೆಗೂ ಹೋರಾಟ ನಡೆಸಿದ ಕೋಲ್ಕತ್ತ ನೈಟ್‌ರೈಡರ್ಸ್‌ 8 ವಿಕೆಟ್ ಕಳೆದುಕೊಂಡು210 ರನ್ ಗಳಿಸಲಷ್ಟೇ ಶಕ್ತವಾಯಿತು. ಹೀಗಾಗಿ ಈ ತಂಡ 18 ರನ್ ಅಂತರದ ಸೋಲು ಅನುಭವಿಸಿತು.
ಟಾಸ್‌ ಸೋತರೂ ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡ ಪೃಥ್ವಿ ಶಾ (66; 41 ಎಸೆತ, 4 ಸಿಕ್ಸರ್, 4 ಬೌಂಡರಿ), ಶ್ರೇಯಸ್ ಅಯ್ಯರ್ (ಔಟಾಗದೆ 88; 38 ಎ, 6 ಸಿ, 7 ಬೌಂ) ಮತ್ತು ರಿಷಭ್ ಪಂತ್‌(38; 17ಎ, 1 ಸಿ, 5 ಬೌಂ) ಅವರ ಅಮೋಘ ಬ್ಯಾಟಿಂಗ್ ಪ್ರದರ್ಶನದ ನೆರವಿನಿಂದನಿಗದಿತ 20 ಓವರ್‌ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 228 ರನ್ ಗಳಿಸಿತ್ತು.
ಈ ಗುರಿ ಬೆನ್ನತ್ತಿದ ಕೆಕೆಆರ್ ಪರ ಆರಂಭದಲ್ಲಿ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ಮೂಡಿ ಬರಲಿಲ್ಲ. ಈ ತಂಡ 122 ಆಗುವಷ್ಟರಲ್ಲಿ ಪ್ರಮುಖ ಆರು ವಿಕೆಟ್ ಕಳೆದುಕೊಂಡಿತ್ತು. ಹೀಗಾಗಿ ಡೆಲ್ಲಿ ತಂಡಸುಲಭ ಗೆಲುವಿನ ಲೆಕ್ಕಾಚಾರದಲ್ಲಿತ್ತು. ಆದರೆ,ರಾಹುಲ್ ತ್ರಿಪಾಠಿ ಮತ್ತು ಎಯೋನ್ ಮಾರ್ಗನ್‌ ಅದಕ್ಕೆ ಅವಕಾಶ ನೀಡಲಿಲ್ಲ. ಈ ಜೋಡಿ 7ನೇ ವಿಕೆಟ್ ಜೊತೆಯಾಟದಲ್ಲಿ ಕೇವಲ 36 ಎಸೆತಗಳಲ್ಲಿ 78 ರನ್ ಕಲೆಹಾಕಿತು.
18 ಎಸೆತಗಳನ್ನು ಎದುರಿಸಿದ ಮಾರ್ಗನ್‌ 1 ಬೌಂಡರಿ ಮತ್ತು 5 ಸಿಕ್ಸರ್ ಸಹಿತ 44 ರನ್ ಗಳಿಸಿದರೆ, 16 ಎಸೆತಗಳನ್ನು ಆಡಿದ ತ್ರಿಪಾಠಿ 3 ಬೌಂಡರಿ ಮತ್ತು 3 ಸಿಕ್ಸರ್‌ಗಳಿದ್ದ 36 ರನ್ ಚಚ್ಚಿದರು. ಕೊನೆಯ ಹಂತದಲ್ಲಿ ಈ ಇಬ್ಬರು ವಿಕೆಟ್ ಒಪ್ಪಿಸಿದ್ದುಕೆಕೆಆರ್‌ಗೆ ಮುಳುವಾಯಿತು.ಇದಕ್ಕೂ ಮೊದಲು ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ ನಿತೀಶ್‌ ರಾಣಾಅರ್ಧಶತಕ (58) ಗಳಿಸಿ ಹೋರಾಟ ನಡೆಸಿದ್ದರು.
ಡೆಲ್ಲಿ ಪರ ಎನ್ರಿಚ್‌ ನೋರ್ಟ್ಜೆ 33 ರನ್ ನೀಡಿ 3 ವಿಕೆಟ್, ಹರ್ಷಲ್‌ ಪಟೇಲ್‌ 34ಕ್ಕೆ 2 ವಿಕೆಟ್ ಪಡೆದರೆ, ಕಗಿಸೊ ರಬಾಡ, ಮಾರ್ಕಸ್‌ ಸ್ಟೋಯಿನಸ್‌, ಅಮಿತ್‌ ಶಾ ತಲಾ ಒಂದೊಂದು ವಿಕೆಟ್ ಉರುಳಿಸಿದರು.
ಈ ಗೆಲುವಿನೊಂದಿಗೆ ಡೆಲ್ಲಿ ತಂಡ ಪಾಯಿಂಟ್ಸ್‌ ಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದೆ. ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು, ಮುಂಬೈ ಇಂಡಿಯನ್ಸ್‌ ಮತ್ತು ಸನ್‌ರೈಸರ್ಸ್‌ ತಂಡಗಳು ಕ್ರಮವಾಗಿ 2, 3 ಮತ್ತು 4ನೇಸ್ಥಾನಗಳಲ್ಲಿವೆ.
ಈ ಪಂದ್ಯದಲ್ಲಿ ಒಟ್ಟು 438 ರನ್ ಹರಿದು ಬಂದವು. ಜೊತೆಗೆ 28 ಸಿಕ್ಸರ್ ಮತ್ತು 30 ಬೌಂಡರಿ ದಾಖಲಾದವು.
Match 16. It's all over! Delhi Capitals won by 18 runs https://t.co/IEtqc02AGz #DCvKKR #Dream11IPL #IPL2020
— IndianPremierLeague (@IPL) October 3, 2020
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.