ಕ್ರೈಸ್ಟ್‌ಚರ್ಚ್, ನ್ಯೂಜಿಲೆಂಡ್: ಭಾನುವಾರ ನ್ಯೂಜಿಲೆಂಡ್ ಎದುರಿನ ಕೊನೆಯ ಟಿ20 ಪಂದ್ಯದಲ್ಲಿ ಇಫ್ತಿಕಾರ್ ಅಹಮದ್ ಪಾಕಿಸ್ತಾನ ತಂಡಕ್ಕೆ ಅಚ್ಚರಿಯ ಗೆಲುವಿನ ಕಾಣಿಕೆ ನೀಡಿದರು.
ಆಫ್‌ಬ್ರೇಕ್ ಬೌಲರ್ ಇಫ್ತಿಕಾರ್ ಕಳೆದ ಎಂಟು ಟಿ20 ಪಂದ್ಯಗಳಲ್ಲಿ ಬೌಲಿಂಗ್ ಮಾಡಿರಲಿಲ್ಲ. ಆದರೆ ಇಲ್ಲಿ ಅವರು ಮೂರು ವಿಕೆಟ್ ಉರುಳಿಸಿ ಪಾಕ್ ತಂಡಕ್ಕೆ 42 ರನ್‌ಗಳ ಜಯ ತಂದುಕೊಟ್ಟರು. ಇದರಿಂದಾಗಿ ಐದು ಪಂದ್ಯಗಳ ಸರಣಿಯನ್ನು ಕ್ಲೀನ್‌ಸ್ವೀಪ್ ಮಾಡಿಕೊಳ್ಳುವ ಆತಿಥೇಯರ ಆಸೆ ಕಮರಿತು. ಕಿವೀಸ್ 4–1ರಿಂದ ಸರಣಿ ತನ್ನದಾಗಿಸಿಕೊಂಡಿತು.
ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಪಾಕ್ ತಂಡವು 8 ವಿಕೆಟ್‌ಗಳಿಗೆ 134 ರನ್‌ ಗಳಿಸಿತು. ಈ ಸಾಧಾರಣ ಮೊತ್ತವನ್ನು ಬೆನ್ನಟ್ಟಿದ ಕಿವೀಸ್ ಬಳಗವು 17.2 ಓವರ್‌ಗಳಲ್ಲಿ 92 ರನ್‌ ಗಳಿಸಿ ಎಲ್ಲ ವಿಕೆಟ್ ಕಳೆದುಕೊಂಡಿತು.
