ಕೋಲ್ಕತ್ತ: ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್ ಪ್ರೇರಕ್ ಮಂಕಡ್ ಗಳಿಸಿದ ಅಮೋಘ ಶತಕದ ನೆರವಿನಿಂದ ಸೌರಾಷ್ಟ್ರ ತಂಡ ವಿಜಯ್ ಹಜಾರೆ ಟ್ರೋಫಿ ಕ್ರಿಕೆಟ್ ಟೂರ್ನಿಯಲ್ಲಿ ಚಂಡೀಗಢವನ್ನು 62 ರನ್‌ಗಳಿಂದ ಮಣಿಸಿತು.
ಈಡನ್ ಗಾರ್ಡನ್ಸ್‌ನಲ್ಲಿ ನಡೆದ ಪಂದ್ಯದಲ್ಲಿ ಪ್ರೇರಕ್ ಆರು ಸಿಕ್ಸರ್ ಮತ್ತು 16 ಬೌಂಡರಿಗಳೊಂದಿಗೆ 130 ಎಸೆತಗಳಲ್ಲಿ 174 ರನ್ ಕಲೆ ಹಾಕಿದರು. ಇದರಿಂದ 7ಕ್ಕೆ 388 ರನ್ ಗಳಿಸಿದ ಸೌರಾಷ್ಟ್ರ ಎದುರಾಳಿಗಳನ್ನು 326 ರನ್‌ಗಳಿಗೆ ನಿಯಂತ್ರಿಸಿತು.
ಶ್ರೇಯಸ್ ಅಯ್ಯರ್ ಶತಕ ಜೈಪುರದಲ್ಲಿ ನಡೆದ ಪಂದ್ಯದಲ್ಲಿ ನಾಯಕ ಶ್ರೇಯಸ್ ಅಯ್ಯರ್ (116; 103 ಎಸೆತ, 11 ಬೌಂಡರಿ, 3 ಸಿಕ್ಸರ್) ಅವರ ಅಮೋಘ ಶತಕ ಮತ್ತು ವೇಗಿ ಶಾರ್ದೂಲ್ ಠಾಕೂರ್ ಅವರ ಪರಿಣಾಮಕಾರಿ ಬೌಲಿಂಗ್ ನೆರವಿನಿಂದ ಮುಂಬೈ ತಂಡ ರಾಜಸ್ಥಾನವನ್ನು 67 ರನ್‌ಗಳಿಂದ ಮಣಿಸಿತು.
ಚೆನ್ನೈನಲ್ಲಿ ನಡೆದ ಪಂದ್ಯಲ್ಲಿ ಲೆಗ್ ಸ್ಪಿನ್ನರ್ ದಿಕ್ಷಾಂಶು ನೇಗಿ ಅವರ ದಾಳಿಗೆ ನಲುಗಿದ ಮಿಜೋರಾಂ ತಂಡ ಉತ್ತರಾಖಂಡಕ್ಕೆ ಎಂಟು ವಿಕೆಟ್‌ಗಳಿಂದ ಮಣಿಯಿತು.
