ಅಮೆರಿಕ ವಿರುದ್ಧ ಶೋಚನೀಯ ಆಟ: ಪಾಕ್ ಮಾಜಿ ವೇಗಿ ವಾಸಿಂ ಅಕ್ರಮ್ ಕಿಡಿ

ಪಾಕಿಸ್ತಾನ ಮತ್ತು ಅಮೆರಿಕ ತಂಡಗಳು ನಿಗದಿತ 20 ಓವರುಗಳಲ್ಲಿ ತಲಾ 159 ರನ್‌ ಗಳಿಸಿದ್ದವು. ಸೂಪರ್‌ ಓವರ್‌ನಲ್ಲಿ ಗಳಿಸಿದ 18 ರನ್‌ಗಳನ್ನು ಅಮೆರಿಕ ಯಶಸ್ವಿಯಾಗಿ ರಕ್ಷಿಸಿಕೊಂಡಿತ್ತು.

‘ಪಾಕಿಸ್ತಾನದ್ದು ನಿರಾಶಾದಾಯಕ ಪ್ರದರ್ಶನ. ಸೋಲು– ಗೆಲುವು ಆಟದ ಭಾಗ. ಆದರೆ ಕೊನೆಯ ಎಸೆತದವರೆಗೆ ಹೋರಾಟ ನೀಡಬೇಕಿತ್ತು. ಪಾಕಿಸ್ತಾನ ಕ್ರಿಕೆಟ್‌ಗೆ ಇದು ಕೆಟ್ಟ ದಿನ’ ಎಂದು ಸ್ಟಾರ್‌ ಸ್ಪೋರ್ಟ್ಸ್‌ಗೆ ತಿಳಿಸಿದ್ದಾರೆ.

ಪಾಕ್ ತಂಡದ ಹಾದಿ ಇನ್ನು ಮುಂದೆ ಕಠಿಣವಾಗಲಿದೆ. ಆ ತಂಡವು ಭಾರತ ವಿರುದ್ಧ (ಜೂ. 9) ಆಡಬೇಕಾಗಿದೆ. ನಂತರ ಇನ್ನೆರಡು ಉತ್ತಮ ತಂಡಗಳ (ಐರ್ಲೆಂಡ್‌, ಕೆನಡ) ಜೊತೆಯೂ ಸೆಣಸಬೇಕಿದೆ ಎಂದರು.

‘ಅಮೆರಿಕವು, ಪಾಕಿಸ್ತಾನದ ವಿಕೆಟ್‌ಗಳನ್ನು ಆರಂಭದಲ್ಲೇ ಗಳಿಸಿದ್ದು ಪಂದ್ಯಕ್ಕೆ ತಿರುವು ನೀಡಿತು. ಬಾಬರ್‌ ಮತ್ತು ಶದಾಬ್ ನಡುವೆ ಜೊತೆಯಾಟ ಬಂದರೂ, ಆಮೇಲೆ ಯಾರೂ ಸರಿಯಾಗಿ ಆಡಲಿಲ್ಲ. ಫೀಲ್ಡಿಂಗ್‌ ಕಳಪೆಯಾಗಿತ್ತು. ಒಟ್ಟಾರೆ ಆಡಿದ ರೀತಿಯೇ ನಿರಾಶಾದಾಯಕವಾಗಿತ್ತು’ ಎಂದು ಹೇಳಿದರು.‌

ಸೂಪರ್‌ ಓವರ್‌ನಲ್ಲಿ ಅಮೆರಿಕ 19 ರನ್‌ ಗಳಿಸಿದ್ದು ಪಾಕ್‌ ತಂಡಕ್ಕೆ ದುಬಾರಿಯಾಯಿತು. ಅಮೆರಿಕ ನಾಯಕ ಮೊನಾಂಕ್ ಪಟೇಲ್ ಆಟವನ್ನು ಪ್ರಶಂಸಿಸಿದ ಅಕ್ರಮ್‌, ಅವರು ತಮ್ಮ ಬೌಲಿಂಗ್ ಸಂಪನ್ಮೂಲವನ್ನು ಉತ್ತಮ ರೀತಿ ಬಳಸಿದರಲ್ಲದೇ, ಆಕರ್ಷಕ ಅರ್ಧ ಶತಕ ಗಳಿಸಿದರು. ಅಮೆರಿಕದ ಫೀಲ್ಡಿಂಗ್ ಚೆನ್ನಾಗಿತ್ತು’ ಎಂದು ಹೊಗಳಿಸಿದರು.