ದುಬೈ: ಇದೇ ಅಕ್ಟೋಬರ್‌ನಲ್ಲಿ ನಡೆಯಬೇಕಿದ್ದ ಟ್ವೆಂಟಿ–20 ವಿಶ್ವಕಪ್ ಟೂರ್ನಿಯನ್ನು ಮುಂದಿನ ವರ್ಷಕ್ಕೆ ಮುಂದೂಡಲಾಗಿದೆ. ಈ ಟೂರ್ನಿಯ ಪಂದ್ಯಗಳ ಟಿಕೆಟ್‌ಗಳು ಮುಂದಿನ ವರ್ಷಕ್ಕೆ ಬಳಸಬಹುದು ಎಂದು ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ತಿಳಿಸಿದೆ.
ಸೋಮವಾರ ನಡೆದ ಐಸಿಸಿ ಸಭೆಯಲ್ಲಿ ಟಿ20 ವಿಶ್ವಕಪ್ ಟೂರ್ನಿಯನ್ನು ಮುಂದೂಡಲು ನಿರ್ಧರಿಸಲಾಯಿತು. ಆಸ್ಟ್ರೇಲಿಯಾದಲ್ಲಿ ಈ ಟೂರ್ನಿ ಆಯೋಜಿಸಲಾಗಿತ್ತು. ಮುಂದಿನ ವರ್ಷವೂ ಅಲ್ಲಿಯೇ ಟೂರ್ನಿ ನಡೆದರೆ ಮಾತ್ರ ಟಿಕೆಟ್‌ಗಳ ಮೌಲ್ಯ ಇರುತ್ತದೆ.
’2022ರಲ್ಲಿ ಟೂರ್ನಿಯು ಮುಂದೂಡಲಾದರೆ ಅಥವಾ ಒಂದೊಮ್ಮೆ ಭಾರತದಲ್ಲಿ ಟೂರ್ನಿ ನಡೆದರೆ ಈ ಟಿಕೆಟ್‌ಗಳ ಹಣವನ್ನು ಮರುಪಾವತಿ ಮಾಡಲಾಗುವುದು‘ ಎಂದು ಐಸಿಸಿ ತಿಳಿಸಿದೆ.
ಹಣ ವಾಪಾಸ್ ಪಡೆಯುವವರು ಡಿಸೆಂಬರ್ 15ರವರೆಗೆ ಆನ್‌ಲೈನ್ ಅರ್ಜಿ ಸಲ್ಲಿಸಬಹುದು. ಮೂವತ್ತು ದಿನಗಳವರೆಗೆ ಮರುಪಾವತಿ ಮಾಡಲಾಗುವುದು.
