ರೋಮ್: ಫ್ರಾನ್ಸ್‌ ದೇಶದ ಫುಟ್‌ಬಾಲ್ ತಾರೆ ಪಾಲ್ ಪೊಗ್ಬಾ ಅವರಿಗೆ ಉದ್ದೀಪನ ಮದ್ದು ಸೇವನೆ ಪ್ರಕರಣದಲ್ಲಿ ನಾಲ್ಕು ವರ್ಷ ನಿಷೇಧ ಹಾಕಲಾಗಿದೆ.
ಇಟಲಿಯ ಆ್ಯಂಟಿ ಡೋಪಿಂಗ್ ಟ್ರಿಬ್ಯುನಲ್ ಗುರುವಾರ ಈ ಶಿಕ್ಷೆ ಪ್ರಕಟಿಸಿತು.
ಹೋದ ವರ್ಷದ ಆಗಸ್ಟ್‌ನಲ್ಲಿ ಯುವೆಂಟಸ್ ಕ್ಲಬ್‌ನಲ್ಲಿ ಆಡಿದ್ದ ಪಾಲ್ ಅವರನ್ನು ಉದ್ದೀಪನ ಮದ್ದು ಸೇವನೆ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಅವರು ನಿಷೇಧಿತ ಟೆಸ್ಟೊಸ್ಟಿರಾನ್ ಸೇವನೆ ಮಾಡಿದ್ದು ಸಾಬೀತಾಗಿತ್ತು. ಸೆಪ್ಟೆಂಬರ್‌ನಲ್ಲಿ ಅವರನ್ನು ತಾತ್ಕಾಲಿಕ ಅಮಾನತು ಮಾಡಲಾಗಿತ್ತು.
‘ಟ್ರಿಬ್ಯುನಲ್‌ನಲ್ಲಿಂದ ಅಧಿಸೂಚನೆಯನ್ನು ಇಂದು ಬೆಳಿಗ್ಗೆ ಸ್ವೀಕರಿಸಿದ್ದೇವೆ‘ ಎಂದು ಪಾಲ್ ಅವರ ವಕ್ತಾರ ತಿಳಿಸಿದ್ದಾರೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಪಾಲ್, ‘ನನಗೆ ಆಘಾತ ಮತ್ತು ದುಃಖವಾಗಿದೆ. ನಾನು ಕಷ್ಟಪಟ್ಟು ನಿರ್ಮಿಸಿಕೊಂಡ ವೃತ್ತಿಜೀವನವನ್ನು ನನ್ನಿಂದ ಕಿತ್ತುಕೊಳ್ಳಲಾಗಿದೆ. ತೀರ್ಪು ಸರಿಯಿಲ್ಲ. ನಾನು ಮೇಲ್ಮನವಿ ಸಲ್ಲಿಸುತ್ತೇನೆ’ ಎಂದಿದ್ದಾರೆ.
