ಕೋಲ್ಕತ್ತ: ಏಷ್ಯನ್ ಗೇಮ್ಸ್ ಕಂಚಿನ ಪದಕ ವಿಜೇತ ಭಾರತ ಫುಟ್ಬಾಲ್ ತಂಡದ ಆಟಗಾರ ಸುಭಾಸ್ ಭೌಮಿಕ್ (72) ಶನಿವಾರ ಬೆಳಿಗ್ಗೆ ನಿಧನರಾದರು.
ಅವರು ಕೆಲವು ತಿಂಗಳುಗಳಿಂದ ಮೂತ್ರಪಿಂಡದ ಸಮಸ್ಯೆಯಿಂದ ಬಳಲುತ್ತಿದ್ದರು. ಅವರಿಗೆ ಪತ್ನಿ, ಮಗ ಮತ್ತು ಮಗಳು ಇದ್ದಾರೆ.
‘ಕಳೆದ ಮೂರುವರೆ ತಿಂಗಳುಗಳಿಂದ ಅವರಿಗೆ ಡಯಾಲಿಸಿಸ್ ಚಿಕಿತ್ಸೆ ನೀಡಲಾಗುತ್ತಿತ್ತು. 23 ವರ್ಷಗಳ ಹಿಂದೆ ಅವರು ಹೃದಯದ ಬೈಪಾಸ್ ಶಸ್ತ್ರಚಿಕಿತ್ಸೆಗೂ ಒಳಗಾಗಿದ್ದರು. ಈಚೆಗೆ ಎದೆಯ ಸೋಂಕಿನಿಂದ ಬಳಲಿದ್ದ ಅವರನ್ನುಇಕ್ಬಾಲ್ಪುರದ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿತ್ತು’ ಎಂದು ಅವರ ಕುಟುಂಬದ ಸದಸ್ಯರೊಬ್ಬರು ತಿಳಿಸಿದ್ದಾರೆ.
1970ರ ಏಷ್ಯನ್ ಗೇಮ್ಸ್ನಲ್ಲಿ ಆಡಿದ್ದ ಭಾರತ ತಂಡದಲ್ಲಿ ಅವರಿದ್ದರು. ‘ಬುಲ್ಡೋಜರ್’ ಎಂದೇ ಖ್ಯಾತರಾಗಿದ್ದ ಸುಭಾಷ್ ಮತ್ತು ಅವರೊಂದಿಗೆ ಸುಧೀರ್ ಕರ್ಮಾಕರ್ ಅವರು ರೈಟ್ ಬ್ಯಾಕ್ನಲ್ಲಿ ಅಮೋಘವಾಗಿ ಆಡಿದ್ದರು.
60 ಮತ್ತು 70ರ ದಶಕದಲ್ಲಿ ಖ್ಯಾತನಾಮ ಅಂತರರಾಷ್ಟ್ರೀಯ ಫುಟ್ಬಾಲ್ ಆಟಗಾರರಾಗಿದ್ದ ಪ್ರದೀಪ್ ಬ್ಯಾನರ್ಜಿ, ಚುನಿ ಗೋಸ್ವಾಮಿ, ತುಳಸಿದಾಸ್ ಬಲರಾಮ್, ಜರ್ನೈಲ್ ಸಿಂಗ್, ಅರುಣ್ ಘೋಷ್, ಪೀಟರ್ ತಂಗರಾಜ್ ಅವರೊಂದಿಗೆ ಭೌಮಿಕ್ ಅವರದ್ದು ಗಣನೀಯ ಸಾಧನೆಯಾಗಿದೆ.
ಭಾರತ ತಂಡದಲ್ಲಿ ಅವರು 24 ಪಂದ್ಯಗಳನ್ನು ಆಡಿದ್ದಾರೆ. 9 ಗೋಲುಗಳನ್ನು ಹೊಡೆದಿದ್ದಾರೆ. ಮೆರ್ಡೆಕಾ ಕಪ್ ಟೂರ್ನಿಯಲ್ಲಿ ಅವರು ಹ್ಯಾಟ್ರಿಕ್ ಸಾಧನೆ ಮಾಡಿದ್ದರು.