ನವದೆಹಲಿ: ಭುವನೇಶ್ವರದ ಕಳಿಂಗ ಕ್ರೀಡಾಂಗಣದಲ್ಲಿ ಇದೇ 12 ರಿಂದ 30ರವರೆಗೆ ನಡೆಯಲಿರುವ ಸೀನಿಯರ್ ಪುರುಷರ ಹಾಕಿ ತರಬೇತಿ ಶಿಬಿರಕ್ಕೆ 28 ಮಂದಿ ಸಂಭವನೀಯ ಆಟಗಾರರನ್ನು ಹಾಕಿ ಇಂಡಿಯಾ ಆಯ್ಕೆ ಮಾಡಿದೆ. ಈ ಪಟ್ಟಿಯಲ್ಲಿರುವ ಆಟಗಾರರೆಲ್ಲ ಅನುಭವಿಗಳಾಗಿದ್ದಾರೆ.
ಈ ವರ್ಷದ ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಸಿದ್ಧತೆಯಲ್ಲಿರುವ ಭಾರತ ತಂಡಕ್ಕೆ ಈ ಶಿಬಿರ ಅಂತಿಮ ಸ್ಪರ್ಶ ನೀಡಲು ನೆರವಾಗಲಿದೆ. ಎಫ್‌ಐಎಚ್‌ ಪ್ರೊ ಲೀಗ್‌ ಪಂದ್ಯದಲ್ಲಿ ಉತ್ತಮ ಸಾಧನೆಯೊಡನೆ ತಂಡದ ಆಟಗಾರರು ಶಿಬಿರ ಸೇರಿಕೊಳ್ಳಲಿದ್ದಾರೆ. ಭುವನೇಶ್ವರ ಮತ್ತು ರೂರ್ಕೆಲಾ ಲೆಗ್‌ಗಳಲ್ಲಿ ಭಾರತ ಎಂಟು ಪಂದ್ಯಗಳಿಂದ 15 ಪಾಯಿಂಟ್ಸ್ ಕಲೆಹಾಕಿದ್ದು, ಪ್ರಸ್ತುತ ಮೂರನೇ ಸ್ಥಾನದಲ್ಲಿದೆ.
ಲೀಗ್‌ ಮೇ 22ರಂದು ಆ್ಯಂಟ್‌ವರ್ಪ್‌ನಲ್ಲಿ (ಬೆಲ್ಜಿಯಂ) ಮುಂದುವರಿಯಲಿದೆ. ಜೂನ್‌ 1ರಂದು ಲಂಡನ್‌ ಲೆಗ್‌ ಶುರುವಾಗಲಿದೆ. ನೆದರ್ಲೆಂಡ್ಸ್‌ನಲ್ಲಿ ಅಂತಿಮ ಹಂತ ನಡೆಯಲಿದೆ.
