ವಾಟರ್‌ಪೋಲೊ: ಕರ್ನಾಟಕಕ್ಕೆ ಮುನ್ನಡೆ

ನಿಹಾರ್‌ ರಾಜೇಶ್‌ (7 ಗೋಲು) ಅವರ ಆಟದ ಬಲದಿಂದ ರಾಜ್ಯದ ಬಾಲಕರ ತಂಡವು ಹರಿಯಾಣ ತಂಡವನ್ನು 11–8ರಿಂದ ಮಣಿಸಿತು. ಕರ್ನಾಟಕದ ಎಸ್‌.ಆರ್‌. ಚಂದ್ರುವರ್ಧನ್‌ (3), ಚಿನ್ಮಯ್ ಪೈ (1) ಗೋಲು ದಾಖಲಿಸಿದರು.  

ರಾಜ್ಯದ ಬಾಲಕಿಯರ ತಂಡವು ದೆಹಲಿ ತಂಡವನ್ನು 12–5ರಿಂದ ಮಣಿಸಿತು. ರೋಷಿಣಿ ಸರವಣನ್ (3), ಲಾವಣ್ಯ ಯೋಗೇಶ್‌, ಡಿ.ಕೆ. ದೃತಿ, ಪ್ರಚೇತಾ ಆರ್‌. ರಾವ್‌ (ತಲಾ 2), ಸಿ.ನಿತ್ಯಾ, ಡಿ.ಎಂ. ನಾಗಶೇಖರ್‌, ತನ್ವಿ ರವಿ (ತಲಾ 1) ಗೋಲು ದಾಖಲಿಸಿದರು. ಕರ್ನಾಟಕದ ಬಾಲಕ ಮತ್ತು ಬಾಲಕಿಯರ ತಂಡಗಳು ತಲಾ ಮೂರು ಪಂದ್ಯಗಳನ್ನು ಆಡಿದ್ದು, ತಲಾ ಎರಡರಲ್ಲಿ ಗೆಲುವು ದಾಖಲಿಸಿವೆ.

ಬಾಲಕರ ವಿಭಾಗದ ಇತರ ಪಂದ್ಯಗಳಲ್ಲಿ ಕೇರಳ ತಂಡವು ಗುಜರಾತ್‌ ತಂಡವನ್ನು 8–3ರಿಂದ, ತಮಿಳುನಾಡು ತಂಡವು ತೆಲಂಗಾಣ ತಂಡವನ್ನು 11–1ರಿಂದ, ಬಂಗಾಲ ತಂಡವು ಪಂಜಾಬ್‌ ತಂಡವನ್ನು 16–4ರಿಂದ ಮಹಾರಾಷ್ಟ್ರ ತಂಡವು ಗುಜರಾತ್‌ ತಂಡವನ್ನು 12–6ರಿಂದ ಮಣಿಸಿತು.

ಬಾಲಕಿಯರ ವಿಭಾಗದ ಇತರ ಪಂದ್ಯಗಳಲ್ಲಿ ಕೇರಳ ತಂಡವು ತಮಿಳುನಾಡು ತಂಡವನ್ನು 12–2ರಿಂದ, ಮಹಾರಾಷ್ಟ್ರ ತಂಡವು ಹರಿಯಾಣ ತಂಡವನ್ನು 17–1ರಿಂದ, ಬಂಗಾಲ ತಂಡವು ತೆಲಂಗಾಣ ತಂಡವನ್ನು 18–5ರಿಂದ ಸೋಲಿಸಿತು.