ಪ್ಯಾರಿಸ್: ಪ್ಯಾಂಟ್ ಜೇಬಿನಲ್ಲಿ ಕೈ, ಯಾವುದೇ ಕ್ರೀಡಾ ಸಾಮಗ್ರಿಗಳಿಲ್ಲದೆ ಸಾಮಾನ್ಯ ಕನ್ನಡಕ, ಸರಳ ಉಡುಪು ಹಾಗೂ ನಿರಾಳ ಭಾವ... ಬಲಗೈಯಲ್ಲಿ ಪಿಸ್ತೂಲ್ ಹಿಡಿದು ಗುರಿ ಇಟ್ಟರೆ ಅಷ್ಟೂ ಗುರಿಗೆ. ಟರ್ಕಿಯ ಶೂಟರ್ ಯೂಸುಫ್ ಡಿಕೆಕ್ ಈ ಬಾರಿ ಪ್ಯಾರಿಸ್ ಒಲಿಂಪಿಕ್ಸ್ನ 10 ಮೀಟರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಬೆಳ್ಳಿ ಗೆಲ್ಲುವ ಮೂಲಕ ಕ್ರೀಡಾಲೋಕ ಅಷ್ಟೇ ಅಲ್ಲದೇ ಸಾಮಾಜಿಕ ಮಾಧ್ಯಮಗಳಲ್ಲೂ ಭಾರೀ ಗಮನ ಸೆಳೆದಿದ್ದಾರೆ.
ಯೂಸುಫ್ ಅವರ ಈ ಶೂಟಿಂಗ್ ಶೈಲಿ ಮಾತ್ರ ಚರ್ಚಿತ ವಿಷಯವಾಗದೆ, ಒಲಿಂಪಿಕ್ಸ್ ಇತಿಹಾಸದಲ್ಲೇ ಟರ್ಕಿಗೆ ಶೂಟಿಂಗ್ನಲ್ಲಿ ಮೊದಲ ಪದಕ ತಂದು ಕೊಡುವ ಮೂಲಕವೂ ಸುದ್ದಿಯಾಗಿದ್ದಾರೆ.
ಟರ್ಕಿಯ ತಸೊಲುಕ್ ಗ್ರಾಮದಲ್ಲಿ 1973ರಲ್ಲಿ ಜನಿಸಿದ ಯೂಸುಫ್, ಸೇನಾ ಶಾಲೆಯ ವಿದ್ಯಾರ್ಥಿ. ಶಿಕ್ಷಣದ ನಂತರ ಸಾರ್ಜೆಂಟ್ ಆಗಿ ನೇಮಕೊಂಡ ಅವರು, ನಂತರ ಇಸ್ತಾನ್ಬುಲ್ನಲ್ಲಿರುವ ಕ್ರೀಡಾ ಕ್ಲಬ್ ಸೇರಿದರು.
