ಅಸಾಮಾನ್ಯ ಛಲದ ಓಟಗಾರ ಟೆರ್‍ರಿ ಫಾಕ್ಸ್
ಉತ್ತರ ಅಮೆರಿಕ ಖಂಡದ ಕೆನಡಾ ದೇಶದಲ್ಲಿ ಅರವತ್ತು ವರ್ಷಗಳ ಹಿಂದೆ ಟೆರ್‍ರಿ ಫಾಕ್ಸ್ ಎಂಬ ತರುಣನಿದ್ದ. ಅವನು ಉತ್ತಮ ಓಟಗಾರನಾಗಿದ್ದ. ಹದಿನೆಂಟನೇ ವಯಸ್ಸಿಗೇ ಅವನು ಅನೇಕ ಪ್ರಶಸ್ತಿಗಳನ್ನು ಗೆದ್ದುಕೊಂಡು ಅಸಾಮಾನ್ಯ ಅಥ್ಲೀಟ್‌ ಎಂದು ಹೆಸರು ಮಾಡಿದ್ದ. ಅವನಿಗೆ ಮ್ಯಾರಥಾನ್ ಓಟದಲ್ಲಿ ಭಾಗವಹಿಸಿ ಸ್ವರ್ಣ ಪದಕ ಗೆಲ್ಲಬೇಕೆಂಬ ಮಹತ್ವಾಕಾಂಕ್ಷೆ ಇತ್ತು.
ಆದರೆ ಅವನ ದುರದೃಷ್ಟ; ಆ ಚಿಕ್ಕವಯಸ್ಸಿಗೇ ಅತ್ಯಂತ ಮಾರಕ ಆಸ್ಟಿಯೋಜೆನಿಕ್ ಸರ್ಕೋಮಾ ಎಂಬ ಕ್ಯಾನ್ಸರ್ ರೋಗಕ್ಕೆ ತುತ್ತಾದ. ಆ ಕ್ಯಾನ್ಸರ್ ಮಾರಿ ಅವನ ಬಲಗಾಲಿನ ಮೊಣಕಾಲಿನ ಮೇಲೆ ಅರ್ಧ ಅಡಿಯಷ್ಟು ಮೂಳೆಯನ್ನು ತಿಂದು ಹಾಕಿತು. ಕ್ಯಾನ್ಸರ್ ದೇಹದ ಬೇರೆ ಭಾಗಕ್ಕೆ ಹರಡುವುದನ್ನು ತಡೆಯಲು ಕಾಲಿನ ಆ ಭಾಗವನ್ನು ವೈದ್ಯರು ಕತ್ತರಿಸಿ ಹಾಕಿದರು.
ಟೆರ್‍ರಿ ಫಾಕ್ಸ್ ಕೆಲ ಕಾಲ ಖಿನ್ನತೆಗೊಳಗಾದ. ಆದರೆ ಅವನ ತಂದೆ–ತಾಯಿ, ಬಂಧು ಬಾಂಧವರು, ಗೆಳೆಯ– ಗೆಳತಿಯರು ಅವನಲ್ಲಿ ಧೈರ್ಯ ತುಂಬಿದರು. ‘ಹೀಗೇ ಕೊರಗುತ್ತಾ ಕೂತಿರದೆ ಮುಂದೆ ಏನು ಮಾಡಬೇಕು ಎಂಬುದರ ಬಗ್ಗೆ ಆಲೋಚನೆ ಮಾಡು, ನಾವೆಲ್ಲಾ ಒತ್ತಾಸೆಯಾಗಿ ನಿಲ್ಲುತ್ತೇವೆ’ ಎಂದು ಹುರಿದುಂಬಿಸಿದರು. ಆಗಿನ ಕಾಲದಲ್ಲಿ ವೈದ್ಯಕೀಯ ವಿಜ್ಞಾನ ಈಗಿನಷ್ಟು ಮುಂದುವರೆದಿರಲಿಲ್ಲ. ವೈದ್ಯರು ಒಂದು ಕೋಲಿಗೆ ಶೂ ಸೇರಿಸಿಕೊಟ್ಟರು. ಅದರಲ್ಲಿಯೇ ಬಲಗಾಲನ್ನಿಳಿಸಿದ ಟೆರ್‍ರಿ ಫಾಕ್ಸ್ ಒಂಟಿಗಾಲಿನಿಂದಲೇ ತನ್ನ ಮ್ಯಾರಥಾನ್ ಓಟ ಪ್ರಾರಂಭಿಸಿಯೇ ಬಿಟ್ಟ!
ಈ ಮ್ಯಾರಾಥಾನ್‌ನಲ್ಲಿ ಇಡೀ ಕೆನಡಾ ಸುತ್ತುವ ಮತ್ತು ಕೆನಡಾದ ಪ್ರತಿ ವ್ಯಕ್ತಿಯಿಂದ ತಲಾ ಒಂದು ಡಾಲರ್ ಸಂಗ್ರಹಿಸಿ ಆ ಹಣದಿಂದ ಮೂಳೆ ಕ್ಯಾನ್ಸರ್ ಕುರಿತ ಸಂಶೋಧನಾ ಕೇಂದ್ರ ಆರಂಭಿಸಬೇಕು ಎಂಬ ಮಹದಾಸೆ ಅವನ ಮನಸ್ಸಿನಲ್ಲಿ ಮೂಡಿತು.
ವಾರಾಂತ್ಯದ ದಿನಗಳಲ್ಲಿ ಕುಂಟುತ್ತಲೇ ದಿನವೊಂದಕ್ಕೆ ಸರಾಸರಿ ನಲವತ್ತೆರಡು ಕಿ.ಮೀ.ಗಳಷ್ಟು ದೂರವನ್ನು ಟೆರ್‍ರಿ ಫಾಕ್ಸ್ ಓಡಿದ. ಅವನ ಛಲ ಮತ್ತು ಸಾಹಸಗಳನ್ನು ಕಂಡು ಇಡೀ ಕೆನಡಾ ದೇಶ ನಿಬ್ಬೆರಗಾಯಿತು.
1980ರ ಏಪ್ರಿಲ್ ತಿಂಗಳಲ್ಲಿ ಮ್ಯಾರಾಥಾನ್ ಓಟ ಪ್ರಾರಂಭಿಸಿದ ಅವನು ದಿನವೊಂದಕ್ಕೆ ಅಂದಾಜು 42 ಕಿ.ಮೀ ಓಡುತ್ತಿದ್ದ. 143 ದಿನಗಳ ಅವಧಿಯಲ್ಲಿ ಒಟ್ಟು 5,373 ಕಿ.ಮೀ. ದೂರ ಓಡಿ, ಓಟ ನಿಲ್ಲಿಸಿದ. ದಾರಿಯ ಮಧ್ಯೆ ಭೇಟಿಯಾದ ಕೆನಡಾ ನಿವಾಸಿಗಳಿಂದ ದೊಡ್ಡ ಪ್ರಮಾಣದ ಚಂದಾ ಹಣ ಸಂಗ್ರಹಿಸಿದ್ದ.
ಆದರೆ ಇಷ್ಟು ಹಣ ಸಾಕಾುತ್ತಿರಲಿಲ್ಲ. ಈ ವೇಳೆಗಾಗಲೇ ಟೆರ್‍ರಿ ಫಾಕ್ಸ್‌ನ ಅಭಿಮಾನಿ ಸಂಘಗಳು ಕೆನಡಾದ ಕೆಲವು ಭಾಗಗಳಲ್ಲಿ ಹುಟ್ಟಿಕೊಂಡಿದ್ದವು. ಅವುಗಳ ಪ್ರಮುಖರೂ ಸಹ ಅಂಗ ವಿಕಲರೂ, ಕ್ಯಾನ್ಸರ್ ಪೀಡಿತರೂ ಆಗಿದ್ದರು. ಅವರೂ ಮ್ಯಾರಾಥಾನ್ ಓಟಗಳನ್ನು ನಡೆಸಿ, ಅತ್ಯಂತ ಅಪರೂಪವೂ ಮತ್ತು ಮಾರಕವೂ ಆಗಿದ್ದ ಮೂಳೆ ಕ್ಯಾನ್ಸರ್ ವಿರುದ್ಧ ಸಂಶೋಧನಾ ಕೇಂದ್ರವನ್ನು ಸ್ಥಾಪಿಸಲು ಮತ್ತು ಔಷಧಿಗಳನ್ನು ಕಂಡು ಹಿಡಿಯಲು ಸುಮಾರು ಮೂವತ್ತು ಮಿಲಿಯನ್ ಡಾಲರುಗಳಷ್ಟು ನಿಧಿ ಸಂಗ್ರಹಿಸಿದರು.
ಟೆರ್‍ರಿ ಫಾಕ್ಸ್ ತನ್ನ ಓಟದ ವೇಳೆಯಲ್ಲಿ ಕೆನಡಾ ರಾಜಧಾನಿ ಒಟ್ಟಾವಾಕ್ಕೂ ಹೋಗಿದ್ದ. ಆಗ ಗವರ್ನರ್ ಜನರಲ್ ಮತ್ತು‍ಪ್ರಧಾನಿ ಅವನನ್ನು ಹಾರ್ದಿಕವಾಗಿ ಸ್ವಾಗತಿಸಿ ಸಾಕಷ್ಟು ಸಹಾಯ– ಸಹಕಾರ ನೀಡಿದ್ದರು. ಟೆರ್‍ರಿ ಹೋದೆಡೆಯಲ್ಲೆಲ್ಲಾ ಆದರದ ಭವ್ಯ ಸ್ವಾಗತ ಸಿಗುತ್ತಿತ್ತು.
ಆದರೆ ಕ್ಯಾನ್ಸರ್ ಕಣಗಳು ಅವನ ದೇಹದಾದ್ಯಂತ ವ್ಯಾಪಿಸಿದ್ದವು. ಯಾವುದೇ ಔಷಧೋಪಚಾರದಿಂದಲೂ ಅವನ ಆರೋಗ್ಯದಲ್ಲಿ ಸುಧಾರಣೆ ಕಂಡು ಬರಲಿಲ್ಲ. ಕೊನೆಗೆ 1981ರ ಜೂನ್ ತಿಂಗಳಲ್ಲಿ, ತನ್ನ ಇಪ್ಪತ್ಮೂರನೇ ವಯಸ್ಸಿನಲ್ಲಿ ಟೆರ್‍ರಿ ಫಾಕ್ಸ್ ಇಹಲೋಕ ಯಾತ್ರೆ ಮುಗಿಸಿದ.
ಟೆರ್‍ರಿ ಫಾಕ್ಸ್‌ನ ನಿಧನ ವಾರ್ತೆ ತಿಳಿದೊಡನೆ ಕೆನಡಾ ಸರ್ಕಾರ ವಿಶೇಷ ಆದೇಶ ಹೊರಡಿಸಿ, ರಾಷ್ಟ್ರಧ್ವಜವನ್ನು ಅರ್ಧಕ್ಕಿಳಿಸಿ, ಆ ಧೀರ ಅಂಗವಿಕಲ ಅಥ್ಲೀಟ್‌ಗೆ ತನ್ನ ಗೌರವ ಸೂಚಿಸಿತು.
ಮೂರು ದಶಕಗಳ ಹಿಂದೆ ‘ಮ್ಯಾರಥಾನ್ ಫಾರ್ ಹೋಪ್’ ಎಂಬ ಹೆಸರಿನಲ್ಲಿ ಶುರು ಮಾಡಿದ್ದ ಟೆರ್‍ರಿ ಫಾಕ್ಸ್‌ನ ಓಟ ಇಂದಿಗೂ ಮುಂದುವರೆದಿದೆ. ಪ್ರತಿ ವರ್ಷ ಸೆಪ್ಟೆಂಬರ್ ಒಂದರಂದು ವಿಶ್ವದಾದ್ಯಂತ ಸುಮಾರು ಮೂವತ್ತು ದೇಶಗಳಲ್ಲಿ ಟೆರ್‍ರಿ ಫಾಕ್ಸ್ ಮ್ಯಾರಾಥಾನ್‌ಗಳು ನಡೆಯುತ್ತಿದ್ದು ಅವನ ಹೆಸರನ್ನು ಅಜರಾಮರವಾಗಿಸಿವೆ!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.