ಬೆಂಗಳೂರು: ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಅವರಿಗೆ ಮಂಗಳವಾರ ಬೆಳಿಗ್ಗೆ ಜನಿಸಿರುವ ಗಂಡುಮಗುವು ಮುಂದೆ ಟೆನಿಸ್ ಆಟಗಾರನಾಗುವನೋ ಆಥವಾ ಅಪ್ಪ, ಕ್ರಿಕೆಟಿಗ ಶೋಯಬ್ ಮಲಿಕ್ ಅವರಂತೆ ಕ್ರಿಕೆಟಿಗನಾಗುವನೋ ಎಂಬ ಬಿಸಿ ಬಿಸಿ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿದೆ.
ಬೆಳಿಗ್ಗೆ ತಾವು ಗಂಡುಮಗುವಿನ ತಂದೆಯಾದ ವಿಷಯವನ್ನು ಶೋಯಬ್ ಅವರು ಟ್ವಿಟರ್‌ನಲ್ಲಿ ಪ್ರಕಟಿಸಿದ್ದೇ ತಡ, ವಿಶ್ವದ ಹಲವು ಕ್ರಿಕೆಟಿಗರು, ಟೆನಿಸ್ ಪಟುಗಳು ಮತ್ತು ಅಭಿಮಾನಿಗಳ ಅಭಿನಂದನೆಗಳ ಮಹಾಪೂರವೇ ಹರಿಯುತ್ತಿದೆ.
ಅದರಲ್ಲಿ ಕೆಲವು ಅಭಿಮಾನಿಗಳು ಈ ಹುಡುಗ ಮುಂದೆ ತನ್ನ ಅಮ್ಮನಂತೆ ಟೆನಿಸ್ ಆಟಗಾರನೇ ಆಗುತ್ತಾನೆ ಎಂದು ಆಶಿಸಿದ್ದಾರೆ. ಇನ್ನೂ ಕೆಲವರು ಶೋಯಬ್ ಅವರಂತೆ ಕ್ರಿಕೆಟಿಗನಾಗುತ್ತಾನೆ. ಆದರೆ ಬ್ಯಾಟ್ಸ್‌ಮನ್, ಬೌಲರ್ ಅಥವಾ ಆಲ್‌ರೌಂಡರ್ ಆಗುತ್ತಾನಾ ಎಂದು ಕಾದು ನೋಡಬೇಕು ಎಂದು ಟ್ವೀಟ್ ಮಾಡಿದ್ದಾರೆ.
‘ನಮಗೆ ಗಂಡು ಮಗು ಜನಿಸಿದೆ. ದೇವರ ದಯೆಯಿಂದ ನನ್ನ ಹುಡುಗಿ (ಸಾನಿಯಾ) ಖುಷಿಯಾಗಿ ಮತ್ತು ಎಂದಿನಂತೆಯೇ ಧೈರ್ಯದಿಂದ ಇದ್ದಾಳೆ. ಶುಭಹಾರೈಸಿದ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ನಾವು ವಿನೀತರಾಗಿದ್ದೇವೆ #ಬೇಬಿಮಿರ್ಜಾಮಲ್ಲಿಕ್ ’ ಎಂದು ಶೋಯಬ್ ಟ್ವಿಟ್ ಮಾಡಿದ್ದಾರೆ.
