ನವದೆಹಲಿ: ಭಾರತ ಹಾಕಿ ತಂಡದ ಅನುಭವಿ ಗೋಲ್‌ಕೀಪರ್ ಪಿ.ಆರ್‌.ಶ್ರೀಜೇಶ್ ಅವರು ಅಂತರರಾಷ್ಟ್ರೀಯ ಹಾಕಿ ಫಡೆರೇಷನ್‌ನ (ಎಫ್‌ಐಎಚ್‌) ಅಥ್ಲೆಟಿಕ್ಸ್ ಸಮಿತಿಯ ಸದಸ್ಯರಾಗಿ ಗುರುವಾರ ಮರು ಆಯ್ಕೆಯಾಗಿದ್ದಾರೆ.
ಈ ಕುರಿತು ಶುಕ್ರವಾರ ಮಾತನಾಡಿರುವ 33 ವರ್ಷದ ಶ್ರೀಜೇಶ್ ‘ಸಹ ಆಟಗಾರರ ಧ್ವನಿಯಾಗಲು ಮತ್ತೊಂದು ಅವಕಾಶ ಸಿಕ್ಕಿದೆ‘ ಎಂದು ಹೇಳಿದ್ದಾರೆ. ವರ್ಚುವಲ್ ಮೂಲಕ ನಡೆದ ಎಫ್‌ಐಎಚ್‌ನ ಕಾರ್ಯಕಾರಿ ಮಂಡಳಿಯ ಸಭೆಯಲ್ಲಿ ಶ್ರೀಜೇಶ್ ಸೇರಿದಂತೆ ನಾಲ್ಕು ಮಂದಿಯನ್ನು ಸದಸ್ಯರಾಗಿ ಆಯ್ಕೆ ಮಾಡಲಾಯಿತು.
ರಾಷ್ಟ್ರೀಯ ತಂಡವನ್ನು ನಾಯಕರಾಗಿಯೂ ಮುನ್ನಡೆಸಿರುವ ಶ್ರೀಜೇಶ್ ಅವರು, 2017ರಿಂದ ಎಫ್‌ಐಎಚ್‌ನ ಈ ಸಮಿತಿಯಲ್ಲಿದ್ದಾರೆ.
‘ಕಳೆದ ನಾಲ್ಕು ವರ್ಷಗಳಲ್ಲಿ ನಾನು ಒಬ್ಬ ಆಟಗಾರನಾಗಿ ಬೆಳೆಯಲು ಅಷ್ಟೇ ಅಲ್ಲದೆ, ನನ್ನ ಸಹ ಆಟಗಾರರ ಅಭಿಪ್ರಾಯಗಳನ್ನು ಅರ್ಥಮಾಡಿಕೊಳ್ಳಲು, ಗಮನಿಸಲು ಮತ್ತು ವ್ಯಕ್ತಪಡಿಸಲು ಒಂದು ಅನನ್ಯ ಅವಕಾಶವನ್ನುಎಫ್‌ಐಹೆಚ್ ಅಥ್ಲೆಟಿಕ್ಸ್ ಸಮಿತಿತು ಒದಗಿಸಿದೆ‘ ಎಂದು ಶ್ರೀಜೇಶ್ ಹೇಳಿದರು.
