ಕೋವಿಡ್‌ ಭೀತಿ: ನಿಗದಿಯಂತೆ ಟೋಕಿಯೊ ಒಲಿಂಪಿಕ್ಸ್
ಟೋಕಿಯೊ: ಟೋಕಿಯೊ ಒಲಿಂಪಿಕ್ಸ್ ಸಿದ್ಧತೆಗಳು ನಿಗದಿಯಂತೆ ನಡೆಯಲಿವೆ ಎಂದು ಕೂಟದ ಸಂಘಟಕರು ಹೇಳಿದ್ದಾರೆ. ಕೊರೊನಾ ವೈರಸ್‌ ಪಿಡುಗಿನ ‘ಕಳವಳ’ ತಮಗಿದೆ ಎಂಬುದನ್ನೂ ಒಪ್ಪಿಕೊಂಡಿದ್ದಾರೆ.
ಸಂಘಟನಾ ಸಮಿತಿಯ ಕಾರ್ಯಕಾರಿ ಮಂಡಳಿಯ ಸದಸ್ಯರೊಬ್ಬರು, ಕೊರೊನಾ ವೈರಸ್‌ ಪಿಡುಗಿನ ಬಗ್ಗೆ ಪ್ರಸ್ತಾಪಿಸಿ, ಈಗಿನ ಪರಿಸ್ಥಿತಿಯಲ್ಲಿ ಕ್ರೀಡೆಯನ್ನು ಎರಡು ವರ್ಷ ಮುಂದೂಡುವುದು ಉತ್ತಮ ಆಯ್ಕೆ ಎಂದು ಸಂದರ್ಶನವೊಂದರಲ್ಲಿ ಎಚ್ಚರಿಸಿದ್ದರು.
ಇದರ ಬೆನ್ನಲ್ಲೇ ಟೋಕಿಯೊ 2020 ಅಧ್ಯಕ್ಷ ಯೊಶಿರೊ ಮೋರಿ ಈ ಹೇಳಿಕೆ ನೀಡಿದ್ದಾರೆ. ಒಲಿಂಪಿಕ್‌ ಕೂಟವನ್ನು ಮುಂದೂಡುವುದು ಅಥವಾ ರದ್ದು ಮಾಡುವುದು ‘ಊಹೆಗೆ ನಿಲುಕದ ಮಾತು’ ಎಂದು ಜಪಾನ್‌ನ ಒಲಿಂಪಿಕ್ಸ್ ಸಚಿವೆಸೀಕೊ ಹಾಶಿಮೊಟೊ, ಸಂಸದೀಯ ಸಮಿತಿ ಮುಂದೆ ಹೇಳಿದ್ದು, ಮೋರಿ ಅವರ ಮಾತುಗಳು ಇದನ್ನು ಸಮರ್ಥಿಸುವಂತಿದೆ.
ವಿಶ್ವ ಆರೋಗ್ಯ ಸಂಸ್ಥೆಯು, ಅಂತರರಾಷ್ಟ್ರೀಯ ಒಲಿಂಪಿಕ್‌ ಸಮಿತಿ ಮತ್ತು ಟೋಕಿಯೊದ ಸಂಘಟಕರೊಂದಿಗೆ ಸಮಾಲೋಚನೆಯಲ್ಲಿದ್ದು, ‘ಮುಖ್ಯ ವಿಷಯ’ಗಳನ್ನು ಪ್ರಕಟಿಸುವ ನಿರೀಕ್ಷೆಯಿದೆ.
‘ಒಲಿಂಪಿಕ್‌ ಕ್ರೀಡೆಗಳನ್ನು ಯೋಜನೆಯಂತೆ ನಡೆಸುವುದು ಸೂಕ್ತ. ಆದರೆ ಪರ್ಯಾಯ ಯೋಜನೆಯೂ ನಮ್ಮ ಮುಂದಿರಬೇಕು’ ಎಂದುಸಂಘಟನಾ ಸಮಿತಿಯ ಕಾರ್ಯಕಾರಿ ಮಂಡಳಿಯ ಸದಸ್ಯ ಹರಾಯುಕಿ ತಕಾಹಶಿ, ಜಪಾನ್‌ನ ‘ಅಸಾಹಿ ಶಿಂಬುನ್‌’ ಪತ್ರಿಕೆಗೆ ತಿಳಿಸಿದ್ದರು.
‘ಕೊರೊನಾ ವೈರಸ್‌ ಜಾಗತಿಕ ಪಿಡುಗಾಗಿದೆ. ಜಪಾನ್‌ನಲ್ಲಿ ಸಮಸ್ಯೆಯಿಲ್ಲ ಎಂದು ನಾವು ಒಲಿಂಪಿಕ್ಸ್ ನಡೆಸುವಂತಿಲ್ಲ’ ಎಂದು ಅವರು ತಿಳಿಸಿದ್ದರು.
‘ಕ್ರೀಡೆ ನಿಗದಿಯಂತೆ ನಡೆಯಲಿದೆ ಎಂದು ಐಒಸಿ ಹೇಳುತ್ತಾ ಬಂದಿದೆ’ ಎಂದು ಹೇಳಿಕೆಯಲ್ಲಿ ತಿಳಿಸುವ ಮೂಲಕಸಂಘಟಕರು ತಕಾಹಶಿ ಹೇಳಿಕೆಯಿಂದ ಅಂತರ ಕಾಯ್ದುಕೊಂಡಿದ್ದರು.
‘ಅಥ್ಲೀಟುಗಳು, ನಾಲ್ಕು ವರ್ಷಕ್ಕೊಮ್ಮೆ ನಡೆಯುವ ಈ ಕ್ರೀಡಾ ಮೇಳಕ್ಕೆ ಸಿದ್ಧತೆ ನಡೆಸುತ್ತಿದ್ದಾರೆ. ಈ ಹಂತದಲ್ಲಿ ರದ್ದುಪಡಿಸುವುದು ಅಥವಾ ಮುಂದೂಡುವುದು ಅವಾಸ್ತವಿಕವಾಗುತ್ತದೆ’ ಎಂದು ಸಚಿವೆ ಹೇಳಿದ್ದಾರೆ. ಆದರೆ ಅಂತಿಮ ನಿರ್ಧಾರವನ್ನು ಅಂತರರಾಷ್ಟ್ರೀಯ ಒಲಿಂಪಿಕ್‌ ಸಮಿತಿ ಕೈಗೊಳ್ಳಲಿದೆ ಎಂಬುದನ್ನೂ ಒಪ್ಪಿಕೊಂಡಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.