ಶನಿವಾರ, ಅಕ್ಟೋಬರ್ 24, 2020
22 °C

ಬುದ್ಧ ಸರ್ಕೀಟ್‌ನಲ್ಲಿ ಗೆದ್ದ; ವೆಟಲ್‌ಗೆ ಆನೆ ಸವಾಲು!

ಬಸವರಾಜ ದಳವಾಯಿ Updated:

ಅಕ್ಷರ ಗಾತ್ರ : | |

Prajavani

ಫಾರ್ಮುಲಾ ಒನ್ ಚಾಲಕ ಸೆಬಾಸ್ಟಿಯನ್‌ ವೆಟಲ್‌ ನಾಲ್ಕು ಬಾರಿ ವಿಶ್ವಚಾಂಪಿಯನ್‌ ಪಟ್ಟ ಧರಿಸಿದವರು. ಫೆರಾರಿ ರೇಸಿಂಗ್‌ ತಂಡದ ಜರ್ಮನಿಯ‌ ಈ ಸಾಹಸಿ ಮೋಟರ್‌ ರೇಸಿಂಗ್‌ನಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದವರು. 2011ರಲ್ಲಿ ಉತ್ತರಪ್ರದೇಶದ ಗ್ರೇಟರ್‌ ನೊಯ್ಡಾದ ಬುದ್ಧ ಸರ್ಕೀಟ್‌ನಲ್ಲಿ ನಡೆದ ಚೊಚ್ಚಲ ಇಂಡಿಯನ್‌ ಗ್ರ್ಯಾನ್‌ ಪ್ರಿ ಪ್ರಶಸ್ತಿಯು ವೆಟಲ್‌ ಅವರ ಪಾಲಾಗಿತ್ತು. 2013ರಲ್ಲೂ ಅವರು ಟ್ರೋಫಿಗೆ ಮುತ್ತಿಕ್ಕಿದ್ದರು. ಈ ವೇಳೆ ನಡೆದ ಮೋಜಿನ ಪ್ರಸಂಗವೊಂದನ್ನು ವೆಟಲ್‌ ಇತ್ತೀಚೆಗೆ ಮೆಲುಕು ಹಾಕಿದ್ದಾರೆ.

‘ಭಾರತದಲ್ಲಿ ನಾನು ಭಾಗವಹಿಸಿದ ಎಲ್ಲ ರೇಸ್‌ಗಳನ್ನು ಜಯಿಸಿದ್ದೇನೆ. ಅದು ನನಗೆ ಮೆಚ್ಚಿನ ತಾಣವೂ ಹೌದು. 2013ರ ಚಾಂಪಿಯನ್‌ಷಿಪ್‌ ಗೆದ್ದುಕೊಂಡ ನಂತರ ನಮ್ಮ ತಂಡದಿಂದ ರಾತ್ರಿ ಸಂತೋಷ ಕೂಟವನ್ನು ಏರ್ಪಡಿಸಲಾಗಿತ್ತು. ಈ ವೇಳೆ ನಾನು ಬಹಳಷ್ಟು ಮದ್ಯ ಸೇವಿಸಿದ್ದರಿಂದ ವಿಪರೀತ ಮತ್ತಿನಲ್ಲಿದ್ದೆ. ಬೆಳಿಗ್ಗೆ ವಿಮಾನ ನಿಲ್ದಾಣಕ್ಕೆ ತೆರಳುವಾಗಲೂ ಅಮಲು ಇಳಿದಿರಲಿಲ್ಲ’ ಎಂದು ಫಾರ್ಮುಲಾ ವನ್‌ ತನ್ನ ಟ್ವಿಟರ್‌ ಪೇಜ್‌ನಲ್ಲಿ ಹಂಚಿಕೊಂಡಿರುವ ವಿಡಿಯೊದಲ್ಲಿ, ಇಂಡಿಯನ್‌ ಗ್ರ್ಯಾನ್‌ ಪ್ರಿ‌ ಕುರಿತು ಕೇಳಿದ ಪ್ರಶ್ನೆಯೊಂದಕ್ಕೆ ವೆಟಲ್‌ ಉತ್ತರಿಸಿದ್ದಾರೆ.

‘ನಾನು ಕುಡಿದಿದ್ದೇನೆ ಎಂದೂ, ರಸ್ತೆ ಮಧ್ಯದಲ್ಲಿ ಆನೆ ನಿಂತಿದೆ ಎಂದೂ ನನಗೆ ಹೇಳಬೇಡ ಎಂದು ಕಾರು ಚಾಲಕನಿಗೆ ಹೇಳಿದೆ. ಇಲ್ಲ, ನಿಜವಾಗಿಯೂ ಅಲ್ಲಿ ಯಾವುದೇ ಆನೆ ಇಲ್ಲ ಎಂದು ಆತ ನುಡಿದ. ರಸ್ತೆಗೆ ಅಡ್ಡಲಾಗಿ ಆನೆಗಳು ಬಂದು ನಿಲ್ಲುವುದು ಭಾರತದಲ್ಲೇ ಹೆಚ್ಚು’ ಎಂದು ಸೆಬಾಸ್ಟಿಯನ್‌ ಮುಖ ಅರಳಿಸಿದರು.

ಭಾರತದಲ್ಲಿ 2011ರಿಂದ 2013ರವರೆಗೆ ನಡೆದ ಇಂಡಿಯನ್‌ ಗ್ರ್ಯಾನ್‌ ಪ್ರಿ ರೇಸ್‌ಗಳಲ್ಲಿ ವೆಟಲ್‌ ವಿಜಯಿಯಾಗಿದ್ದರು.

2010, 2011, 2012 ಹಾಗೂ 2013ರಲ್ಲಿ ವೆಟಲ್‌ ವಿಶ್ವ ಚಾಂಪಿಯನ್‌ ಪಟ್ಟ ಧರಿಸಿದ್ದಾರೆ. ಈ ನಾಲ್ಕೂ ಸಂದರ್ಭದಲ್ಲಿ ಅವರು ರೆಡ್‌ಬುಲ್‌ ರೇಸಿಂಗ್‌ ತಂಡದಲ್ಲಿದ್ದರು.

2021ರಲ್ಲಿ ಆ್ಯಸ್ಟನ್‌ ಮಾರ್ಟಿನ್‌ ರೇಸಿಂಗ್‌ ತಂಡದ ಪರ ಸ್ಪರ್ಧಿಸಲು ಈ ತಿಂಗಳ ಆರಂಭದಲ್ಲಿ ಅವರು ಒಪ್ಪಂದ ಮಾಡಿಕೊಂಡಿದ್ದಾರೆ. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು