ಬ್ರಿಸ್ಟೇನ್: ಜಪಾನ್‌ನ ಕೀ ನಿಶಿಕೋರಿಬ್ರಿಸ್ಟೇನ್ ಇಂಟರ್‌ನ್ಯಾಷನಲ್‌ ಟೆನಿಸ್‌ ಟೂರ್ನಿಯ ಟ್ರೋಫಿಯನ್ನು ಗೆದ್ದುಕೊಂಡರು. ಭಾನುವಾರ ನಡೆದ ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ನಿಶಿಕೋರಿ, 6–4, 3–6, 6–2 ರಿಂದ ರಷ್ಯಾದ ಡೇನಿಯಲ್‌ ಮೆಡ್ವೆಡೆವ್‌ ಅವರನ್ನು ಮಣಿಸಿದರು.
2016ರಲ್ಲಿ ನಡೆದಿದ್ದ ಮೆಂಫಿಸ್‌ ಟೂರ್ನಿಯಲ್ಲಿ ಪ್ರಶಸ್ತಿ ಜಯಿಸಿದ್ದ ನಿಶಿಕೋರಿ, 2017ರಲ್ಲಿ ನಡೆದಿದ್ದ ಬ್ರಿಸ್ಟೇನ್ ಇಂಟರ್‌ನ್ಯಾಷನಲ್‌ನಲ್ಲಿ ರನ್ನರ್‌ ಅಪ್‌ ಆಗಿದ್ದರು. ಮಣಿಕಟ್ಟು ಗಾಯದಿಂದಾಗಿ ಕಳೆದ ವರ್ಷ ಟೂರ್ನಿಗಳಿಂದ ಹೊರಗುಳಿದಿದ್ದರು.
ಮೊದಲ ಸೆಟ್‌ನಲ್ಲಿ ಉತ್ತಮವಾಗಿ ಆಟ ಆರಂಭಿಸಿದ ಮೆಡ್ವೆಡರ್‌ ಅವರು 3 ಪಾಯಿಂಟ್‌ಗಳಿಂದ ಮುನ್ನಡೆ ಗಳಿಸಿದ್ದರು. ಪಾಯಿಂಟ್ಸ್‌ ಗಳಿಸುವಲ್ಲಿ ವಿಫಲವಾಗಿದ್ದ ನಿಶಿಕೋರಿ ಎಚ್ಚೆತ್ತುಕೊಂಡು ತಿರುಗೇಟು ನೀಡಿ, 3–3 ಸಮಬಲ ಸಾಧಿಸಿದರು. ಈ ಸೆಣಸಾಟವು 42 ನಿಮಿಷಗಳ ಕಾಲ ನಡೆಯಿತು.
ಎರಡನೇ ಸೆಟ್‌ನಲ್ಲಿ ಮೆಡ್ವಿಡೆವ್‌ ನಿರಾಯಾಸವಾಗಿ ಮುನ್ನಡೆ ಸಾಧಿಸಿದರು. ಎರಡು ಗಂಟೆಗಳ ಕಾಲ ನಡೆದ ನಿರ್ಣಾಯಕ ಸುತ್ತಿನ ಹಣಾಹಣಿಯಲ್ಲಿ ನಿಷಿಕೋರಿ ಗೆಲುವು ಸಾಧಿಸಲು ಸಫಲರಾದರು.
