ಬೆಂಗಳೂರು: ರಾಜಭವನದೊಳಗೆ ಅಕ್ರಮವಾಗಿ ಪ್ರವೇಶಿಸಿದ್ದ ಆರೋಪದಡಿ ಇಸ್ಮಾಯಿಲ್ ಎಂಬುವರನ್ನು ವಶಕ್ಕೆ ಪಡೆದಿದ್ದ ವಿಧಾನಸೌಧ ಪೊಲೀಸರು, ಎಚ್ಚರಿಕೆ ನೀಡಿ ಬಿಟ್ಟು ಕಳುಹಿಸಿದ್ದಾರೆ.
ಕಂಪನಿಯೊಂದರ ಉದ್ಯೋಗಿಯಾದ ಇಸ್ಮಾಯಿಲ್, ಊಟಕ್ಕೆಂದು ಶಾಸಕರ ಭವನದ ಹೋಟೆಲ್‌ಗೆ ಅ. 28ರಂದು ಬಂದಿದ್ದರು. ಊಟದ ನಂತರ ಬೈಕ್‌ನಲ್ಲಿ ರಾಜಭವನದೊಳಗೆ ಪ್ರವೇಶಿಸಿದ್ದರು. ಸಹಾಯಕ ಸಬ್‌ಇನ್‌ಸ್ಪೆಕ್ಟರ್‌ ಬಾಲಕೃಷ್ಣ, ಅವರನ್ನು ಪೊಲೀಸರ ವಶಕ್ಕೆ ನೀಡಿದ್ದರು.
‘ಇಸ್ಮಾಯಿಲ್ ಅವರಿಗೆ ಶಾಸಕರ ಭವನದಿಂದ ಹೊರಗೆ ಹೋಗುವ ದಾರಿ ಬಗ್ಗೆ ಗೊತ್ತಿರಲಿಲ್ಲ. ತಪ್ಪು ದಾರಿಯಲ್ಲಿ ಹೋಗಿ ಹಿಂಬಾಗಿಲಿನಿಂದ ರಾಜಭವನದ ಒಳಗೆ ಪ್ರವೇಶಿಸಿದ್ದರು. ವಿಚಾರಣೆ ನಡೆಸಿದಾಗ, ತಮಗೆ ಗೊತ್ತಿಲ್ಲದೇ ಒಳಗೆ ಹೋದೆ ಎಂದು ಇಸ್ಮಾಯಿಲ್ ಹೇಳಿದರು. ಪುನಃ ಆ ರೀತಿ ನಡೆದುಕೊಳ್ಳದಂತೆ ಎಚ್ಚರಿಕೆ ನೀಡಿ ಬಿಟ್ಟು ಕಳುಹಿಸಿದ್ದೇವೆ’ ಎಂದು ವಿಧಾನಸೌಧ ಪೊಲೀಸರು ಹೇಳಿದರು.
